ខេត្តប៉ៃលិន ៖ ប្រជាពលរដ្ឋជិត១០០នាក់ បានប្រមូលផ្តុំគ្នានៅមុខសាលាខេត្តប៉ៃលិន កាលពីវេលាម៉ោង៨ និង៣០នាទីព្រឹកថ្ងៃទី១៤ ខែធ្នូ ឆ្នាំ២០២០ ដើម្បីសុំកិច្ចអន្តរាគមន៍ពីឯកឧត្តម ផាន់ ចាន់ធុល អភិបាលខេត្ត ដោយសារមានការភ័យខ្លាច ចំពោះសុវត្ថិភាពផ្ទាល់ខ្លួន បន្ទាប់ពីឃើញដីកាលោក គឹម ម៉េង ចៅក្រមស៊ើងសួរ នៃសាលាដំបូងខេត្តប៉ៃលិន បានចេញដីកាបង្គាប់ឱ្យចូលខ្លួននៅថ្ងៃទី១៦ ខែធ្នូ ឆ្នាំ២០២០ ខាងមុខនេះ ដោយចោទប្រកាន់ពួកគាត់មួយចំនួន ពីបទប្រើអំពើហិង្សាទៅលើអ្នកាន់កាប់អចលនវត្ថុដោយសុចរិត ប្រព្រឹត្តទៅនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន កាលពីអំឡុងឆ្នាំ២០១០ រហូតដល់ឆ្នាំ២០១៦ ថាជា បទល្មើសដែលមានចែងឱ្យផ្តន្ទាទោស តាមបញ្ញត្តិមាត្រា២៥៣នៃច្បាប់ភូមិបាល ។
បើតាមការរៀបរាប់ពីប្រជាពលរដ្ឋ ដែលនាំគ្នាមកតវ៉ា នៅមុខសាលាខេត្តប៉ៃលិន បានឱ្យដឹង ថា ៖ បន្ទាប់ពីទទួលបានដីកាបង្គាប់ឱ្យចូលខ្លួនពីលោក គឹម ម៉េង ចៅក្រមស៊ើងសួរ នៃសាលាដំបូង ខេត្តប៉ៃលិន កាលពីប៉ុន្មានថ្ងៃមុននេះ ពួកគាត់ពិតជាមានការភិតភ័យយ៉ាងខ្លាំង ដេកមិនលក់បក់មិន ល្ហើយ ទើបនៅព្រឹកថ្ងៃនេះ ពួកគាត់បាននាំធ្វើដំណើរមកសាលាខេត្តប៉ៃលិន ដើម្បីឱ្យឯកឧត្តម ផាន់ ចាន់ធុល អភិបាលខេត្តប៉ៃលិន ជួយអន្តរាគមន៍ដល់ពួកគាត់ជាជនស្លូតត្រង់ផងដែរ ។ ពួកគាត់បន្តទៀតថា ពាក់ព័ន្ធនឹងការរស់នៅលើដីខាងលើនេះ គឺមិនបានដឹងរឿង ក៏មិនបានប្រើអំពើហិង្សាទៅលើម្ចាស់ដី ឬនរណាម្នាក់នោះឡើយ ព្រោះពួកគាត់អត់បានស្គាល់ម្ចាស់ដីខាងលើថាជានរណានោះទេ ហើយពួកគាត់រស់នៅលើដីរាល់ថ្ងៃនេះ សុំតែសុខប៉ុណ្ណោះ ពោលគឺអស់រយ:ពេលជិត២០ឆ្នាំមកហើយ តែអាជ្ញាធរខេត្ត មិនបានចេញប្លង់កម្មសិទ្ធិឱ្យពួកគាត់រស់នៅស្របច្បាប់នោះទេ ព្រោះគេប្រាប់ថា មានម្ចាស់កម្មសិទ្ធិអ្នកដទៃផ្សេងទៀត ។
ប្រជាពលរដ្ឋក៏បានសំណូមពរដល់ថ្នាក់ដឹកនាំគ្រប់លំដាប់ថ្នាក់ ជាពិសេសឯកឧត្តមអភិបាលខេត្តប៉ៃលិន ឱ្យជួយអន្តរាគមន៍ជូនពួកគាត់ផង ខណ:ជិតដល់ថ្ងៃចូលជួប ខាងតុលាការខេត្តប៉ៃលិន ឆាប់ៗខាងមុខនេះហើយ ។
ពាក់ព័ន្ធទៅនឹងបញ្ហានេះ ឯកឧត្តម ចេញ ញ៉ាន់ អភិបាលរងខេត្តប៉ៃលិន បានរៀបរាប់ឱ្យដឹងថា ៖ ក្នុងនាមជាគណ:បញ្ជាការឯកភាពខេត្ត គឺខាងខេត្ត មានសិទ្ធិអាចជួយអន្តរាគមន៍ជូនប្រជាពល រដ្ឋ ព្រោះខាងខេត្តជាតំណាងរាជរាដ្ឋាភិបាលថ្នាក់ក្រោមជាតិ តែងនៅឈរខាងប្រជាពលរដ្ឋ តែបើលូកដៃចូលជ្រៅក្នុងរឿងកិច្ចការ តុលាការ គឺមិនអាចនោះទេ ។ ឯកឧត្តមបានបញ្ជាក់ទៀតថា ខាងខេត្ត នឹងតាមដានមើលសកម្មភាពរឿងរ៉ាវខាងលើនេះ ពេលប្រជាពលរដ្ឋចូលទៅបំភ្លឺនៅតុលាការ ។
សូមបញ្ជាក់ថា ៖ ដីធ្លីនៅចំណុចខាងលើនេះ កាលពីប៉ុន្មានឆ្នាំមុន ខាងអាជ្ញាធរខេត្ត ធ្លាប់ចុះទៅធ្វើការសម្របសម្រួលអស់រយ:ពេល៣ដងមកហើយ ដោយសុំដោះស្រាយគោលនយោបាយ ។ ពេលនោះប្រជាពលរដ្ឋខ្លះយល់ព្រមទៅរស់នៅលើដីថ្មី ដែលអាជ្ញាធររៀបចំចែកឱ្យ ក៏មានភូមិ និងផ្សារនៅទីនោះដែរ តែអ្នកខ្លះមិនយល់ព្រមទៅទេ នៅក្រាញននៀលចង់បានដីកន្លែងចាស់ដដែលនេះ ។ ចំណែកអ្នកខ្លះទៀត បានទៅរស់នៅលើដីថ្មីហើយ បែរជារត់មករស់នៅកន្លែងដីចាស់នេះទៅវិញ ធ្វើឱ្យមានការឈឺក្បាលដោះស្រាយមិនចេះចប់មិនចេះហើយ ៕
