ខេត្តបន្ទាយមានជ័យ៖នៅរសៀល ថ្ងៃទី២១ ខែកញ្ញា ឆ្នាំ២០២១ លោកឧត្តមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ បានអញ្ជើញចុះពិនិត្យមើលស្ថានភាពទឹកនៅក្នុងភូមិសាស្ត្រក្រុងប៉ោយប៉ែត និងតាមគោលដៅឈរជើងរបស់កម្លាំងនគរបាល រួមទាំងវរសេនាតូចការពារព្រំដែនគោកលេខ៨៩១ ដែលកំពុងរងការលិចលង់ជន់លិច ដោយសារជំនន់ទឹកភ្លៀង។
នាឱកាសនោះលោកឧត្តមសេនីយ៍ទោ សិទ្ធិ ឡោះ ក៏បានដាក់បទបញ្ជាដល់កម្លាំងទាំងអស់ ត្រូវត្រៀមលក្ខណៈទាំងសម្ភារៈ កងកម្លាំង ដើម្បីត្រៀមចុះជួយសង្គ្រោះប្រជាពលរដ្ឋ ក្នុងករណីកើតមានទឹកជំនន់ធ្ងន់ធ្ងរជាយថាហេតុណាមួយកើតឡើង ត្រូវមានវិធានការកាយបើកមុខទឹករំដោះទឹកភ្លៀងជន់លិចកន្លែងធ្វើការរបស់ខ្លួន និងបានឱ្យកម្លាំងទាំអស់មានការប្រុងប្រយ័ត្ន ទាំងសុខភាព ទាំងនៅកន្លែងធ្វើការ ទាំងពេលចុះបេសកកម្ម ជៀសវាងមាន សត្វផ្សេងៗ បង្កររបួសស្នាម ជាពិសេស ខ្សែរភ្លើងកន្លែងធ្វើការ ទោះបីនៅក្នុងស្ថានភាពបែបណាក៏ដោយ។
ក្នុងនោះលោកឧត្តមសេនីយ៍ទោ ស្នងការ ក៏បានអំពាវនាវដល់ប្រជាពលរដ្ឋ ដែលកំពុងរស់នៅតំបន់ប្រឈម នឹងទឹកជំនន់ខ្លាំង ត្រូវរាយការណ៍មកអាជ្ញាធរ ឬសមត្ថកិច្ចដែលនៅជិតខ្លួន ដើម្បីសមត្ថកិច្ចងាយក្នុងការចុះអន្តរាគមន៍បានទាន់ពេលវេលា។ពិសេសត្រូវបន្តអនុវត្តវិធានការរបស់សុខាភិបាល និងប្រមុខរាជរដ្ឋាភិបាលកម្ពុជា គឺ ៣កុំ និង ៣ការពារ ឲ្យបានខ្ជាប់ខ្ជួន ដើម្បីគេចផុតពីជំងឺកូវីដ១៩ ដ៏កាចសាហាវនេះ៕
