រាជធានីភ្នំពេញ នៅរសៀលថ្ងៃសៅរ៍ ២រោច ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី៣០ ខែមករា ឆ្នាំ២០២១ លោក ណុប ដារ៉ា អភិបាលរង នៃគណ:អភិបាលខេត្ត តំណាងដ៏ខ្ពង់ខ្ពស់ឯកឧត្តម ងួន រតន: អភិបាល នៃគណ:អភិបាលខេត្ត បានអញ្ជើញចុះសួរសុខទុក្ខ និងផ្តល់កម្លាំងចិត្តដល់កីឡាករទូកខេត្តបាត់ដំបង ដែលកំពុងប្រកួតកីឡាទូកប្រពៃណីខ្នាតអន្តរជាតិទូកនាគ ទូកកានូ កាយ៉ាក់ និងទូករ៉ូអ៉ីង ពានរង្វាន់សម្តេចក្រឡាហោម ស ខេង លើកទី០៧ ឆ្នាំ២០២១ ស្ថិតនៅសួនច្បារមាត់ទន្លេរក្រុងតាខ្មៅ ខេត្តកណ្តាល។
លោក ណុប ដារ៉ា បានពាំនាំនូវការផ្តាំផ្ញើការសួរសុខទុក្ខរបស់ឯកឧត្តម ងួន រតន: ពីចម្ងាយ និងផ្តល់ថវិការមួយចំនួនដល់កីឡាករទូក សម្រាប់ប្រើប្រាស់ក្នុងកំឡុងពេលប្រកួតផងដែរ។ ទន្ទឹមនោះដែរ លោក ណុប ដារ៉ា ក៏បានផ្តល់នូវគោលការណ៍មួយចំនួន និងការលើកទឹកចិត្តដល់កីឡាករ ដើម្បីដណ្តើមយកជ័យលាភីជូនខេត្តបាត់ដំបងទាំងមូលឱ្យបានក្នុងព្រឹត្តិការណ៍កីឡានេះផងដែរ។
សូមរំលឹកផងដែរថា ព្រឹត្តិការណ៍ប្រកួតកីឡាទូកប្រពៃណីខ្នាតអន្តរជាតិទូកនាគ ទូកកានូ កាយ៉ាក់ និងទូករ៉ូអ៉ីង ពានរង្វាន់សម្តេចក្រឡាហោម ស ខេង លើកទី០៧ ឆ្នាំ២០២១ ដែលប្រព្រឹត្តិចាប់ពីថ្ងៃទី២៩ រហូតដល់ថ្ងៃទី៣១ ខែមករា ឆ្នាំ២០២១ នៅសួនច្បារមាត់ទន្លេរក្រុងតាខ្មៅ ខេត្តកណ្តាល ដោយមានការចូលរួមពីបណ្តាខេត្ត-ក្រុង ចំនួន ១៧ ក្នុងព្រះរាជាណាចក្រកម្ពុជា។
