(ខេត្តកំពត)៖ មន្ត្រីនៃការិល័យកសិកម្មស្រុកកំពង់ត្រាចម្នាក់ បានចងកធ្វើអត្តឃាតដោយមិនដឹងមូលហេតុ ដោយហេតុការណ៍នេះបានកើតឡើងខណៈប្រពន្ធកូនមិននៅផ្ទះ។
តាមការរៀបរាប់ពីសំណាក់ក្រុមគ្រួសារនៃសព បានបញ្ជាក់ថា ជនរងគ្រោះ ឈ្មោះ ម៉េង សារិន (ហៅអាចារ្យដែន) ភេទប្រុស អាយុ៥៨ឆ្នាំ មានទីលំនៅភូមិបឹងធំខាងកើត ឃុំអង្គសុរភី ស្រុកកំពង់ត្រាច ខេត្តកំពត។ ហើយបើតាមការអះអាងពីក្រុមគ្រួសារនិយាយថា ករណីចងកសម្លាប់ខ្លួននេះអាចកើតឡើងនៅព្រឹកថ្ងៃទី២៤ ខែធ្នូ ឆ្នាំ២០២០ ដោយសារពេលនោះប្រពន្ធកូន មិននៅផ្ទះ។លុះវេលាម៉ោងជាង១២ថ្ងៃត្រង់ ខែឆ្នាំដដែល ពេលក្រុមគ្រួសារដើរទៅរោងបាយក្រោយផ្ទះ ក៏ឃើញជនរងគ្រោះចងកសម្លាប់ខ្លួនស្លាប់បាត់ទៅហើយ ទើបបង្កការភ្ញាក់ផ្អើលតែម្តង។
ក្រុមគ្រួសារបានបញ្ជាក់ទៀតថា ការធ្វើអត្តឃាតនេះ ប្រពន្ធកូនមិនដឹងមូលហេតុថាគាត់មានវិបត្តិអ្វីឲ្យប្រាកដនោះទេ ព្រោះកន្លងមកជនរងគ្រោះមិនបានបញ្ចេញកាយវិកាណាមួយឲ្យក្រុមគ្រួសារសង្ស័យពីរឿងរ៉ាវផ្សេងៗឡើយ។
ក្រោយពីមានករណីចងកធ្វើអត្តឃាត សមត្ថកិច្ចជំនាញបានចុះមកត្រួតពិនិត្យ ធ្វើកោសល្យវិច័យខ្លាចមានពាក់ព័ន្ធអំពើឃាតកម្ម ប៉ុន្តែក្រោយពិនិត្យជំនាញបានបញ្ជាក់ថា ជនរងគ្រោះពិតជាចងកធ្វើអត្តឃាតសម្លាប់ខ្លួនឯងប្រាកដមែន ទើបប្រគល់សពជូនក្រុមគ្រួសារដម្បីចាត់ចែងធ្វើបុណ្យតាមប្រពៃណី៕ សេង ណារិទ្ធ
