(ប៉ៃលិន)៖ នៅយប់ថ្ងៃទី៨ខែកញ្ញាឆ្នាំ២០២១នេះលោកជំទាវបានស្រីមុំអភិបាលខេត្តប៉ៃលិនបានដឹកនាំក្រុមការងារចុះពិនិត្យនិងជួយជម្លៀសពលរដ្ឋ ដែលកំពុងធ្វើចត្តាឡីស័កនៅបណ្ឌលចត្តាឡីស័កដែលកំពុងរងការលិចដោយសារជំនន់ទឹកភ្លៀង។
លោកជំទាវបានស្រីមុំ អភិបាលខេត្ត និងជាប្រធានគណៈកម្មាធិការ គ្រប់គ្រងគ្រោះមហន្តរាយខេត្ត បានដឹកនាំកម្លាំងចម្រុះ ចុះអន្តរាគមន៍ជម្លៀសពលករចេញទៅកាន់មណ្ឌលផ្សេង បានទាន់ពេលវេលា ដោយពុំគ្រោះថ្នាក់ដល់នរណាម្នាក់ឡើយ។
ជាមួយគ្នាលោកជំទាវអភិបាលខេត្តបានសរសេរនៅក្នុងផេកហ្វេសបុករបស់ខ្លួនថា (សុំទោសយប់មិញបងប្អូនទាក់ទងខ្ញុំមិនបាន សួរខ្ញុំទៅណា ? ចម្លើយ ខ្ញុំនៅទីនេះជាមួយពុកម៉ែបងប្អូនខ្ញុំ មិនថាយប់ ឬថ្ងៃ ទីជិត ឬ ឆ្ងាយ ខ្ញុំមិនអាច ទុកចោល បោះបង់ ពុកម៉ែបងប្អូនកូនក្មួយណាម្នាក់ កំពុងជួបការលំបាក ដោយមិនបានជួយសង្គ្រោះ នោះឡើយ 🙏 យើងត្រូវជួយគ្នាក្នុងគ្រាលំបាកបញ្ហាទាំងឡាយត្រូវបានដោះស្រាយភ្លាមៗ ដោយស្មារតី សហការ កំលាំងសាមគ្គីគ្នា)។
បញ្ជាក់នៅល្ងាចថ្ងៃទី៨ ខែកញ្ញា ២០២១ ចាប់ពីម៉ោង ៣៖៣០នាទី ដល់ម៉ោង ៦៖០០នាទី មានភ្លៀងធ្លាក់មួយមេយ៉ាងខ្លាំង បណ្តាលឱ្យទឹកជន់លិចមណ្ឌលចត្តាឡីស័ក ១កន្លែង ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ និងបានរំខានដល់ការ ស្នាក់នៅ របស់ពលករកំពុងធ្វើចត្តាឡីស័ក ចំនួនជិត២០០នាក់៕
