(ខេត្តកំពត)៖ លោក កែម មុនីវណ្ណ ប្រជាពលរដ្ឋរស់នៅភូមិអណ្តូងខ្មែរ សង្កាត់អណ្តូងខ្មែរ ក្រុង/ខេត្តកំពត បានធ្វើពាក្យបណ្តឹងទៅសាលាដំបូងខេត្តកំពត ដោយប្តឹងឈ្មោះ សែម សឿន , លោក ឈុន សាវឿន ,លោក ជឹម វុទ្ធី និងបក្ខពួក ក្រោមការចោទប្រកាន់ថា បានប្រើអំណាចមករំលោភយកដីធ្លីរបស់លោក ដែលកំពុងកាន់កាប់អាស្រ័យផលនាពេលសព្វថ្ងៃនេះ។
ការដាក់ពាក្យបណ្តឹងនេះ ធ្វើឡើងបន្ទាប់ពីលោក សែម សឿន ដែលមានតួនាទីជាមេបញ្ជាការរងអាវុធហត្ថខេត្តកំពត និងបក្ខពួកជាច្រើននាក់ បាននាំគ្នាទៅកាប់ និងដុតបំផ្លាញដំណាំ ព្រមទាំងយកបង្គោលថ្មទៅព័ទ្ធរបងយកដីរបស់ខ្លួន។
នៅក្នុងពាក្យបណ្តឹងរបស់លោក កែម មុនីវណ្ណ ដែលប្តឹងទៅសាលាដំបូងខេត្តកំពត កាលពីថ្ងៃទី១៣ ខែធ្នូ ឆ្នាំ២០២០ បានរៀបរាប់ថា “ឈ្មោះ សែម សឿន, ឈុន សារឿន, ជឹម វុទ្ធី និងបក្ខពួក” ដែលបានប្រើអំណាចរំលោភបំពានដីរបស់ខ្ញុំបាទ គឺស្ថិតនៅភូមិកែបថ្មី ឃុំបឹងទូក ស្រុកទឹកឈូ ខេត្តកំពត។
ក្នុងបណ្តឹងដដែលបានបញ្ជាក់បន្ថែមថា កាលពីថ្ងៃទី ០៩-១០ ខែធ្នូ ឆ្នាំ២០២០ ឈ្មោះ សែម សឿន មេបញ្ជាការរងអាវុធហត្ថខេត្តកំពត បានបញ្ជាឲ្យកម្មករចំនួន០៤នាក់ ទៅកាប់បំផ្លាញផលដំណាំនៅលើទីតាំងដីរបស់លោក (ដីនេះមានឯកសារបញ្ជាក់ត្រឹមត្រូវ) ដោយពេលនោះ ទោះបីលោក(កែម មុនីវណ្ណ) ខំប្រឹងរារាំងសុំឲ្យផ្អាកសកម្មភាពយ៉ាងណាក្តី ក៏ឈ្មោះនេះមិនព្រមស្តាប់ ដោយអាងអំណាចរំលោភបំពានមកលើខ្លួនដែលជាម្ចាស់ដីស្របច្បាប់ពិតប្រាកដទៅវិញ។
ទោះជាយ៉ាងណាក៏ដោយ លោក សែម សឿន មេបញ្ជាការរងអាវុធហត្ថខេត្តកំពតបានបកស្រាយថា ក្នុងនាមលោកជាមន្ត្រីកងកម្លាំងម្នាក់ លោកមិនបានប្រើអំណាចទៅវាទយកដីរបស់ពលរដ្ឋនោះទេ។ចំពោះដីដែលលោកឲ្យគេកាប់ឆ្ការនេះ គឺជាដីដែលលោកបានទិញពីប្រជាពលរដ្ឋកាលពីឆ្នាំ២០០៨ ហើយដីនេះលោកបានលក់ទៅឲ្យអ្នកផ្សេងតាំងពីឆ្នាំ២០១៤មកម្លេះ ដូច្នេះលោកគ្មានពាក់ព័ន្ធអ្វីទៀតឡើយ។
សូមរម្លឹកថា នៅថ្ងៃទី១៣ ខែកុម្ភ: ឆ្នាំ២០២០ ឈ្មោះ កែម មុនីវណ្ណ ជាម្ចាស់ដីទំហំ៤ហិកតា(៤០០០០ ម៉ែត្រការ៉េ) បានដាក់ពាក្យទៅរដ្ឋបាលខេត្តកំពត ដើម្បីស្នើសុំវាស់វែវ និងចេញប័ណ្ណកម្មសិទ្ធិនៅលើទីតាំងដីរបស់ខ្លួន ហើយរដ្ឋបាលខេត្តក៏បានចេញសេចក្តីជូនដំណឹងទៅមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ពិនិត្យនិងរាយការណ៍ តាមរយៈលិខិតលេខ ៤៣៤/២០ ចុះថ្ងៃទី០៧ ខែសីហា ឆ្នាំ២០២០។
សរុបមកវិញ ក្នុងសាលាកបត្រព័ត៌មានមួយដែលទទួលស្គាល់ពីមេឃុំបឹងទូក ស្រុកទឹកឈូ ខេត្តកំពត បានបង្ហាញថា ឈ្មោះ កែម មុនីវណ្ណ ពិតជាមានដីធ្លីនៅទីតាំងខាងលើទំហំ៤០០០០ ម៉ែត្រការ៉េ ដែលគាត់បានកាន់កាប់អាស្រ័យផល តាំងពីឆ្នាំ១៩៩៣ ដែលជាអំណោយដីរដ្ឋ ជាប្រភេទដីកសិកម្មពិតប្រាកដមែន។
ជុំវិញរឿងរ៉ាវដដែលនេះ នៅរសៀលថ្ងៃទី១៥ ខែធ្នូ ឆ្នាំ២០២០ លោក កែម មុនីវណ្ណ ក៏បានធ្វើពាក្យបណ្តឹងរក្សាការពារមួយច្បាប់ទៀត ដាក់ជូនលោកប្រធានសាលាដំបូងខេត្តកំពត ដើម្បីជួយចាត់វិធានការ៕ សេង ណារិទ្ធ
