ខេត្តបន្ទាយមានជ័យ៖កាលពីយប់ថ្ងៃទី២៦ ខែកញ្ញា ឆ្នាំ២០២១ឧត្តមសេនីយ៍ត្រី គីម វីរះ ទីប្រឹក្សាគណៈកម្មាធិការជាតិគ្រប់គ្រងគ្រោះមហន្តរាយ អមដំណើរដោយឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ បានត្រួតពិនិត្យការដំឡើងតង់បន្ថែមទៀតទាំងយប់ ដើម្បីត្រៀមសម្រាប់បងប្អូនប្រជាពលរដ្ឋដែលរងគ្រោះដោយទឹកជំនន់។
សូមបញ្ជាក់ផងដែរថា គិតមកត្រឹមយប់ថ្ងៃទី២៦ ខែកញ្ញា ឆ្នាំ២០២១នេះ ទឹកនៅតែបន្តហក់ឡើង និងមានភ្លៀងធ្លាក់កំរិតមធ្យមផងដែរ។ជាក់ស្តែងនៅយប់នេះក្រុមការងារបានដំឡើងតង់បន្ថែមចំនួន៥ ដើម្បីត្រៀមបំរុងទុកសម្រាប់ប្រជាពលរដ្ឋក្នុងករណីទឹកដែលបន្តកើនឡើងទៀត គឺយើងនិងជម្លៀសពួកគាត់មកកាន់ទីទួលសុវត្ថិភាពដែរបំរុងទុក។
ក្នុងនោះដែរក៏មានកងកម្លាំងចម្រុះ និងកងកម្លាំងអន្តរាគមន៍របស់កងពលតូចថ្មើរជើងលេខ៥១ ដែលត្រៀម២៤ម៉ោងលើ២៤ម៉ោង ក្នុងទីតាំងរងគ្រោះផ្ទាល់តែម្តង ដែលមានទូកសម្រាប់ចល័តជួយទាំងយប់ក្នុងករណីដែរមានសំណូមពរពីប្រជាពលរដ្ឋ និងអាជ្ញាធរមូលដ្ឋាន។
ក្នុងឱកាសនោះដែរឧត្តមសេនីយ៍ត្រី គីម វីរះ ក៏បានអំពាវនាវដល់បងប្អូនប្រជាពលរដ្ឋអោយមានការប្រុងប្រយ័តខ្ពស់ចំពោះកូនតូច និងទ្រព្យសម្បត្តិមួយចំនួនករណីទឹកជំនន់បន្តកើនឡើងធ្វើអោយប៉ះពាល់ធ្ងន់ធ្ងរ សូមរាយការណ៍មកអាជ្ញាធរមូលដ្ឋាន ឫទីបញ្ជាការគណៈកម្មាធិការជាតិគ្រប់គ្រងគ្រោះមហន្តរាយ និងកម្លាំងដែរប្រចាំការនៅទីតាំងរងគ្រោះផ្ទាល់ ដើម្បីជួយសង្គ្រោះអោយបានទាន់ពេលវេលា៕
