(ភ្នំពេញ) ÷ នៅព្រឹកថ្ងៃទី២៩ ខែធ្នូ ឆ្នាំ២០២០ សម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជាបានលើកឡើងថា ដោយសារកត្តាសន្តិភាពដែលកើតចេញពីនយោបាយឈ្នះឈ្នះ បាននិងកំពុងនាំមកនូវសមិទ្ធផលនានា និងសមិទ្ធផលថ្មីលើកដំបូងគឺតំណក់ប្រេងលើកដំបូងនៅលើទឹកដីកម្ពុជាអង្គរនៃយើង។ សម្ដេចតេជោបានថ្លែងដូចនេះ ក្នុងឱកាសថ្លែងសារពិសេសមួយចេញពីគេហដ្ឋាននាក្រុងតាខ្មៅដោយមានការផ្សាយផ្ទាល់តាមទូរទស្សន៍ជាតិ និងផ្សាយបន្តផ្ទាល់ដោយប្រព័ន្ធផ្សព្វផ្សាយនៅក្នុងប្រទេសកម្ពុជាផងដែរ។
សម្ដេចតេជោនាយករដ្ឋមន្ដ្រី ហ៊ុន សែន បានគូសបញ្ជាក់ថា ការប្រកាសពីតំណក់ប្រេងលើកដំបូងនេះ គឺគាប់ជួននឹងខួប២២ឆ្នាំនៃនយោបាយឈ្នះឈ្នះដែលបញ្ចប់សង្គ្រាមទាំងស្រុងនៅកម្ពុជា។ សម្ដេចតេជោបានបន្តថា បើគ្មាននយោបាយឈ្នះឈ្នះទេ ក៏គ្មានសន្តិភាព និងការបញ្ចប់សង្គ្រាម ក៏គ្មានតំណក់ប្រេងលើកដំបូងដែរ។
សម្ដេចតេជោនាយករដ្ឋមន្ដ្រី ហ៊ុន សែន បានគូសបញ្ជាក់ថា ក្នុងនាមជាស្ថាបនិកនៃនយោបាយឈ្នះឈ្នះ លោកមានមោទនភាពខ្លាំងណាស់ចំពោះការចូលរួមទាំងឡាយពីប្រតិបត្តិករនយោបាយឈ្នះឈ្នះទាំងអស់ដើម្បីបញ្ចប់សង្គ្រាមដែលអ្នកមុនបានបន្សល់ទុក ក្នុងនាមយើងជាខ្មែរដូចគ្នា ដែលជាអ្វីដែលកូនខ្មែរត្រូវតែធ្វើ៕
