ខេត្តបន្ទាយមានជ័យ៖ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ អមដំណើរដោយអភិបាលក្រុងប៉ោយប៉ែត មេបញ្ជាការ មេបញ្ជាការរង ចំណុះឲ្យយោធភូមិភាគទី៥ ព្រមទាំងកងកម្លាំងសមត្ថកិច្ច អាជ្ញាធរមូលដ្ឋាន នៅព្រឹកថ្ងៃទី២១ ខែកញ្ញា ឆ្នាំ២០២១ បានចុះពិនិត្យមើលស្ថានភាពទឹក នៅក្នុងភូមិសាស្ត្រក្រុងប៉ោយប៉ែត ដើម្បីចាត់វិធានការកាយបើកមុខទឹករំដោះទឹកភ្លៀងជន់លិចផ្លូវ និងតំបន់ប្រជាពលរដ្ឋរស់នៅក្បែមាត់អូរព្រំដែនមួយចំនួន។
បន្ទាប់ពីដឹកនាំក្រុមការងារអញ្ជើញចុះពិនិត្យស្ថានភាពទឹក នៅក្នុងភូមិសាស្ត្រក្រុងប៉ោយប៉ែតរួចមកឯកឧត្តម អភិបាលខេត្តបន្ទាយមានជ័យ ក៏បាននាំយកអំណោយជាគ្រឿងឧបភោគបរិភោគ របស់សម្តេចតេជោ នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្តល់
ជូនដល់ប្រជាពលរដ្ឋ ដែលរងគ្រោះដោយសារទឹកជំនន់ទឹកភ្លៀងជន់លិចលំនៅដ្ឋាន ដែលត្រូវបានអាជ្ញាធរជួយជម្លៀសឲ្យមករកទីទួលសុវត្ថិភាព ប្រមាណ៧០គ្រួសារ ក្នុងមួយគ្រួសារទទួលបាន អង្ករ ទឹកស៊ីអ៊ីវ ទឹកត្រី និងទឹកបរិសុទ្ធផងដែរ។
ជាមួយគ្នានោះដែរឯកឧត្តមអភិបាលខេត្ត ក៏បានធ្វើការអំពាវនាវដល់បងប្អូនប្រជាពលរដ្ឋដែលរស់នៅជិតមាត់អូរតាមខ្សែបន្ទាត់ព្រំដែនកម្ពុជា ថៃ សូមមានការប្រុងប្រយ័ត្នខ្ពស់ ចំពោះកូនតូចៗ និងសត្វអសិរពិស ដែលអាចបង្កគ្រោះថ្នាក់ដល់អាយុជីវិត និងពិសេសកុំភ្លេចការពារខ្លួនឲ្យសោះនូវវិធានការរបស់ក្រសួងសុខាភិបាល និងប្រមុខរាជរដ្ឋាភិបាលកម្ពុជា គឺ ៣ការពារ និង៣កុំ ឲ្យបានខ្ជាប់ខ្ជួនបំផុត ដើម្បីចូលរួមកាត់ផ្តាច់ឲ្យបាននូវការចំលងជំងឺកូវីដ១៩ដ៏កាចសាហាវនេះ៕
