(ភ្នំពេញ) ÷ យោងប្រសាសន៍ដឹកនាំរបស់លោកអភិបាល នៃគណៈអភិបាលខណ្ឌដូនពេញ នៅថ្ងៃព្រហស្បតិ៍ ១០រោច ខែមិគសិរ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១០ ខែធ្នូ ឆ្នាំ២០២០ ចាប់ពីម៉ោង ២០:០០នាទីយប់ ដល់ម៉ោង ២២:៣០នាទីលោក ចាន់ គន្ថេត អភិបាលរងខណ្ឌ ដឹកនាំក្រុមការងារចម្រុះថ្នាក់ខណ្ឌចុះណែនាំ និងត្រួតពិនិត្យទីតាំងអាជីវកម្មភោជនីយដ្ឋាន អាហារដ្ឋាន បារបារាំង និងហាងម៉ាស្សាមួយចំនួន ជាលទ្ធផលទទួលបានដូចខាងក្រោម÷
១-សង្កាត់ស្រះចក
-បានពិនិត្យជាក់ស្តែងឃើញថា ទីតាំងភោជនីយដ្ឋាន ហ្គោឌិនផាឡេស,ភោជនីយដ្ឋានស្ពានមាស, ភោជនីយដ្ឋាន BK និងភោជនីយដ្ឋាន Epic2 បានគោរពតាមការណែនាំដោយផ្អាកអាជីវកម្មជាបណ្តោះអាសន្ន។
២-សង្កាត់ផ្សារថ្មីទី៣
-បានពិនិត្យជាក់ស្តែងឃើញថា ទីតាំងអាជីវកម្មភោជនីយដ្ឋានមួយចំនួនក្នុង និងជុំវិញផ្សារសូរិយាម៉ល បានគោរពតាមការណែនាំដោយផ្អាកអាជីវកម្មជាបណ្តោះអាសន្ន។
៣-សង្កាត់ជ័យជំនះ
-បានចុះត្រួតពិនិត្យ និងណែនាំដល់ម្ចាស់ទីតាំងភោជនីយដ្ឋាន អាហារដ្ឋាន និងបារបារាំង អោយផ្អាកអាជីវកម្មជាបណ្តោះអាសន្ន ដើម្បីចូលរួមការពារ និងទប់ស្កាត់ការរីករាលដាលជំងឺកូវីដ១៩។
៤-សង្កាត់ផ្សារកណ្តាលទី១
-បានចុះផ្សព្វផ្សាយតាមឡានគណៈបញ្ជាការឯកភាពរដ្ឋបាលខណ្ឌ ដល់មូលដ្ឋានអាជីវកម្មភោជនីយដ្ឋាន អាហារដ្ឋាន បារបារាំង តាមបណ្តោយផ្លូវលេខ៥, ១៣០ និងផ្លូវលេខ១៣៦ អោយបន្តផ្អាកអាជីវកម្មជាបណ្តោះអាសន្នបន្តទៀត ដើម្បីចូលរួមការពារ និងទប់ស្កាត់ការរីករាលដាលជំងឺកូវីដ១៩ ៕
