ខេត្តបន្ទាយមានជ័យ៖ផ្ទះសម្បែងប្រជាពលរដ្ឋ និងផ្លូវមួយចំនួន នៅក្នុងភូមិសាស្ត្រខេត្តបន្ទាយមានជ័យ ពិសេសក្រុងប៉ោយប៉ែតតែម្តង រងការជន់លិច បន្ទាប់ពីភ្លៀងធ្លាប់ពីថ្ងៃជាប់ៗគ្នា ចាប់ពីវេលាទាបភ្លឺ ថ្ងៃទី១៩ ខែកញ្ញា ឆ្នាំ២០២១មក។
ជាមួយនឹងការជន់លិចនេះដែរអាជ្ញាធរខេត្ត ក្រុង និងកងកម្លាំងចម្រុះទាំងបីស្ថាប័ន បានអញ្ជើញចុះទៅពិនិត្យលទ្ធភាពបញ្ជៀសទឹកចេញ និងជម្លៀសប្រជាពលរដ្ឋដែលទឹកជនលិចលំនៅដ្ឋានទៅកាន់ទីទួលសុវត្ថិភាព ពិសេសនៅតាមតំបន់ទំនាបតាមបន្ទាត់ព្រំដែនដែលប្រឈមហានីភ័យជាងគេ ក្នុងនោះអាជ្ញាធរ និងកងកម្លាំងទាំងអស់បានត្រៀមកម្លាំងអន្តរាគមន៍ មានមធ្យោបាយ សម្ភារៈ ព្រមទាំងកន្លែងទីទួលសុវត្ថិភាពរួចជាស្រាច ដើម្បីជួយសង្រ្គោះប្រជាពលរដ្ឋរស់នៅជិតមាត់អូរតាមព្រំដែន ក្នុងក្រុងប៉ោយប៉ែត ខេត្តបន្ទាយមានជ័យ។
សូមបញ្ជាក់ផងដែរថា ដោយសារទឹកភ្លៀងបានបន្តធ្លាក់ជាប់គ្នា បណ្តាលឲ្យទឹកអូរតាមព្រំដែនកម្ពុជា–ថៃ បានហក់ឡើងគួរឲ្យបារម្មណ៍។ទន្ទឹមនោះដែរអាជ្ញាធរបានអំពាវនាវដល់ពុកម៉ែបងប្អូនប្រជាពលរដ្ឋទាំងអស់ពិសេសអ្នកដែលរស់នៅជិតមាត់អូរ តាមខ្សែបន្ទាត់ព្រំដែនកម្ពុជា ថៃ សូមមានការប្រុងប្រយ័ត្នខ្ពស់ ចំពោះកូនតូចៗ និងសត្វអសិរពិស ដែលអាចបង្កគ្រោះថ្នាក់ដល់អាយុជីវិត។
គួររម្លឹកផងដែរថា កាលពីថ្ងៃទី១៨ ខែកញ្ញា ក្រសួងធនធានទឹក និងឧតុនិយម បានសេចក្តីប្រកាសបង្ហាញអំពីស្ថានភាពអាកាសធាតុ នៅកម្ពុជាបន្តទទួលរងនូវឥទ្ធិពលនៃជ្រលងសម្ពាធទាបឥណ្ឌា និងខ្យល់មូសុងនិរតីខ្សោយ ដែលធ្វើឲ្យភ្លៀងនៅតែបន្តមាន ក្នុងកម្រិតពីតិចទៅមធ្យម ចាប់ពីថ្ងៃទី២០ ដល់ថ្ងៃទី២៣ ខែកញ្ញា ឆ្នាំ២០២១ អាកាសធាតុមានការប្រែប្រួលខ្លាំង ដោយប្រពន្ធ័សម្ពាធទាបចាប់កើតសារជាថ្មី ភ្ជាប់ជាមួយនឹងសម្ពាធទាបសកម្ម ដែលបច្ចុប្បន្ននៅក្នុងសមុទ្រចិនខាងត្បូង នឹងអូសកាត់បញ្ឆិតកម្ពុជាផ្នែកខាងជើង ដែលអាចនឹងធ្វើឲ្យមានភ្លៀងធ្លាក់ ក្នុងកម្រិតពីមធ្យមទៅខ្លាំង។ទន្ទឹមនឹងនេះ នៅថ្ងៃទី២៤ ខែកញ្ញា ឆ្នាំ២០២១ នឹងអាចមានវិសម្ពាធមួយកើតឡើង នៅសមុទ្រចិនខាងត្បូង នឹងអាចបង្កើនឥទ្ធិពលរបស់ខ្លួនទៅជាកូនព្យុះទី១៥ នៅថ្ងៃទី២៥ ខែកញ្ញា ឆ្នាំ២០២១ ដោយធ្វើដំណើរឆ្ពោះមកប្រទេសវៀតណាម ដែលនឹងអាចមានឥទ្ធិពលគួរឲ្យកត់សំគាល់ នៅតំបន់ភាគឦសានរបស់កម្ពុជា។ដូច្នេះសូមឲ្យប្រជាពលរដ្ឋបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕
