ខេត្តបន្ទាយមានជ័យ ៖ អង្គភាពវរសេនាតូចនគរបាលការពារព្រំដែនគោកលេខ៩១១ សូមធ្វើការបដិសេធទាំងស្រុងចំពោះអត្ថបទព័ត៌មានដែលបានចុះផ្សាយរបស់ផេក @គេហទំព័រ ផែនដីថ្មី PDT-News.com នៅថ្ងៃទី១២ ខែធ្នូ ឆ្នាំ២០២០ ដែលមានខ្លឹមសារថា ៖ បទល្មើសឆ្លងដែនកើតឡើងពេញបន្ទុក នៅច្រករបៀងបឹងសាគូ ក្រុងប៉ោយប៉ែត ដោយមានការឃុបឃិតបើកដៃពីមេប៉ុស្តិ៍ ឈ្មោះ រស់ ពិសិដ្ឋ ដែលជាប្អូនថ្លៃលោក សូ ចាន់ណារី មេបញ្ជាការនគរបាលវរការពារព្រំដែនគោកលេខ ៩១១ ។
ចំពោះខ្លឹមសារអត្ថបទព័ត៌មាននេះ អង្គភាពសូមជំរាបជូនលោកនាយកគេហទំព័រ ផែនដីថ្មី PDT-News.com ជ្រាបថា ៖ ដោយមានការណែនាំដ៏ខ្ពង់ខ្ពស់របស់លោកឧត្តមសេនីយ៍ទោ សិទ្ធិ ឡោះស្នងការនគរបាលខេត្តបន្ទាយមានជ័យ ដើម្បីឆ្លើយបំភ្លឺពាក់ព័ន្ធនិងបទល្មើសឆ្លងដែនពិសេសពលករឆ្លងដែននិងនាំទំនិញខុសច្បាប់ផ្សេងៗឆ្លងដែន។
អង្គភាពយើងខ្ញុំ សូមជម្រាបជូនសាធារណជននិងសារព័ត៌មានជាតិ និងអន្តរជាតិមេត្តាជ្រាបថា ការចេញផ្សាយថាមានការចេញអីវ៉ាន់និងពលករ ខុសច្បាប់ តាមច្រកបឹងសាគូនោះគឺ(ត្រូវបានហាមឃាត់) គ្មានទេច្រករបៀង ឬផ្លូវស្រម៉ោច ហើយ កងកម្លាំងដែលនៅការពារតាមខ្សែបន្ទាត់ព្រំដែនទាំងខាងភាគីកម្ពុជា និងភាគីថៃ បានរួមគ្នាយ៉ាងសកម្មទប់ស្កាត់នូវរាល់បទល្មើសឆ្លងដែនខុសច្បាប់គ្រប់ប្រភេទ ពិសេសពលករឆ្លងដែន និងនាំទំនិញខុសច្បាប់ផ្សេងៗឆ្លងដែន ពិសេសជាងនេះទៀត គឺកងកម្លាំងជួរមុខទ្វេរភាគីកម្ពុជា-ថៃ រួមគ្នា បង្ការ ទប់ស្កាត់ ការីករាលដាលនៃជម្ងឺរាតត្បាតកូវីដ-១៩តាមការណែនាំដ៌ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា និងក្រសួងសុខាភិបាលជានិច្ច ។
តាមការឆ្លើយបំភ្លឺតាមរយះ ទូរស័ព្ទ លោកវរសេនីយ៍ឯក សូ ចាន់ណារី មេបញ្ជាការ វរសេនាតូចនគរការពារព្រំដែនគោកលេខ ៩១១ បានមានប្រសាសន៍ថា វរសេនាតូចរបស់លោក ពុំមានសិទ្ធិក្នុងបើកច្រកដោយចិត្តឯងនោះទេ សូមជម្រាបអង្គភាពនិមួយៗ មានមេកើយ និងគណកម្មការចុះត្រួតពិនិត្យជាពិសេស ទោទៀតនោះ ឯកឧត្តម អភិបាលខេត្តដែលជាគណបញ្ជាការឯកភាព និងអាជ្ញាធរក្រុងប៉ោយប៉ែត តែងតែចុះសហការ ជាមួយវរសេនាតូចរបស់លោក ដើម្បីឆ្លើយតបទៅនឹងការទប់ស្កាត់នៃជម្ងឺកូវីត ហើយពុំមានការ នាំទំនិញ និងពលករ ឆ្លងដែនខុសច្បាប់ បានទេ។
ចំពោះលោកអនុសេនីយ៍ឯក រស់ ពិសិដ្ឋ ដែលជាប្អូនថ្លៃរបស់ខ្ញុំវិញ គាត់តែងតែ អនុវត្តន៍នូវបញ្ជា របស់ថ្នាក់លើជានិច្ចហើយម្យ៉ាងទៀត រូបនិងខ្លឹមសារដែលបងប្អូនសារព័ត៌មាន បានចុះវាយប្រហារមកលើរូបខ្ញុំនិងប្អូនថ្លៃខ្ញុំវិញ គឺពុំមានរូបថតណាដែលមានចេញជាសកម្មភាពថ្មីៗ ដែលកើតឡើងនៅច្រកបឹងសាគូ ដូចដែលសារព័ត៌មានក្នុងស្រុកបានចុះផ្សាយទេ ។
ខ្ញុំសូមថ្លែងអំណរគុណ ចំពោះសារព័ត៌មានដែលបានចុះផ្សាយមានការចុះផ្សាយប្រកបដោយវិជ្ជាជីវះត្រឹមត្រូវ ហើយមានការរិះគន់ដោយក្នុងន័យស្ថាបនា ៕
