ខេត្តបន្ទាយមានជ័យ៖នៅព្រឹកថ្ងៃទី២៤ ខែកញ្ញា ឆ្នាំ២០២១នេះ ឯកឧត្តម នាយឧត្តមសេនីយ៍ គន់ គីម ទេសរដ្ឋមន្រី្ត អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ អមដំណើរដោយឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ លោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោធភូមិភាគទី៥ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត លោកឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើជើងលេខ៥១ លោកឧត្តមសេនីយ៍ត្រី ជឹម ប៊ុនអាន មេបញ្ជាការតំបន់ប្រតិបត្តិកាសឹករងបន្ទាយមានជ័យ លោកឧត្តមសេនីយ៍ត្រី តឹក ប៊ុនធឿន មេបញ្ញាការងទិសទី១ បន្ទាយមានជ័យ យោធភូមិភាគទី៥ និងមន្រ្តីពាក់ព័ន្ធជាច្រើនរូបទៀត បានអញ្ជើញចុះពិនិត្យមើលស្ថានភាពទឹកក្នុងភូមិសាស្រ្តខេត្តបន្ទាយមានជ័យ ខណៈដែលជំនន់ទឹកភ្លៀង គួបផ្សំនឹងទឹកជំនន់ធ្លាក់មកពីប្រទេសថៃ ដែលបានធ្វើឱ្យខេត្តបន្ទាយមានជ័យ ពិសេសក្រុង–ស្រុក តាមបន្ទាត់ព្រំដែន ប្រឈមនឹងទឹកជំនន់ ក្នុងនោះមានស្រុកមង្គលបូរី ក្រុងសិរីសោភ័ណ និងក្រុងប៉ោយប៉ែត ដែលកំពុងប្រឈមនឹងទឹកជំនន់ជាងគេ។
ក្នុងដំណើរអញ្ជើញចុះត្រួតពិនិត្យស្ថានភាពទឹកនេះដែលឯកឧត្តម នាយឧត្តមសេនីយ៍ គន់ គីម និងថ្នាក់ដឹកនាំខេត្តបន្ទាយមានជ័យ បានធ្វើការត្រៀមរួចជាស្រេចនូវសម្ភារៈមួយចំនួន ក្នុងការជម្លៀសប្រជាពលរដ្ឋ ដែលរងផលប៉ះពាល់ដោយសារការជន់លិចលំនៅដ្ឋានរបស់ពួកគាត់ទៅរកទីទួលសុវត្ថិភាពផងដែរ។
គួរបញ្ជាក់ផងដែរថា រយះកាលប៉ុន្មានថ្ងៃមកនេះមានភ្លៀងធ្លាក់ជាខ្លាំងជាប់ៗគ្នា និងគួបផ្សំទឹកជំនន់ហូធ្លាប់ពីស្រុកអារញ្ញ ខេត្តស្រះកែរ ប្រទេសថៃ ផងនោះបានបណ្តាលឲ្យជន់លិចផ្លូវ និងលំនៅដ្ឋានប្រជាពលរដ្ឋ នៅតំបន់ទំនាបក្នុងភូមិសាស្ត្រខេត្តបន្ទាយមានជ័យ ពិសេសនៅតាមខ្សែបន្ទាត់ព្រំដែនកម្ពុជា–ថៃ តែម្តង តែទោះយ៉ាណាក្តីថ្នាក់ដឹកនាំ កងកម្លាំងគ្រប់ស្ថាប័នបានខិតខំទាំងយប់ទាំងថ្ងៃ នឹងត្រៀមកម្លាំង សម្ភារៈ ទីទួលសុវត្ថិភាពនិងស្បៀងអាហាររួចជាស្រេច ដើម្បីជួយសង្គ្រោះប្រជាពលរដ្ឋហើយដែរ៕
