ខេត្តបន្ទាយមានជ័យ៖ដោយសារភ្លៀងធ្លាប់ជាប់ៗគ្នាប៉ុន្មានថ្ងៃ បង្កឲ្យតំបន់មួយចំនួននៅក្នុងភូមិសាស្ត្រខេត្តបន្ទាយមានជ័យ ជនលិចពិសេសនៅតាមដងស្ទឹងសិរីសោភ័ណ និងស្ទឹងមង្គលបូរី ប្រជាពលរដ្ឋជាច្រើនគ្រួសារ ត្រូវបានអាជ្ញាធរជម្លៀសទៅរកទីទួលសុវត្ថិភាព។
លោក ហ៊ឹល រ៉ាយ៉ា អភិបាលក្រុងសិរីសោភ័ណ បានឲ្យដឹងថា ដោយសារបីថ្ងៃនេះមានភ្លៀងធ្លាក់ជាប់ៗគ្នា ព្រមទាំងថៃបើកបង្ហូរទឹកមកពីលើទៀតនោះ ធ្វើឲ្យទឹកហក់ឡើងខ្លាំង ជាហេតុធ្វើឲ្យផ្ទះប្រជាពលរដ្ឋលិចបណ្តើរៗ ក្នុងនោះអាជ្ញាធរក្រុងសិរីសោភ័ណ បាន រៀបចំក្រុមការងារចុះជួយជម្លៀស ប្រជាពលរដ្ឋដែលរងគ្រោះដោយសារជំនន់លិចលំនៅដ្ឋានរបស់ពួកគាត់មកស្នាក់នៅទីទួសសុវត្តិភាពហើយ។ចំណែកឯស្រុកមង្គលបុរីវិញ បើយោងតាម លោក រ័ត្ន ដាស៊ីណង់ អភិបាលស្រុកមង្គលបុរី បានឲ្យដឹងដែរថា បងប្អូន ដែលរស់នៅតាមបណ្តោយដងស្ទឹងមង្គលបូរី បានលិចជាបណ្តើរៗហើយក្នុងនោះលោកបានជម្លៀសប្រជាពលរដ្ឋដឹកជញ្ជូនតាមទូក កាណូត មកស្នាក់នៅទីទួលសុវត្ថិភាពកន្លែងផ្លូវវាងក្រុងជាបណ្តើរៗផងដែរ។
ក្នុងនោះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងក្រុមការងារបានអញ្ជើញចុះពិនិត្យស្ថានភាព ប្រជាពលរដ្ឋដោយផ្ទាល់ដែលរងគ្រោះដោយសារទឹកជំនន់ ក្រោយពីមានភ្លៀងធំជាច្រើនធ្លាក់មកជាប់ៗគ្នា៣ថ្ងៃ ស្រាប់តែទឹកស្ទឹងសិរីសោភ័ណចាប់ផ្តើមឡើងយ៉ាងខ្លាំង។ពលរដ្ឋដែលរងគ្រោះដោយទឹកជំនន់ទាំងអស់ខាងលើនោះ ត្រូវបានរដ្ឋបាលខេត្តបន្ទាយមានជ័យ ក្រុង ស្រុកបានជម្លៀស ទៅទីទួលសុវត្ថិភាពអស់ហើយ ថែមទាំងបានចែកស្បៀង អាហារសម្រាប់បរិភោគប្រចាំថ្ងៃទៀតផង។
ជាមួយគ្នានោះដែរឯកឧត្តម អ៊ុំ រាត្រី បានធ្វើការផ្តាំផ្ញើរដល់បងប្អូនប្រជាពលរដ្ឋដែលរងគ្រោះដោយទឹកជំនន់ទាំងអស់ ត្រូវចូលរួមថែរក្សាបរិស្ថានជុំវិញកន្លែងស្នាក់នៅ ត្រូវចេះធ្វើអនាម័យជាប្រចាំ ហូបស្អាត ផឹកស្អាត និងរស់នៅស្អាត។
ប្រជាពលរដ្ឋដែលរងគ្រោះដោយទឹកជំនន់មានភាពកក់ក្តៅយ៉ាងខ្លាំង ចំពោះការយកចិត្តទុកដាក់ ក្នុងការជួយសង្គ្រោះរបស់រដ្ឋបាលខេត្ត ដែលប្រជាពលរដ្ឋកំពុងជួបបញ្ហាទុក្ខលំបាក៕
