ព័ត៌មានជាតិសម្រាប់ ថ្ងៃពុធ ២ កើត ខែភទ្របទ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី៨ ខែកញ្ញា ឆ្នាំ២០២១
ខេត្តបន្ទាយមានជ័យ ៖ លោកឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ នឹងលោកលោកស្រី ឧត្តមសេនីយ៍ត្រីស្នងការរង នៅព្រឹកថ្ងៃអង្គារ ១ កើត ខែភទ្របទ ឆ្នាំឆ្លូវ ត្រីស័ក ពុទ្ធសករាជ ២៥៦៥ ដែលត្រូវនឹងថ្ងៃទី ៧ ខែកញ្ញា ឆ្នាំ២០២១បានប្រារពពិធីជួបសំណេះសំណាលជាមួយ និវត្តន៍ជនដែលជាអតីតស្នងការ ស្នងការរង ចំនួន០៦នាក់ ដែលធ្លាប់ជាអ្នកដឹកនាំកន្លងទៅ ដើម្បីជជែកអំពីការដឹកនាំ ទទួលការចែករំលែកចំណេះដឹងនិងបទពិសោធន៍ពីរអ្នកជំនាន់មុន ។
លោកឧត្តមសេនីយ៍ទោ សិទ្ធិ ឡោះ បានមានប្រសាសន៍ថា ពិធីនេះធ្វើឡើងក្នុងគោលបំណងផ្សាភ្ជាប់មនោសញ្ចេតនាទំនាក់ទំនងរវាងថ្នាក់ដឹកនាំជំនាន់មុននិងជំនាន់ក្រោយ បានជួបជជែកពិភាក្សាការងារនិងជាឱកាសទទួលបាននូវការរៀនសូត្រ ចំណេះ ជំនាញ យុទ្ធសាស្ត្រ និងបទពិសោធន៍ផ្សេងៗ ដើម្បីធ្វើយ៉ាងណាឲ្យការដឹកនាំក្នុងពេលបច្ចុប្បន្នមាននិរន្តរភាពនិងប្រកបទៅដោយភាពជោគជ័យ ។
ឆ្លើយតបជាមួយនិងការគោរពដឹងគុណនេះ លោកឧត្តមសេនីយ៍ស្នងការ ក៏បានជូននូវការដូរអនុស្សាវរីយ៍ ក្នុង១នាក់ទទួលបាន ទឹកភេសជ្ជៈទឹកត្រចៀកកាំមួយកន្ត្រក កន្សែងពោះគោ០១ អំណោយថវិការ ៣៦ ម៉ឺនរៀល និង១០០ដុល្លា ៕
