ខេត្តប៉ៃលិន ៖ ប្រជាពលរដ្ឋជាង១០០នាក់ ក្រោយពីលើកគ្នាទៅតវ៉ានៅមុខបរិវេណសាលាខេត្តប៉ៃលិន ដើម្បីសុំកិច្ចអន្តរាគមន៍ពីលោកអភិបាលខេត្ត ផាន់ ចាន់ធុល ព្រោះមានការភ័យខ្លាច បន្ទាប់ពីឃើញដីការបស់លោក គឹម ម៉េង ចៅក្រមស៊ើងសួរ នៃសាលាដំបូងខេត្តប៉ៃលិន បានបង្គាប់ឱ្យប្រជាពល រដ្ឋ៦ទៅ៧នាក់ ចូលខ្លួននៅរសៀលថ្ងៃទី១៦ ខែធ្នូ ឆ្នាំ២០២០ ដោយចោទប្រកាន់ពួកគាត់ ពីបទប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត ។ ប្រព្រឹត្តនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន កាលពីអំឡុងឆ្នាំ២០១០-២០១៦ ថាជាបទល្មើស ដែលមានចែងឱ្យផ្តន្ទាទោ សតាមបញ្ញត្តិមាត្រា២៥៣នៃច្បាប់ភូមិបាល ។ ទើបរហូតមកដល់វេលាម៉ោង៨ និង៣០នាទីព្រឹកថ្ងៃទី១៦ ខែធ្នូ ឆ្នាំ២០២០នេះ ប្រជាពលរដ្ឋទាំងនោះ បានលើកគ្នាទៅតវ៉ានៅមុខសាលាដំបូងខេត្តប៉ៃលិន សុំឱ្យតុលាការលើកចោលនូវការចោទប្រកាន់ បន្ទាប់ពីពួកគេបានទៅរស់នៅលើដីខាងល់អស់រយ:ពេលជាង២០ឆ្នាំ ។
បើតាមការរៀបរាប់ពីប្រជាពលរដ្ឋម្នាក់ឈ្មោះ ម៉ៅ ឃីម ភេទស្រី អាយុ៦៥ឆ្នាំ ឈ្មោះ សៀម សំអាន ភេទស្រី អាយុ៤៧ឆ្នាំ និងឈ្មោះ ឡេង គឹមអាន ភេទស្រី អាយុ៥០ឆ្នាំ បានរៀបរាប់ឱ្យដឹងដូចៗ គ្នាថា ៖ ពួកគាត់ពិតជាបាននាំគ្នាទៅរស់នៅលើដីខាងលើ អស់រយ:ពេលជាង២០ឆ្នាំមកហើយ តាំងពីមិនទាន់មានមនុស្សរស់នៅទីនោះច្រើនម្លេះ ។
ប្រភពបន្តទៀតថា តែអាជ្ញាធរខេត្ត មិនបានរៀបចំធ្វើប្លង់កម្មសិទ្ធិកាន់កាប់ដីធ្លីទាំងនោះឱ្យពួកគាត់នោះទេ ពោលគឺរហូតមកដល់សព្វថ្ងៃនេះ ហើយក៏នាំគ្នាបន្តរស់នៅ មកដល់សព្វថ្ងៃតែម្តង ។ ប៉ុន្តែ បន្ទាប់ពីទទួលបានដីកាបង្គាប់ឱ្យចូលខ្លួនពីលោក គឹម ម៉េង ចៅ ក្រមស៊ើងសួរនៃសាលាដំបូងខេត្តប៉ៃលិន ដោយចោទពួកគាត់ពីបទប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត ទើបធ្វើឱ្យម្នាក់ៗ ពិតជាមានការភិតភ័យយ៉ាងខ្លាំង ។ បន្ទាប់ពីពួកគាត់បាននាំធ្វើដំណើរទៅតវ៉ានៅសាលាខេត្តប៉ៃលិនកាលពីព្រឹកថ្ងៃទី១៥ ខែធ្នូ ឆ្នាំ២០២០ ដើម្បីឱ្យលោកអភិបាលខេត្តប៉ៃលិនរួចហើយ ពួកគាត់ក៏លើកគ្នាទៅតវ៉ានៅសាលាដំបូងខេត្ត ដើម្បីសុំឱ្យតុលាការឈប់ចោទប្រកាន់ទៅលើពួកគាត់បែបនេះបន្តទៀត ។
ពួកគាត់បញ្ជាក់ថា មិនបានប្រើអំពើហិង្សាទៅលើម្ចាស់អច លនវត្ថុណាម្នាក់នោះឡើយ ព្រោះពួកគាត់អត់ស្គាល់ម្ចាស់ដីខាងលើនោះទេ ដោយរស់នៅរាល់ថ្ងៃនេះ សុំតែសេចក្តីសុខប៉ុណ្ណោះ ។
សូមបញ្ជាក់ថា ប្រជាពលរដ្ឋទាំងអស់ ក៏បានសំណូមពរដល់ថ្នាក់ដឹកនាំគ្រប់លំដាប់ថ្នាក់ ជាពិសេស រដ្ឋបាលខេត្តប៉ៃលិន ឱ្យជួយអន្តរាគមន៍ ខណ:រសៀលថ្ងៃដដែលនេះ នឹងចូលជួបតុលាការខេត្តប៉ៃលិន ដើម្បីធ្វើការបំភ្លឺ ។
គួររំលឹកថា ៖ ដីនៅចំណុចខាងលើ កាលពីប៉ុន្មានឆ្នាំមុននេះ ខាងអាជ្ញាធរខេត្ត ធ្លាប់ធ្វើការសម្របសម្រួល៣ដងមកហើយ ដោយសុំដោះស្រាយគោលនយោបាយ ឱ្យពួកគាត់ចាកចេញពីដីនេះ ។
ប្រជាពលរដ្ឋខ្លះ យល់ព្រមទៅរស់នៅលើដីថ្មី ដែលគេរៀបចំចែកឱ្យនៅកន្លែងភូមិ និងមានផ្សារនៅទីនោះដែរ តែអ្នកខ្លះមិនយល់ព្រមទៅទេ នៅក្រាញននៀលចង់បានដីកន្លែងចាស់ដដែល ។ ចំណែកអ្នកខ្លះទៀត បានទៅរស់នៅលើដីថ្មីហើយ បែរជារត់មករស់នៅកន្លែងដីចាស់ដដែលវិញ ធ្វើឱ្យលំបាកក្នុងកា រដោះស្រាយតែម្តង ៕
