ខេត្តបន្ទាយមានជ័យ៖ជនសង្ស័យឈ្មោះ ហេង សុខហាក់ ភេទប្រុស អាយុ៣៣ឆ្នាំ បច្ចុប្បន្ន ស្នាក់នៅបណ្ដោះអាសន្នក្នុងភូមិក្បាលស្ពាន១ សង្កាត់/ក្រុងប៉ោយប៉ែត ខេត្តបន្ទាយមានជ័យ ត្រូវបានកម្លាំងកងរាជអាវុធហត្ថក្រុងប៉ោយប៉ែត ចាប់ឃាត់ខ្លួន ពាក់ព័ន្ធករណីលួចម៉ូតូ និងរក្សាទុកគ្រឿងញៀនដោយខុសច្បាប់។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្តក្រុងប៉ោយប៉ែតបានឱ្យដឹងថា តាមពាក្យបណ្ដឹងរបស់ឈ្មោះ ធឿន គន្ធា ភេទស្រី អាយុ៣១ឆ្នាំ បច្ចុប្បន្ន រស់នៅភូមិសាមគ្គីមានជ័យ សង្កាត់/ក្រុងប៉ោយប៉ែតបានរៀបរាប់ថា នៅវេលាម៉ោង២២និង០០នាទី ថ្ងៃទី១៩ ខែកញ្ញា ឆ្នាំ២០២១ រូបខ្លួនបានចតម៉ូតូ០១គ្រឿងម៉ាកហុងដាឌ្រីម ពណ៌ខ្មៅ ផលិតឆ្នាំ២០១៦ ពាក់ផ្លាកលេខបន្ទាយមានជ័យ 1K-8212 នៅក្នុងផ្ទះដោយមានកូនសោរជាប់នៅជាមួយម៉ូតូ ហើយរូបខ្លួនបានចេញទៅអង្គុយលេងផ្ទះអ្នកជិតខាង ពេលត្រឡប់មកវិញ ស្រាប់តែឃើញចោរម្នាក់កំពុងអូសម៉ូតូរបស់ខ្លួនចេញពីផ្ទះ ឃើញដូច្នេះរូបខ្លួនបានស្រែកហៅអ្នកជិតខាងឱ្យជួយចាប់ចោរនោះតែម្ដង ហើយទូរស័ព្ទប្ដឹងទៅសមត្ថកិច្ចមូលដ្ឋានកងរាជអាវុធហត្ថក្រុង ដើម្បីមកនាំខ្លួនចោរនោះយកទៅសាកសួរចម្លើយ។ ក្រោយពីកម្លាំងនាំមកមូលដ្ឋានកងរាជអាវុធហត្ថក្រុង ធ្វើការឆែកឆេររកឃើញគ្រឿងញៀនប្រភេទមេតំហ្វេតាមីនទឹកកកចំនួន១៣កូនថង់តូច និងគ្រឿងញៀនអ៊ិចស្តាស៊ីចំនួន០៨គ្រាប់ផងដែរ ។
លោកវរសេនីយ៍ត្រី នួន នីណារ៉ូ បញ្ជាក់ថា ក្រោយពីកម្លាំងជំនាញសាកសួរចម្លើយរួចបានឆ្លើយសារភាពថា ខ្លួនគេពិតជាបានធ្វើសកម្មភាពលួចយកម៉ូតូរបស់ដើមបណ្ដឹងខាងលើពិតប្រាកដមែន។ដោយផ្អែកលើករណីជាក់ស្ដែង និងតាមការស្ដាប់ចម្លើយរបស់ជនសង្ស័យ ព្រមទាំងមានវត្ថុតាងផងនោះ ទើបកម្លាំងជំនាញមូលដ្ឋានកងរាជអាវុធហត្ថក្រុង កសាងសំណុំរឿងបញ្ជូនមកបញ្ជាការដ្ឋានកងរាជអាវុធហត្ថខេត្តចាត់ការបន្ត ។បច្ចុប្បន្ន ជនសង្ស័យ រួមនឹងវត្ថុតាងគ្រឿងញៀនត្រូវបានកម្លាំងការិយាល័យជំនាញ កងរាជអាវុធហត្ថខេត្ត បញ្ជូនទៅសាលាដំបូងខេត្តបន្ទាយមានជ័យ នៅរសៀលថ្ងៃទី២១ ខែកញ្ញា ឆ្នាំ២០២១ ដើម្បីចាត់ការតាមនីតិវិធី៕
