(កំពង់ធំ)÷រសៀលថ្ងៃទី ២៤ខែវិច្ឆិកាឆ្នាំ ២០២០ លោក ជុំ វីរៈ អភិបាលរងស្រុកសណ្តាន់និងលោកតាន់ ម៉េងឆាង ប្រធានការិយាល័យផលិតកម្ម និងបសុព្យាបាលខេត្តកំពង់ធំ នៃមន្ទីរកសិកម្មរុក្ខាប្រមាញ់ និងនេសាទ ខេត្តកំពង់ធំ បានបើកកិច្ចប្រជុំផ្សព្វផ្សាយពង្រឹងច្បាប់ស្តីពីសុខភាពសត្វ និងផលិតកម្មសត្វ និងប្រកាសពាក់ព័ន្ធដល់អាជ្ញាធរមូលដ្ឋានសង្កាត់ម្ចាស់សត្តឃាតដ្ឋាន អាជីវករពិឃាតសត្វ(គោ ក្របី ជ្រូក និងបក្សី)។
សមាសភាពចូលរួមមាន មន្ត្រីជំនាញផលិតកម្មសត្វ បសុព្យាបាល អាជីវករពិឃាតសត្វ និងអាជ្ញាធរ/សង្កាត់សរុបចំនួន ៣៩នាក់ ស្ថិតនៅស្រុកសណ្តាន់ខេត្តកំពង់ធំ។
ក្នុងឱកាសនោះលោក តាន់ ម៉េងឆាង ប្រធានការិយាល័យផលិតកម្មនិងបសុព្យាបាលខេត្តកំពង់ធំបានលើកឡើងពីច្បាប់ស្ដីពីសុខភាពសត្វ ផលិតកម្មសត្វ និងប្រកាសពាក់ព័ន្ធក្នុងគោលបំណងពង្រឹងដល់អាជីវករឱ្យយល់ដឹងកាន់តែច្បាស់បន្ថែមទៀត និងធ្វើការពិភាក្សាការងារធ្វើអាជីវកម្មពិឃាតសត្វប្រចាំឆ្នាំ ២០២១ នឹងបញ្ហាដល់អាជីវករក្រៅសត្តឃាតដ្ឋានក្នុងស្រុកសណ្តាន់ ។
ក្នុងនោះ ប្រសិនបើមានសត្វ គោ ក្របី ជ្រូក និងបក្សីផ្សេងៗឈឺសូមម្ចាស់សត្តឃាតដ្ឋានទាំងអស់កុំធ្វើពិឃាតឲ្យសោះព្រោះខ្លាចឆ្លងជំងឺ ហើយប៉ះពាល់ដល់សុខភាពមនុស្សផងដែរ។
ជាមួយគ្នានោះផងដែរលោក ជុំ វីរៈ អភិបាលរងស្រុកសណ្តាន់ក៏បានលើកយកលិខិតលេខ ២៧៤២ របស់មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ចុះថ្ងៃទី១៨ ខែវិច្ឆិកា ឆ្នាំ២០២០ បានផ្សព្វផ្សាយពង្រឹងច្បាប់ស្ដីពីសុខភាពសត្វ និងផលិតកម្មសត្វ ដល់ម្ចាស់សត្តឃាតដ្ឋាន អាជីវករពិឃាតសត្វ គោ ក្របី ជ្រូក នឹងបក្សី ក្នុងមូលដ្ឋានស្រុកសណ្តាន់ ដើម្បីឱ្យអាជីវកម្មពិឃាតសត្វប្រចាំឆ្នាំ ២០២១ដោយមិនត្រូវពិឃាតសត្វក្រៅសត្តឃាតដ្ឋានរបស់ខ្លួនទេ។
ម្ចាស់សត្តឃាតដ្ឋានទាំងអស់ពេលពិឃាតសត្វ ត្រូវពិនិត្យសត្វឲ្យបានត្រឹមត្រូវប្រសិនបើមានករណីសត្វមានបញ្ហាសូមរាយការណ៍និងផ្ដល់ដំណឹងដល់អាជ្ញាធរភូមិ/ឃុំនិងមន្ត្រីជំនាញឲ្យបានទាន់ពេលវេលា។
ស្របពេលដែលជំងឺប៉េស្តអាព្រិចកំពុងតែរីករាលដាលយ៉ាងខ្លាំង លោក ជុំ វីរៈ អភិបាលរងស្រុកសណ្តាន់ក៏បានសំណូមពរដល់ម្ចាស់សត្តឃាតដ្ឋានទាំងអស់គោរពច្បាប់ស្ដីពីសុខភាពសត្វនិងផលិតកម្មសត្វឲ្យបានត្រឹមត្រូវ។
ចុងក្រោយលោកសូមឱ្យបងប្អូនទាំងអស់កុំភ្លេចការពារខ្លួនពីជំងឺកូវីដ-១៩តាមការណែនាំរបស់ក្រសួងសុខាពិបាល និងចូលរួមគោរពច្បាប់ចរាចរណ៍ផ្លូវគោកទាំងអស់គ្នា។
