ខេត្តបន្ទាយមានជ័យ៖ឃុំចំនួន៣ក្នុងស្រុកមង្គលបូរីរួមមាន៖ឃុំសឿ ,ឃុំចំណោម និងឃុំរហាត់ទឹក នៅថ្ងៃទី១៥ ខែកញ្ញា ឆ្នាំ២០២១ ទទួលរងគ្រោះដោយជំនន់ទឹកភ្លៀង បណ្តាលអោយប៉ះពាល់ដល់ជីវភាពការស់នៅប្រចាំថ្ងៃ និងខូចខាតផ្លូវគមនាគមន៍ មួយចំនួនផងដែរ។
សូមបញ្ជាក់ថា ក្នុងខេត្តបន្ទាយមានជ័យ តំបន់វាលទំនាបមួយចំនួន កំពុងរងគ្រោះដោយជំនន់ទឹកភ្លៀង បន្ទាប់ពីភ្លៀងធ្លាក់ជាប់ៗគ្នាប៉ុន្មានថ្ងៃមកនេះ ក្នុងនោះផងដែរអាជ្ញាធរមូលដ្ឋាន និងកងកម្លាំងចម្រុះ បានត្រៀមអន្តរាគមន៍ ចុះជួយសង្រ្គោះប្រជាពលរដ្ឋ ២៤ម៉ោង២៤ម៉ោង។
លោកឧត្តមសេនីយ៍ត្រី សឹង្ហ ទុំ មេបញ្ជាការ កងពលតូចថ្មើរជើងលេខ៥១ បានគូសបញ្ជាក់ថា កងកម្លាំងអន្តរាគមន៍ របស់កងពល បានត្រៀមលក្ខណះប្រុងប្រៀបរួចជាស្រេចក្នុងការជួយអន្តរាគមន៍សង្រ្គោះប្រជាពលរដ្ឋអោយបានទាន់ពេលវេលា តាមសំណូមពរអាជ្ញាធរមូលដ្ឋានមូលដ្ឋាន ដើម្បីសុខសុវត្ថិភាពប្រជាពលរដ្ឋ។
លោកឧត្តមសេនីយ៍ត្រី សឹង្ហ ទុំ បានបញ្ជាក់ដែរថា ទោះបីកម្លាំងមួយចំនួន កំពុងបំពេញប្រតិបត្តិការ នៅតាមបន្ទាត់ព្រំដែន និងចុះយុទ្ធនាការចាក់វ៉ាក់សាំងបង្ការ ជំងឺកូវីដ១៩ ដូសទី២ ជូនប្រជាពលរដ្ឋដែលនៅសេសសល់ ដើម្បីបិទបញ្ចប់យុទ្ធនាការក៏ដោយ ក៏កម្លាំងដែលត្រៀមអន្តរាគមន៍ក្នុងទីតាំង គឺបានត្រៀម២៤លើ២៤ម៉ោង គ្រប់បណ្តាគោលដៅឈរជើង សម្រាប់ជួយសង្រ្គោះ ប្រជាពលរដ្ឋរងគ្រោះដោយគ្រោះមហន្តរាយធម្មជាតិផ្សេងៗផងដែរ ដើម្បីឆ្លើយតបទៅនឹងសំណូមពរពីអាជ្ញាធរក្នុងមូលដ្ឋាន បានទាន់ពេលវេលា៕
