(ស្វាយរៀង) ៖ ព្រឹកថ្ងៃទី២១ ខែធ្នូ ឆ្នាំ២០២០ ក្រោមអធិបតីភាពឯកឧត្តម លី ធុជប្រធានក្រុមការងារវការងារចុះជួយស្រុករំដួលបានអញ្ជើញជាអធិបតី ក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២០ និងលើកទិសដៅ២០២១ របស់ក្រុមការងាររាជរដ្ឋាភិបាលចុះមូលដ្ឋានស្រុករំដួល និងមានការអញ្ជើញចូលរួមឯកឧត្តមអភិបាលរងខេត្ត ប្រធាន/អនុក្រុមការងារ រាជរដ្ឋាភិបាល ចុះមូលដ្ឋានតាមឃុំទាំង១០តំណាងមន្ទីរអង្គភាពជុំវិញខេត្តក្រុមប្រឹក្សាស្រុករំដួលគណៈអភិបាលស្រុកកងកម្លាំងប្រដាប់អាវុធស្រុកតំណាងការិយាល័យជុំវិញស្រុកក្រុមប្រឹក្សាឃុំនិងស្មៀនឃុំ។
ឯកឧត្តម លី ធុជ បានអបអរសាទរនិងវាយតម្លៃខ្ពស់ចំពោះកិច្ចខិតខំប្រឹងប្រែងនិងលទ្ធផលទទួលបានរបស់ក្រុមការងារទទួលបន្ទុកតាមឃុំទាំង១០ព្រមទាំងបានជម្រុញក្រុមការងារទាំងអស់ត្រូវបន្តយកចិត្តទុកដាក់ខ្ពស់ក្នុងការដោះស្រាយរាល់សំណូមពរនិងកង្វល់របស់ប្រជាពលរដ្ឋមូលដ្ឋានដោយសហការជាមួយរដ្ឋបាលខេត្តមន្ទីរ/អង្គភាពជុំវិញខេត្តនិងរដ្ឋបាលស្រុករំដួលជាពិសេសបានជម្រុញឲ្យអាជ្ញាធរមូលដ្ឋានបង្កើនការបម្រើសេវាសាធារណៈជូនប្រជាពលរដ្ឋអោយទាន់ពេលវេលានិងមានប្រសិទ្ធភាពខ្ពស់។
រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោនាយករដ្ឋមន្ត្រីតែងតែកោតសរសើរនិងវាយតម្លៃខ្ពស់ចំពោះក្រុមការងារដែលបានយកចិត្តទុកដាក់និងចុះមូលដ្ឋានផ្ទាល់និងជាប្រចាំដេីម្បីចូលរួមដោះស្រាយកង្វល់សំណើនិងសំណូមពររបស់អាជ្ញាធរមូលដ្ឋាននិងប្រជាពលរដ្ឋមូលដ្ឋានតាមរយៈយន្តការរបស់រាជរដ្ឋាភិបាលកម្ពុជាក្នុងគោលដៅផ្តល់នៅសុខដុមរមនានិងសុភមង្គលដល់សង្គមជាតិនិងប្រជាពលរដ្ឋទាំងមូល។
ជាមួយគ្នានេះផងដែរឯកឧត្ដមបានជម្រុញឲ្យមន្ទីរអង្គភាពពាក់ព័ន្ធបន្តឆ្លើយតបបំភ្លឺនិងដោះស្រាយរាល់កង្វល់និងសំណូមពររបស់ប្រជាពលរដ្ឋអោយបានសមស្របដោយបានស្នើឲ្យមន្ទីរអង្គភាពយកសំណើសុំទាំងនោះដាក់បញ្ចូលក្នុងផែនការអាទិភាពរបស់ខ្លួន។ក្នុងឆ្នាំ២០២០ក្រុមការងាររាជរដ្ឋាភិបាលចុះមូលដ្ឋានស្រុករំដួលបានរៀបចំវេទិកាសាធារណៈចំនួន៦១លេីកនិងមានអ្នកចូលរួមប្រមាណជាង១៦០០នាក់៕
