ខេត្តបន្ទាយមានជ័យ ៖ ដោយមានការចង្អុលបង្ហាញពីលោក ឧត្តមសេនីយ៍ទោ សិទ្ធិ ឡោះ ស្នងការននគរបាលខេត្ត ក្នុងការបង្ក្រាបរាល់សកម្មភាពក្មេងទំនើង នៅថ្ងៃសៅរ៍ ៥រោច ខែមិគសិរ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី០៥ ខែធ្នូ ឆ្នាំ២០២០ លោកឧត្ដមសេនីយ៍ត្រី នូ ជីវ័ន្ត ស្នងការរងផែនការងារនគរបាលព្រហ្មទណ្ឌ បានបង្ហាញដល់អធិការទាំង ០៩ក្រុង-ស្រុក អោយយកចិត្តទុកដាក់នឹងដោះស្រាយពីបញ្ហាក្មេងទំនើងដូចជា៖ បង្ហោះម៉ូតូ, ម៉ូតូដាក់ស៊ីម៉ាំងកែច្នៃ (ស៊ីម៉ាំងប្រែន), វាយតបគ្នា .ល.។
ជាក់ស្ដែង លោកអធិការដ្ឋាននគរបាលស្រុកថ្មពួក បង្ក្រាបបានករណីក្មេងទំនើងជិះម៉ូតូដាក់ស៊ីម៉ាំងកែច្នៃ (ស៊ីម៉ាំងប្រែន) ហើយបានឃាត់យកមកប៉ុស្តិ៍ដើម្បីដកហូតបំពង់ស៊ីម៉ាំងកែច្នៃរក្សាទុក និងប្ដូរដាក់ស៊ីម៉ាំងធម្មតាវិញ ហើយធ្វើកិច្ចសន្យាអប់រំណែនាំ បញ្ឈប់ឱ្យប្រើបំពង់ស៊ីម៉ាំងកែច្នៃ (ស៊ីម៉ាំងប្រែន) ទៀត រួចបានទំនាក់ទំនងទៅ អាណាព្យាបាល មកធ្វើការធានាដើម្បីយកត្រឡប់ទៅផ្ទះវិញ ។
ជាមួយគ្នានោះ លោកឧត្ដមសេនីយ៍ត្រី នូ ជីវ័ន្ត ក៏បានសំណូមពរដល់បងប្អូនប្រជាពលរដ្ឋក្នុងខេត្ដបន្ទាយមានជ័យទាំងអស់ សូមមេត្តាជួយសហការណ៍ និងផ្តល់ព័ត៌មានមកកម្លាំងសមត្ថកិច្ចផង ប្រសិនបើបងប្អូនដឹងថាមានក្មេងទំនើងប្រមូលផ្តុំគ្នាប្រើប្រាស់ ឬចែកចាយនូវសាធាតុញៀន និងបទល្មើសផ្សេងៗដើម្បីឲ្យកម្លាំងរបស់លោកចុះទៅបង្ក្រាបឲ្យបានទាន់ពេលវេលាផងដែរ។
ជាពិសេសនោះសូមបងប្អូនយកចិត្តទុកដាក់ខ្ពស់ក្នុងការការពារប្រឆាំងជំងឺកូវីដ.១៩ តាមការណែនាំរបស់ក្រសួងសុខាភិបាល៕សូមអរគុណ!
