ខេត្តប៉ៃលិន ៖នៅរសៀលថ្ងៃទី១៥ ខែធ្នូ ឆ្នាំ២០២០នេះ នៅការិយាល័យ ស.ស.យ.ក ខេត្តប៉ៃលិន លោកជំទាវបណ្ឌិត បាន ស្រីមុំ ប្រធានសហភាពសហព័ន្ធយុវជនកម្ពុជាខេត្តប៉ៃលិន បានអញ្ជើញដឹកនាំក្រុមការងារ ស.ស.យ.ក.ខេត្ត និងមូលដ្ឋាន ឃុំ-សង្កាត់ទាំង៨ ចូលរួមប្រជុំតាមប្រព័ន្ធវីដេអូ ជាមួយគណ:កម្មាធិការ ស.ស.យ.ក. រាជធានី ខេត្ត ស្តីពី ” បច្ចុប្បន្នភាពការអនុវត្តយុទ្ធនាការបញ្ជ្រៀបការយល់ដឹងពីគ្រោះថ្នាក់នៃជំងឺកូវីដ១៩ ដល់ប្រជាពលរដ្ឋកម្ពុជា ” របស់ សហភាពសហព័ន្ធយុវជនកម្ពុជា ដើម្បីពិនិត្យវឌ្ឍនភាពនៃយុទ្ធនាការដែលបានអនុវត្តកន្លងមក និងរកវិធីដាក់ផែនការអនុវត្តបន្ត ចូលរួមជាមួយរាជរដ្ឋាភិបាលក្នុងការបង្ការទប់ស្កាត់ការរីករាលដាលនៃជំងឺកូវីដ១៩ ក្រោមអធិបតីភាពឯកឧត្តម ហ៊ុន ម៉ានី ប្រធានស.ស.យ.ក ។
ប្រភពព័ត៌មានបានឱ្យដឹងថា ៖ ក្នុងកិច្ចប្រជុំនោះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានសង្កត់ធ្ងន់ទៅលើព្រឹត្តិការណ៍ថ្ងៃទី២៨ វិច្ឆិកា ដែលជម្ងឺកូវិដ.១៩ ចូលក្នុងសហគមន៍យើង ហើយកន្លងមកក្រុមការងារស.ស.យ.ក តាមបណ្តារាជធានី ខេត្តក៍បានចូលរួមយ៉ាងសកម្មជាមួយរាជរដ្ឋាភិបាល ក្នុងការចុះចែកសម្ភារ:បរិក្ខាពេទ្យ ដូចជាម៉ាស ទឹកអាល់កុលឬជែល ជាពិសេសគឺបានចុះផ្សព្វផ្សាយពីវិធានការ ការពារនូវជម្ងឺកូវិដ១៩ជូនដល់ពលរដ្ឋក្នុងមូលដ្ឋានរបស់ខ្លួន ។
ប្រភពបន្តថា ឯកឧត្តមប្រធាន ក៍បានលើកទឹកចិត្តឲ្យក្រុមការងារយុវជន ស.ស.យ.ក ទាំងអស់លើកកម្ពស់ការចូលរួមការងារមនុស្សធម៌ និងការងារជួយសង្គម ដើម្បីសុខមាលភាពរបស់ប្រជាជនទូទាំងប្រទេស ៕
