ខេត្តបន្ទាយមានជ័យ៖ក្រោយពីភ្លៀងធ្លាក់ជាប់ៗគ្នាប៉ុន្មានថ្ងៃមកនេះបានធ្វើឱ្យផ្លូវ និងផ្ទះប្រជាពលរដ្ឋមួយចំនួននៅក្នុងភូមិសាស្ត្រខេត្តបន្ទាយមានជ័យ ពិសេសក្រុងប៉ោយប៉ែតនៅតំបន់ទំនាបតាមបន្ទាត់ព្រំដែនកម្ពុជា ថៃ រងការជន់លិច អាជ្ញាធរបានចុះជួយសង្គ្រោះជម្លៀសរកទីទួលសុវត្ថិភាព ទាន់ពេលវេលា មិនបណ្តាលឲ្យអ្នកណាម្នាក់រងគ្រោះថ្នាក់ឡើយ។
លោក គាត ហ៊ុល អភិបាលនៃគណៈអភិបាលក្រុងប៉ោយប៉ែតបានឲ្យដឹងថា ក្នុងនាមលោកជាប្រធានគណៈបញ្ជារឯកភាពក្រុង បានត្រៀមកម្លាំង សម្ភារៈ និងទីទួលសុវត្ថិភាពរួចជាស្រាច ដើម្បីជួយសង្គ្រោះ និងជម្លៀសប្រជាពលរដ្ឋ នៅពេលទឹកជំនន់ជន់លិចលំនៅដ្ឋានរបស់ប្រជាពលរដ្ឋកើតមានឡើង បន្ទាប់ពីទទួលបានព័ត៌មានពីអាជ្ញាធរស្រុកអារញ្ញប្រាថេត ខេត្តស្រះកែវ ប្រទេសថៃថា ស្ថានភាពទឹកនៅក្នុងស្រុកអារញ្ញប្រាថេត បាននឹងកំពុងហក់ឡើងលឿនគួរឱ្យព្រួយបារម្ភ បណ្តាលមកពីឥទ្ធិពលនៅតំបន់ខៅយ៉ៃ នៃខេត្តនគររាជសីម៉ា លក្ខណៈបែបនេះ នឹងបង្កឱ្យផ្នែកខ្លះក្នុងភូមិសាស្រ្តក្រុងប៉ោយប៉ែត ខេត្តបន្ទាយមានជ័យ នឹងទទួលរងឥទ្ធិពលទឹកជំនន់ពីប្រទេសថៃឡង់ដ៏ ក្នុងកម្រិតធ្ងន់ធ្ងរផងដែរនាពេលខាងមុខនេះ។
លោក អភិបាលក្រុងបញ្ជាក់ថា តាមការពិនិត្យស្ថានភាពទឹកនៅតាមមាត់អូរព្រំដែនកម្ពុជា ថៃ គិតចាប់ពីយប់មិញ រហូតមកដល់ព្រឹកថ្ងៃទី២៣ ខែកញ្ញា ឆ្នាំ២០២១នេះ ទឹកបានហក់ឡើងកម្ពស់ ៤ទឹក ធ្វើឲ្យមានហានីភ័យចំពោះប្រជាពលរដ្ឋ។ដូច្នេះគណៈបញ្ជាការឯកភាពក្រុងរួមមាន កម្លាំងយោធា អធិការនគរបាល កងរាជអាវុធហត្ថ វរៈការពារព្រំដែន បានត្រៀមរួចជាស្រាចនូវសម្ភារៈមួយចំនួនដូចជា ក្បូន ទូក ជាដើម រីឯកន្លែងស្នាក់នៅទីទួលសុវត្ថិភាពមានចំនួន៥កន្លែង ដោយបានរៀបចំទាំងប្រព័ន្ធទឹក និងភ្លើង រួចជាស្រាចហើយដែរ។
ជាមួយគ្នានោះដែរលោកអភិបាលក្រុង បានធ្វើការអំពាវនាវដល់សាធារណជន និងបងប្អូនប្រជាពលរដ្ឋ ដែលរស់នៅក្នុងភូមិសាស្រ្តក្រុង ពិសេសបងប្អូនប្រជាពលរដ្ឋរស់នៅតាមមាត់អូរព្រំដែនកម្ពុជា–ថៃ ព្រមទាំងបងប្អូនប្រជាពលរដ្ឋរស់នៅផ្នែកខ្លះក្នុងភូមិសាស្ដ្រសង្កាត់ប៉ោយប៉ែត, សង្កាត់ផ្សារកណ្ដាល និងសង្កាត់និមិត្ត មេត្តាបង្កើនការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ ពិសេសកូនតូចៗ និងសត្វអសិរពិសដែលអាចបង្កគ្រោះថ្នាក់ដល់អាយុជីវិតផងដែរ៕
