(ខេត្តកំពត)៖ ពលរដ្ឋបានលើកឡើងថា មេបញ្ជាការរងកងរាជអាវុធហត្ថខេត្តកំពតម្នាក់ បានប្រើអំណាច កាប់និងដុតបំផ្លាញដំណាំរបស់ខ្លួន រួចហើយទើបបោះបង្គោលរបងព័ទ្ធយកដីនោះលក់តែម្តង។បន្ទាប់ពីមានករណីដូចខាងលើពលរដ្ឋរូបនោះបានដាក់ពាក្យបណ្តឹង និងស្នើឲ្យអាជ្ញាធរ មន្ត្រីជំនាញ និងមន្ត្រីពាក់ព័ន្ធជួយស្វែងរកដំណោះស្រាយ និងរកយុត្តិធម៌ដល់រូបគាត់ផង។
ទាក់ទិននឹងរឿងរ៉ាវនេះ លោកកែម មុនីវណ្ណ បានអះអាងថាខ្លួនជាម្ចាស់និងបានអាស្រ័យផលនៅលើដីទំហំបួនហិកតាដែលមានទីតាំងស្ថិតនៅ ក្នុងភូមិកែបថ្មី ឃុំបឹងទូក ស្រុកទឹកឈូ ខេត្តកំពតពិតមែន និងមានលិខិស្នាមបញ្ជាក់ត្រឹមត្រូវតាំងពីឆ្នាំ១៩៩៣មកម្ល៉េះ ដោយដីចំការរបស់លោក និងដីប្រជាពលរដ្ឋ៦គ្រួសារផ្សេងទៀតដែលនៅជាប់នោះ នៅមិនទាន់មានប័ណ្ណកម្មសិទ្ធ(ប្លង់រឹង)នៅឡើយទេ ដោយសារពេលក្រុមការងារនិស្សិតចុះវាស់វែងដីធ្លីតាមបទបញ្ជា០១ ឆ្នាំ២០១៣ លោក សែម សឿន មេបញ្ជាការរងកងរាជអាវុធហត្ថខេតកំពត បានចេញមុខមកជំទាស់ និងអះអាងជាដីរបស់ខ្លួនដែរ។
លោក កែម មុនីវណ្ណ បានបន្តថា បើទោះជាមិនបានវាស់វែង ប៉ុន្តែលោកនៅតែបន្តអាស្រ័យផលដាំដុះដំណាំដូចជាស្វាយចន្ទី ខ្នុរ ដើមអាកាស្យា និងដើមក្រញូងជាច្រើនរយដើមនៅលើដីនោះ ហើយមិនដែលមានបញ្ហាអ្វីនោះទេ។ រហូតដល់ពេលថ្មីៗកន្លងមកនេះ ស្រាប់តែលោកសែម សឿន បានដាក់កម្លាំងមកកាប់ និងដុតបំផ្លាញ់ដំណាំរបស់លោកគ្មានសល់ ដើម្បីបំបាត់ភស្តុតាំងតែម្តង។
ពលរដ្ឋដដែលនេះបានបន្ថែមថា បន្ទាប់ពីកាប់ និងដុតបំផ្លាញ់ដំណាំអស់ ពីរថ្ងៃកន្លងមកនេះ ស្រាប់តែលោកមេបញ្ជាការរង ដាក់កម្លាំងកម្មករទៅបោះរបងព័ទ្ធយកដីនោះលក់ឲ្យអ្នកដទៃបន្ត ដោយគ្មានការសួរនាំ ឬដោះស្រាយអ្វីសោះ។ក្រោយពីមានការរំលោភបំពាន លោកបានដាក់ពាក្យបណ្តឹង និងស្នើដល់អាជ្ញាធរ មន្ត្រីជំនាញនិងពាក់ព័ន្ធ ជួយស្វែងរកដំណោះស្រាយ និងភាពយុត្តិធម៌ដល់រូបគាត់ផង។
ជុំវិញនឹងការលើកឡើងរបស់ពលរដ្ឋខាងលើ លោក សែម សឿន មេបញ្ជាការរងកងរាជអាវុធហត្ថខេត្តកំពត បានបំភ្លឺថា លោកមិនបានប្លន់យកដីនរណាទេ ដីនោះជាដីរបស់លោកយូរហើយ និងថាក្នុងនាមកងកម្លាំងមួយរូប លោកមិនដែលប្រើអំណាចទៅគាបសង្កត់ ឬគំរាមកំហែងបុគ្គលណាម្នាក់ដើម្បីផលប្រយោជន៍ឡើយ។ ហើយចំពោះករណីកាប់ និងដុតបំផ្លាញ់ដំណាំ ហើយដាំបង្គោលរបងលើដីនោះ មិនពាក់ព័ន្ធនិងរូបលោកនោះទេ ព្រោះដីនោះលោកបានលក់ទៅឲ្យគេ តាំងពីឆ្នាំ២០១៤ម្ល៉េះ៕ សេង ណារិទ្ធ
