(តាកែវ)៖ លោក យស ណាស៊ី ប្រធានក្រុមប្រឹក្សាខេត្តបានស្ដីបន្ទោសមន្ត្រីជាន់ខ្ពស់ខេត្តតាកែវ មួយចំនួន ដែលចូលរួមនៅក្នុងកិច្ចប្រជុំ ស្លៀកពាក់មិនសមរម្យ ដូចជា ពាក់អាវយឺតមកចូលរួមប្រជុំ ដែលមិនសក្តិសមជាមន្ត្រីថ្នាក់ដឹកនាំខេត្ត និងមិនឲ្យតម្លៃដល់កិច្ចប្រជុំក្រុមប្រឹក្សាខេត្ត។ ការស្តីបន្ទោសនេះ ធ្វើឡើង នៅក្នុងកិច្ចប្រជុំក្រុមប្រឹក្សាខេត្តតាកែវមួយ នៅព្រឹកថ្ងៃទី៣ ខែធ្នូ ឆ្នាំ២០២០នេះ ។
បើទោះបីជាឈ្មោះមន្ត្រីពាក់អាវមិនសមរម្យមិនត្រូវបានបញ្ចេញយ៉ាងណាក៏ដោយ តែគេសង្កេតឃើញ ក្នុងកិច្ចប្រជុំក៏មានលោក ជួង វ៉ាន ដែលជាប្រធានមន្ទីធម្មការ និងសាសនាខេត្ត ម្នាក់គត់បានពាក់អាវយឺតដៃខ្លី ចូលរួមកិច្ចប្រជុំដ៏មានសារៈសំខាន់នៅរដ្ឋបាលខេត្ត ហាក់សម្ដែងមិនការគោរព និងមិនសក្តិសមជាប្រធានមន្ទីរស្ថាប័នរាជការមួយទាល់តែសោះ។
លោកប្រធានក្រុមប្រឹក្សាខេត្តតាកែវ បានបន្តទៀតថា ចំពោះកិច្ចប្រជុំដែលធំជាងគេ នៅរដ្ឋបាលខេត្តតាកែវ គឺជាកិច្ចប្រជុំក្រុមប្រឹក្សានេះហើយ ដូច្នោះលោកក៏បានស្នើសុំដល់អ្នកចូលរួមប្រជុំទាំងអស់ ត្រូវធ្វើការស្លៀកពាក់ឱ្យបានសមរម្យ ព្រោះអស់លោកជាមន្ត្រីរាជការ និងជាថ្នាក់ដឹកនាំនៅតាមអង្គភាពចំណុះរដ្ឋបាលខេត្តផង។
ពាក់ព័ន្ធនឹងការស្ដីបន្ទោសនេះដែរ លោក ជួង វ៉ាន ប្រធានមន្ទីរធម្មការ និងសាសនាខេត្ត ហាក់មិនខ្វល់ និងស្ដីបន្ទោសនេះ ដោយបានថ្លែងប្រាប់ក្រុមអ្នកសារព័ត៌មានដ៏ល្បីឈ្មោះថា ចំពោះរឿងស្លៀកពាក់មិនសមរម្យចូលប្រជុំនេះ គឺគាត់បានទៅសុំទោសលោកប្រធានក្រុមប្រឹក្សាខេត្តរួចហើយ ហើយកិច្ចប្រជុំលើកក្រោយ លោកនឹងកែប្រែអកប្បកិរិយាការស្លៀកពាក់នេះឡើងវិញ។
ជុំវិញការស្លៀកពាក់មិនសមរម្យចូលរួមប្រជុំបែបនេះដែរ មន្ត្រីរាជការផ្សេងៗ បានសម្ដែងការហួសចិត្ត ធ្វើដល់ថ្នាក់ដឹកនាំនៅអង្គភាពមួយដែរ តែស្លៀកពាក់មិនបានកូនចៅគេផង ហើយមើលទៅដូចជាមិនគោរព ឋានៈតួនាទីដែលខ្លួនមានសោះ និងមិនសក្តិសមជាមន្ត្រីទាល់តែសោះ ។
ដោយឡែក សេចក្តីរាយការណ៍ដដែលបានបញ្ជាក់ថា លោកប្រធានមន្ទីរបានអះអាងថា »លោកបានដឹងថាថ្ងៃនេះប្រជុំក្រុមប្រឹក្សាខេត្ត តែចំពោះការស្លៀកពាក់បែបនេះមកចូលរួមប្រជុំ គឺដោយសារប្រពន្ធជូនមកលឿនពេកប្ដូរសម្លៀកបំពាក់មិនទាន់ ក៏សម្រេចចិត្តឡើងទៅចូលរួមប្រជុំតែម្ដង» ៕
