ខេត្តបន្ទាយមានជ័យ៖កំណាត់ផ្លូវជាតិលេខ៥ ពីបាត់ដំបង មកក្រុងសិរីសោភ័ណ ដែលមានប្រវែងសរុប ៨៤,៧៤ គីឡូម៉ែត្រ ត្រូវបានបើកឲ្យចរាចណ៍ធ្វើដំណើរទៅមក បន្ទាប់ពីបញ្ចប់ការស្ថាបនារួចរាល់រួចរាល់របស់ក្រុមហ៊ុនសាងសង់ជប៉ុន។
ការបើកឲ្យធ្វើចរាចណ៍នេះបានធ្វើឡើងនៅព្រឹកថ្ងៃទី២៣ ខែកញ្ញា ឆ្នាំ២០២១ ដោយមានការអញ្ជើញចូករួមពីឯកឧត្តម អ៊ុំ រាត្រី អភិបាលនៃអភិបាលខេត្តបន្ទាយមានជ័យ, តំណាងក្រុមហ៊ុនសាងសង់ជប៉ុន លោក សុក ចាន់ថា ប្រធានមន្ទីរសាធារណៈការ និងដឹកជញ្ជូនខេត្ត ,លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ,លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងប្រធានមន្ទីរពាក់ព័ន្ធ និងមន្ត្រីបច្ចេកទេសជាច្រើននាក់ផងដែរ។
លោក សុក ចាន់ថា បានឲ្យដឹងថា កំណាត់ផ្លូវជាតិលេខ៥ ពីក្រុងបាត់ដំបង ទៅសិរីសោភ័ណ ខេត្តបន្ទាយមានជ័យ នេះបានបញ្ចប់ការសាងសង់ទាំង ស្រុងយ៉ាងរឹងមាំ ក្រោមជំនួយរបស់រដ្ឋាភិបាលជប៉ុន។
លោកបន្តថា កន្លងទៅកំណាត់ផ្លូវមួយខ្សែនេះ បើកឲ្យប្រើប្រាស់តែមួយជំហៀងលើគន្លងតែមួយនាំឲ្យមានការកកស្ទះ មិនសូវសុវត្ថិភាពសម្រាប់ការធ្វើដំណើរ។ក្រោយការបើកឲ្យចរាចរណ៍ពេញលេញនឹងចែកគន្លងគ្នាដាច់ ពីរទៅពីរមក មិនអាចជិះបញ្រ្ចាសដូចមុនទៀតបាននោះឡើយ។
ជាងនេះទៅទៀតលោកបញ្ជាក់ទៀតថា ផ្លូវមួយខ្សែនេះមានសារៈសំខាន់ណាស់ ហើយក៏ជាច្រកសេដ្ឋកិច្ចដ៏ធំមួយសម្រាប់ ប្រទេសកម្ពុជាតភ្ជាប់បណ្តាញដឹកជញ្ជូនជាមួយបណ្តាប្រទេសក្នុងតំបន់អាស៊ាន។គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ គឺជាគម្រោងក្រោមកម្ចីឥណទាន សម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការ អន្តរជាតិជប៉ុនប្រចាំកម្ពុជា ដែលផ្តើមសាងសង់ចេញពីព្រែកក្តាម រហូតដល់ក្រុងប៉ោយប៉ែត ឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ មានប្រវែងសរុប៣៦៦ គីឡូម៉ែត្រ គ្រោងចំណាយថវិកាប្រមាណ ៥០០ លានដុល្លារ អាមេរិក។ចំពោះការសាងសង់ពង្រីកពី ២គន្លង ទៅ ៤គន្លង មានទទឹង សរុប ២៣ ម៉ែត្រ ក្រាលដោយកៅស៊ូ AC (Asphalt Concrete) និងមានសួនច្បារកណ្តាលផងដែរ៕
