នៅរសៀលថ្ងៃអង្គារ ១៥កេីត ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២១ ខែកញ្ញា ឆ្នាំ២០២១ វេលាម៉ោង ១៤:៣០នាទី រដ្ឋបាលខណ្ឌដូនពេញ បានបើកកិច្ចប្រជុំគណៈបញ្ជាការឯកភាពរដ្ឋបាលខណ្ឌដូនពេញ តាមរយៈការបញ្ជូនរូបភាព និងសំលេង(Video Zoom Meeting) ក្រោមអធិបតីភាពលោក សុខ ពេញវុធ អភិបាល នៃគណៈអភិបាលខណ្ឌដូនពេញ ដោយមានការចូលរួមពីលោក-លោកស្រី គណៈអភិបាលខណ្ឌ, លោកនាយក-នាយករងខណ្ឌ, អធិការរងនគរបាលខណ្ឌ, មេបញ្ជាការរងកងរាជអាវុធហត្ថខណ្ឌ, លោកយោធភូមិភាគពិសេស, លោក-លោកស្រីប្រធានការិយាល័យទាំង១១, លោក-លោកស្រីចៅសង្កាត់ទាំង១១, លោក នាយប៉ុស្តិ៍នគរបាលរដ្ឋបាលទាំង១១ និងលោក-លោកស្រីប្រធានទីរួមផ្សារទាំង០៣ ដោយមាន០៥របៀបវារៈដូចខាងក្រោម ÷
១- មតិស្វាគមន៍បើកអង្គប្រជុំរបស់ លោក សុខ ពេញវុធ អភិបាល នៃគណៈអភិបាលដូនពេញ និងជាប្រធានគណៈបញ្ជាការឯកភាពរដ្ឋបាលខណ្ឌដូនពេញ។
២- សេចក្តីរាយការណ៍ ស្តីពីផែនការការពារសន្តិសុខ សណ្តាប់ធ្នាប់សាធារណៈសម្រាប់ពិធីបុណ្យកាន់បិណ្ឌ និងភ្ជុំបិណ្ឌ។
៣- មតិចូលរួមពិភាក្សារបស់ សមាជិក សមាជិកា អង្គប្រជុំ។
៤- ការងារផ្សេងៗ
ក. ការងារប្រយុទ្ធប្រឆាំងជំងឺកូវីដ-១៩ ប្រចាំថ្ងៃ។
ខ. របាយការណ៍ ស្តីពីវឌ្ឍនភាពនៃការបើកឱ្យដំណើរការបង្រៀន និងរៀនឡើងវិញ សម្រាប់គ្រឹះស្ថានឯកជន ដែលមានហានិភ័យទាប ដោយលោក ហេង លេង ប្រធានការិ.អប់រំ យុវជន និងកីឡាខណ្ឌ។
គ. ការងាររៀបចំវេនយាមប្រចាំការរបស់រដ្ឋបាលខណ្ឌ សង្កាត់ និងអង្គភាពនានា ចំណុះគណៈបញ្ជាការឯកភាពរដ្ឋបាលខណ្ឌដូនពេញ សម្រាប់គ្រប់គ្រងបញ្ហាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈក្នុងពិធីបុណ្យកាន់បិណ្ឌ និងភ្ជុំបិណ្ឌ នាពេលខាងមុខ។
៥- មតិបូកសរុប និងដាក់ចេញផែនការអនុវត្តដោយ លោក សុខ ពេញវុធ អភិបាល នៃគណៈអភិបាលដូនពេញ និងជាប្រធានគណៈបញ្ជាការឯកភាពរដ្ឋបាលខណ្ឌដូនពេញ៕
