ខេត្តកំពង់ចាម៖នៅព្រឹកថ្ងៃទី២២ ខែកញ្ញា ឆ្នាំ២០២១ ឯកឧត្ដម អ៊ុន ចាន់ ដា អភិបាលនៃគណៈអភិបាលខេត្តកំពង់ចាម និងលោកជំទាវ ញូង ចរិយា ប្រធានកិត្តិយសសាខាសមាគមនារីកម្ពុជាដើម្បី សន្តិភាព ខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្ត រួមនឹងមន្ត្រីរាជការក្នុងខេត្តកំពង់ចាម អញ្ជើញចូលរួមកាន់បិណ្ឌ វេនទី០១ នៅវត្តជ័យគិរី ហៅ ( វត្តភ្នំហាន់ជ័យ ) ស្ថិតនៅ ក្នុងភូមិហាន់ជ័យ ឃុំហាន់ជ័យ ស្រុកកំពង់សៀម ខេត្តកំពង់ចាម ដើម្បីធ្វើការឧទ្ទិសមគ្គផលកុសលផលបុណ្យ ជូនមាតា បិតា ញាតិកកាទាំងប្រាំពីរសន្តាន ដែលបានចែកឋាន និងអ្នកស្លាប់ ដោយសារជំងឺកូវិដ–១៩ រួមនិងអតីតយុទ្ធជនស្នេហាជាតិ សូមឲ្យវិញ្ញាណក្ខនរបស់ពួកគាត់មកទទួលយក កុសលផលបុណ្យ និងបានទៅកើតក្នុងសុគតិភពកុំបីឃ្លៀងឃ្លាតឡើយ ។
ថ្លែងនៅក្នុងពិធីបុណ្យនោះ ឯកឧត្តមអភិបាលខេត្ត បានអំពាវនាវដល់ពុទ្ធបរស័ទទាំងអស់ នៅពេលមកកាន់បិណ្ឌតាមវត្តអារាមនីមួយៗ ត្រូវមានការប្រុងប្រយ័ត្នខ្ពស់ជាប់ជានិច្ច ដោយត្រូវចូលរួមអនុវត្តទៅតាមវិធានការរបស់សុខាភិបាល និងវិធានការរបស់ប្រមុខ រដ្ឋាភិបាល «៣ ការពារ និង ៣កុំ» ឲ្យបានខ្ជាប់ខ្ជួន ដើម្បីបញ្ជៀសការចំលងជំងឺកូវីដ។
ឯកឧត្តម អ៊ុន ចាន់ដា ថ្លែងបន្តថា យើងមិនត្រូវធ្វេសប្រហែសនៅពេលធ្វើដំណើរទៅកាន់វត្តអារាម ណាមួយត្រូវចូលរួមគោរពច្បាប់ចរាចរណ៍ មានការយោគយល់ អធ្យាស្រ័យ ឱ្យគ្នាទៅវិញទៅមកក្នុងការ ធ្វើដំណើរដើម្បីសេចក្តីសុខ និងសុវត្ថិភាពទាំងអស់គ្នា។
ក្នុងពិធីកាន់បិណ្ឌ វេវេទី១ នេះ ឯកឧត្តម អ៊ុន ចាន់ដា អភិបាលខេត្តកំពង់ចាម និងលោកជំទាវ រួមនឹងថ្នាក់ដឹកនាំ មន្ត្រីរាជការក្រោមឱវាទ ព្រមទាំងអ្នកតំណាងរាស្ត្រមណ្ឌលកំពង់ចាម បាន នាំយក នូវទេយ្យវត្ថុ និងបច្ច័យ មួយចំនួន ប្រគេនដល់ព្រះសង្ឃគង់នៅវត្តជ័យគិរី ហៅ (វត្ត ភ្នំហាន់ជ័យ ) រួមមានៈអង្ករ ចំនួន២០០គីឡូក្រាម ,មី ចំនួន ៥កេស ,ទឹកបរិសុទ្ធ ៥កេស ,ទឹកក្រូច ៥កេស, ទឹកដោះគោ ខាប់ ១កេស ,តែ ចំនួន ៥កញ្ចប់ ,ស្ករស ចំនួន ៥គគីឡូ ,ចង្ហាន់ ចំនួន ៧ស្រាក់ ,ផ្លែឈើ ចំនួន ៥កន្ត្រក់ និងបច្ច័យ សម្រាប់ កសាងដែលជាថវិការផ្ទាល់របស់ឯកឧត្តម អ៊ុន ចាន់ដា និងលោកជំទាវ ចំនួន ២,០០០,០០០ រៀល បូករួម ថវិកា១០០ដុល្លារ និងថវិការបស់ សប្បុរសជន ចំនួន ៣,៣០០,០០០ រៀលផងដែរ៕
