(បាត់ដំបង) ÷នៅព្រឹកថ្ងៃទី៧ ខែ ធ្នូ ឆ្នាំ ២០២០ នេះលោក ខាន់ ម៉ាណេរ រដ្ឋលេខាធិការក្រសួងសាធារណៈការនិងដឹកជញ្ជូននិងជាប្រធានក្រុមការងារក្រឡាហោមមនុស្សធម៌បាត់ដំបងបានដឹកនាំក្រុមការងារនាំយកអំណោយដ៏ថ្លៃថ្លារបស់សម្តេចក្រឡាហោម ស ខេង ឧបនាយក រដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវមកប្រគល់ជូនដល់អង្គភាពអធិការដ្ឋាននគរបាលក្រុង-ស្រុកចំនួនបួនចំណុះស្នងការដ្ឋាននគរបាលខេត្តបាត់ដំបង។
ក្នុងពិធីប្រគល់អំណោយដ៏ថ្លៃថ្លានេះ លោក ខាន់ ម៉ាណេរ បានមានប្រសាសន៍ថា ដើម្បីចូលរួមជួយសម្រាល ចំពោះការលំបាកខ្លះរបស់ក្រុមគ្រួសារកងកម្លាំងនគរបាល ក៏ដូចប្រជាពលរដ្ឋក្រីក្រនៅមូលដ្ឋាន ថ្ងៃនេះសម្តេច ក្រឡាហោម ស ខេង និងលោកជំទាវ តាមរយៈក្រុមការងារក្រឡាហោមមនុស្សធម៌បាត់ដំបង ដែលមានរូបឯកឧត្តម ជាប្រធានក្រុមបាននាំយកអង្ករចំនួន ០៨តោន មីចំនួន២០០កេសតូច ត្រីខកំប៉ុងចំនួន ៤០០យួរ ទឹកត្រីចំនួន២០០យួរ ទឹកស៊ីអ៊ីវចំនួន ២០០យួរ ប្រគល់ជូនដល់អង្គភាពអធិការដ្ឋាននគរបាលក្រុង ស្រុកចំនួនបួនក្នុងខេត្តបាត់ដំបង ដែលរួមមាន អធិការដ្ឋាននគរបាលក្រុងបាត់ដំបង អធិការដ្ឋាននគរបាលស្រុកឯកភ្នំ អធិការដ្ឋាននគរបាលស្រុកថ្មគោល និងអធិការដ្ឋាននគរបាលស្រុកបវេល ដើម្បីបានចែករំលែកដល់ក្រុមគ្រួសារកងកម្លាំងនគរបាល និងគ្រួសារ ប្រជាពលរដ្ឋក្រីក្រខ្វះខាតនៅក្នុងមូលដ្ឋាន ។
លោកឧត្តមសេនីយ៍ត្រី សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ដែលមានវត្តមាន ក្នុងពិធីប្រគល់ទទួលនេះតំណាងឱ្យលោកអធិការនគរបាលក្រុង ស្រុកទាំងបួន បានសម្តែងនូវទឹកចិត្តរីករាយ សាទរយ៉ាងក្រៃលែងចំពោះទឹកចិត្តសប្បុរសរបស់សម្តេចក្រឡាហោម ស ខេង និងលោកជំទាវ ដែលជានិច្ចកាលសម្តេច និងលោកជំទាវតែងតែគឹតគូរអំពីសុខទុក្ខរបស់កងកម្លាំងនគរបាលព្រមទាំងក្រុមគ្រួសារ ក៏ដូចប្រជាពលរដ្ឋនៅក្នុងមូលដ្ឋានទាំងមូល ។
ជាក់ស្តែងនៅថ្ងៃនេះ តាមរយៈក្រុមក្រឡាហោមមនុស្សធម៌បាត់ដំបង ដែលមានឯកឧត្តម ខាន់ ម៉ាណេរ ជាប្រធានលោកបាននាំយកអង្ករនិងគ្រឿងឧបភោគបរិភោគយ៉ាងច្រើន មកប្រគល់ជូន ដល់អង្គភាពអធិការដ្ឋាននគរបាលក្រុង ស្រុក ដើម្បីបានចាត់ចែងប្រើប្រាស់សម្រួលដល់ការលំបាកទាំងក្រុមគ្រួសារមន្ត្រីនគរបាលក៏ដូចប្រជាពលរដ្ឋទូទៅដោយគ្មានការរើសអើងអ្វីឡើយ ។
ជាមួយនេះលោកឧត្តមសេនីយ៍ស្នងការសូមគោរពជូនពរសម្តេចក្រឡាហោម និងលោកជំទាវ ក្រុមគ្រួសារព្រមទាំងក្រុមគ្រួសារក៏ដូចក្រុមការងារក្រឡាហោម មនុស្សធម៌បាត់ដំបង ដែលមានលោក ខាន់ ម៉េណេរ ជាប្រធាន សូមសម្តេច លោកជំទាវ ឯកឧត្តម លោក លោកស្រី បានប្រកបដោយសុខភាពល្អបរិបូរណ៍ កម្លាំងពលំមាំមួនសូមសម្រេចបានជោគជ័យគ្រប់ភារកិច្ចជូនជាតិនិងប្រជាពលរដ្ឋ ៕
