(ខេត្តកំពត)៖ នៅព្រឺកថ្ងៃទី២៣ ខែវិច្ឆិកា ឆ្នាំ២០២០ លោក ជាវ តាយ អភិបាល នៃគណៈអភិបាលខេត្ត ទទួលស្វាគមន៍គណៈប្រតិភូអគ្គស្នងការនគរបាលជាតិ ដែលដឹកនាំដោយ លោកឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ ដោយផ្តោតសំខាន់លើបេសកកម្ម ត្រួតពិនិត្យ និងពង្រឹងការងារសន្តិសុខសណ្តាប់ធ្នាប់ និងរបៀបរៀបរយសង្គមតាមបណ្តាខេត្តជាប់ព្រំដែនសមុទ្រ។
ក្នុងកិច្ចប្រជុំនេះ លោកឧត្តមសេនីយ៍ឯក ឌី វិជ្ជា បានជម្រាបអំពីគោលបំណងបេសកកម្ម និងបទពិសោធន៍ ដែលបានអនុវត្តន៍កន្លងមកក្នុងខេត្តកោះកុង និងខេត្តព្រះសីហនុ ជូនឯកឧត្តមអភិបាលខេត្ត។ ក្នុងឱកាសនោះដែរ លោកក៏បានមានប្រសាសន៍ណែនាំ ក៏ដូចជាកិច្ចសហការពី លោកអភិបាលខេត្ត ដើម្បីធ្វើយ៉ាងណាឲ្យដំណើរការបេសកកម្មរបស់គណៈប្រតិភូទទួលបានជោគជ័យ និងមានប្រសិទ្ធភាពខ្ពស់។
លោក ជាវ តាយ បានជម្រាបអំពីស្ថានភាពភូមិសាស្ត្រ សន្តិសុខសណ្តាប់ធ្នាប់ និងស្ថានភាពនយោបាយក្នុងខេត្តដែលបានកើតមានកន្លងមក និងការអនុវត្តការងាររបស់រដ្ឋបាលខេត្ត និងស្នងការដ្ឋាននគរបាលខេត្តជូនគណៈប្រតិភូ។ ជាមួយគ្នានោះ លោកអភិបាលខេត្តក៏បានថ្លែងអំណរគុណចំពោះគណៈប្រតិភូ និង លោក ឌី វិជ្ជា ដែលបានខិតខំលើការងារបំពេញបេសកកម្មនេះ ដែលជាចលករមួយជួយជំរុញ និងពង្រឹងប្រសិទ្ធភាពក្នុងការងារកំណត់មុខសញ្ញាឈានទៅបង្ក្រាបបទល្មើសចំមុខសញ្ញា។ លោកអភិបាលខេត្ត ក៏បានជូនពរដល់គណៈប្រតិភូទាំងអស់ ឲ្យបំពេញបេសកកម្មនេះ ទទួលបានជោគជ័យ និងមានប្រសិទ្ធភាពខ្ពស់៕
សេង ណារិទ្ធ
