ប៉ៃលិន៖ នៅទីស្នាក់ការសាខាកាកបាទក្រហមកម្ពុជាខេត្តប៉ៃលិនឯកឧត្តម សៅ សារ៉ាត់ តំណាងដ៏ខ្ពង់ខ្ពស់របស់ លោកជំទាវ បាន ស្រីមុំ ប្រធាន គណៈកម្មាធិការសាខាកាកបាទក្រហមកម្ពុជាខេត្តប៉ៃលិន បានដឹកនាំកិច្ចប្រជុំជាមួយថ្នាក់ដឹកនាំសាខា អនុសាខា និងប្រធានមន្ទីរ អង្គភាពស្ថាប័នជុំវិញខេត្ត ដើម្បីកៀងគរមូលនិធិ សម្រាប់ទ្រទ្រង់ដល់វិស័យមនុស្សធម៌របស់សាខាឆ្នាំ២០២១។
ឯកឧត្តម សៅ សារ៉ាត់ អនុប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិន បាននាំមកនូវប្រសាសន៍បណ្តាំផ្ញើពីសំណាក់ឯកឧត្តម អ៊ី ឈាន ប្រធានកិត្តិយសសាខា និងលោកជំទាវ បាន ស្រីមុំ ប្រធានគណៈកម្មាធិការសាខា ថ្លែងអំណរគុណ និងកោតសរសើចំពោះថ្នាក់ដឹកនាំសាខា អនុសាខា គ្រប់ជាន់ថ្នាក់ និងសប្បុរសជន ព្រមទាំងប្អូនៗក្មួយៗ យុវជនកាកបាទក្រហមកម្ពុជាខេត្តប៉ៃលិន ដែលកន្លងមកបានចូលរួមយ៉ាងសកម្មជាមួយសាខា ទាំងពេលវេលា និងធនធានផ្សេងៗ ជាពិសេសក្នុងយុទ្ធនាការប្រយុទ្ធប្រឆាំងនឹងការចម្លងរីករាលដាលនៃជម្ងឺកូវីដ-១៩។
ឯកឧត្តមអនុប្រធាន បានមានប្រសាសន៍លើកឡើងថា៖ បើទោះបីឆ្នាំនេះ មិនមានការរៀបចំមេទ្ទីងអប់អរសាទរ ខួបលើកទី១៥៨ ទិវាពិភពលោក កាកបាទក្រហម អឌ្ឍចន្ទក្រហម ០៨ ឧសភា ដោយសារស្ថានការណ៍ជម្ងឺកូវីដ-១៩ ក៍ដោយ ក៍សាខាកាកបាទក្រហមកម្ពុជាខេត្តប៉ៃលិន នៅតែបន្តគៀងគរមូលនីធី សម្រាប់ទ្រទ្រង់ដល់សាខា ដើម្បីបម្រើដល់បេសកកម្មមនុស្សធម៌ ក្នុងការឆ្លើយតបបានទាន់ពេលវេលា ចំពោះ ជនរងគ្រោះ និងជនងាយរងគ្រោះ ព្រមទាំងបានផ្តល់ជាសម្ភារៈ គ្រឿងឧបភោគបរិភោគ និងថវិកាមួយចំនួន ដល់ប្រជាពលរដ្ឋដែលរងគ្រោះដោយឧបទ្ទេវហេតុផ្សេងៗដូចជា៖ ខ្យល់កន្ត្រាក់ គ្រោះរាំងស្ងួត ទឹកជំនន់ គ្រោះអគ្គីភ័យ គ្រោះថ្នាក់ចរាចរណ៍ ពលរដ្ឋមានជីវភាពខ្វះខាត គ្រួសារជនពិកា កុមារកំព្រា អ្នករស់នៅជាមួយមេរោគអេដស៍ ចាស់ជរាគ្មានទីពឹង និងគ្រួសារសពខ្វះខាត ជាដើម។
នៅក្នុងឱកាសនោះផងដែរ ឯកឧត្តម សៅ សារ៉ាត់ ក៍បានអំពាវនាវដល់សប្បុរសជននៅគ្រប់មជ្ឍដ្ឋាន ទាំងវិស័យឯកជន និងស្ថាប័នរដ្ឋ សូមបន្តគាំបន្តគាំទ្រដល់វិស័យមនុស្សធម៌នៅក្នុងខេត្តប៉ៃលិន ហើយកាយវិកាដ៏មនុស្សធម៌នេះ គឺជាការចូលរួមជាមួយសកម្មភាពមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដើម្បីជួយដល់បងប្អូនប្រជាពលរដ្ឋ ដែលជាជនរងគ្រោះ និងជនងាយរងគ្រោះដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាអន្តរជាតិកាកបាទក្រហម អឌ្ឍចន្ទក្រហម ។
សូមបញ្ជាក់ថា៖ នៅក្នុងកិច្ចប្រជុំ បានធ្វើការផ្សព្វផ្សាយលិខិតលេខ ០២១/២១ កក្រក.ប.ល ចុះថ្ងៃទី៣០ ខែមីនា ឆ្នាំ២០២១ របស់កាកបាទក្រហមកម្ពុជា ស្ដីពីការកៀរងគររកមូលនិធិតាមបណ្ដាសាខា ក្នុងឱកាសអបអរសាទរ ខួបលើកទី១៥៨ ទិវាពិភពលោក កាកបាទក្រហម អឌ្ឍចន្ទក្រហម ០៨ឧសភា ក្រោម ប្រធានបទ «ទាំងអស់គ្នាជាមួយកាកបាទក្រហមកម្ពុជា ប្រយុទ្ធប្រឆាំងជាមួយជម្ងឺកូវីដ១៩ និងកសាងភាពអត់ធន់របស់សង្គមជាតិ» ព្រមទាំងបង្កើតគណៈកម្មការរៀបចំការគៀងគររកមូលនិធិ និងអំណោយមនុស្សធម៌ មានភារកិច្ចដូចជា៖
១.រៀបចំធ្វើសេចក្តីអំពាវនាវ បណ្ដាខ្លឹមសារពាក់ព័ន្ធទិវា និងបែងចែកទៅតាមគោលដៅ។
២.រៀបចំរូបថតផ្សព្វផ្សាយ ពីសកម្មភាពមនុស្សធម៌នៅកន្លែងទទួលអំណោយ។ ៣.ផ្សព្វផ្សាយបញ្ជ្រាបការយល់ដឹងតាមប្រព័ន្ធព័ត៌មាន អំពីសារៈសំខាន់ទិវា ០៨ ឧសភា។ ៤.រៀបចំលិខិតថ្លែងអំណរគុណជូនសប្បុរសជន។ ៥.រាយការណ៍សុំយោបល់គណៈកម្មការកណ្ដាលករណីចាំបាច់។ និង ៦.បូកសរុបលទ្ធផលកៀរងគររកមូលនិធិប្រចាំថ្ងៃនិងវគ្គបញ្ចប់ ជូនថ្នាក់ដឹកនាំផងដែរ។
