ខេត្តបន្ទាយមានជ័យ៖កម្លាំងយោធាកងការពារព្រំដែនលេខ៥០៣ ចំណុះឲ្យយោធភូមិភាគទី៥ ដឹកនាំដោយលោកឧត្តមសេនីយ៍ត្រី ឃួន ជឿន មេបញ្ជាការកងការពារព្រំដែនលេខ៥០៣ ឃាត់ខ្លួនមេខ្យល់ម្នាក់ឈ្មោះ ប៉ិ ម៉ៅ ភេទប្រុស អាយុ៤៧ឆ្នាំ មុខរបររត់ម៉ូតូឌុប បច្ចុប្បន្ន រស់នៅភូមិកន្ទួត សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ បន្ទាប់ពីនាំមនុស្សចំនួន០២នាក់ ក្នុងនោះស្រ្តីម្នាក់ បម្រុងឆ្លងដែនដោយខុសច្បាប់ទៅប្រទេសថៃ កាលពីវេលាម៉ោង០៦ និង០០នាទី ថ្ងៃទី២២ ខែកញ្ញា ឆ្នាំ២០២១ នៅចំណុចភូមិខ្វាវលិច ឃុំស្វាយចេក ស្រុកស្វាយចេក ខណៈដែលកម្លាំងកំពុងចុះល្បាតតាមបន្ទាត់ព្រំដែន។
មេខ្យល់ខាងលើក្រោយពីឃាត់ខ្លួនបាន កងកម្លាំងការពារព្រំដែនបានបញ្ជូនប្រគល់ឱ្យទីបញ្ជាការដ្ឋានកងរាជអាវុធហត្ថខេត្ត ចាត់ការតាមនីតិវិធី។ចំណែកពលករចំនួន០២នាក់ត្រូវបានកម្លាំងកងការពារព្រំដែនបញ្ជូនទៅមណ្ឌលចត្តាឡីស័កអូរបីជាន់ ស្ថិតក្នុងស្រុកអូរជ្រៅ ខេត្តបន្ទាយមានជ័យ ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានឱ្យដឹងថា មេខ្យល់ឈ្មោះ ប៉ិ ម៉ៅ ក្រោយពីកម្លាំងការិយាល័យជំនាញសាកសួរចម្លើយរួចមកបានឆ្លើយសារភាពថា រូបគេពិតជាបានដឹកពលករប្រុស–ស្រី ចំនួន០២នាក់ ដោយម៉ូតូបម្រុងលួចឆ្លងដែនទៅប្រទេសថៃ ដោយខុសច្បាប់ពិតប្រាកដមែន ។
លោកវរសេនីយ៍ឯក ម៉ែន ភិរម្យ បញ្ជាក់ថា បច្ចុប្បន្ន ជនសង្ស័យនិងវត្ថុតាងម៉ូតូ ត្រូវបានកម្លាំងការិយាល័យប្រឆាំងការជួញដូរមនុស្ស បញ្ជាការដ្ឋានកងរាជអាវុធហត្ថខេត្ត បញ្ជូនទៅសាលាដំបូងខេត្ត នៅរសៀលថ្ងៃទី២៣ ខែកញ្ញា ឆ្នាំ២០២១ ដើម្បីចាត់ការបន្តតាមនិតិវិធី៕
