នាថ្ងៃទី១៧ ខែវិច្ឆិកា ឆ្នាំ២០២០ វេលាម៉ោង ០៨និង៣០នាទី ប៉ុស្តិ៍នគរបាលច្រកទ្វារព្រំដែនអន្តរជាតិភ្នំដី បានបើកកិច្ចប្រជុំបូកសរុបការងារប្រចាំខែតុលា និងលើកទិសដៅសម្រាប់អនុវត្តការងារខែបន្ត ក្រោមការដឹកនាំដោយ លោក វរសេនីយ៍ឯក ពៅ មុនីជោតិ នាយប៉ុស្តិ៍។
នៅក្នុងកិច្ចប្រជុំនាពេលនេះ ក៏មានការចូលរួមពីសំណាក់ លោកនាយរងប៉ុស្តិ៍, នាយ-នាយរងផ្នែក និងមន្ត្រីប៉ុស្តិ៍មួយចំនួនទៀត។
លោកនាយប៉ុស្តិ៍ បានលើកឡើងអំពីខ្លឹមសារសំខាន់ៗ មួយចំនួនមាន ការផ្សព្វផ្សាយខ្លឹមសារអង្គប្រជុំ របស់នាយកដ្ឋានច្រកទ្វារទី១ ដែលបានប្រព្រឹត្តទៅកាលពីថ្ងៃទី១១ ខែវិច្ឆិកា ឆ្នាំ២០២០, ណែនាំ និងក្រើនរំលឹក ដល់កម្លាំងប៉ុស្តិ៍ទាំងអស់ បន្តយកចិត្តទុកដាក់ខ្ពស់ ក្នុងការអនុវត្តន៍វិធានការអនាម័យតាមការណែនាំ របស់ក្រសួងសុខាភិបាល ដើម្បីការពារជម្ងឺឆ្លង COVID-19 អោយបានខ្ជាប់ខ្ជួន, យកចិត្តទុកដាក់ក្នុងការអនុវត្តន៍ការងារជំនាញ តាមគោលដៅនីមួយៗ ឲ្យមានប្រសិទ្ធភាពខ្ពស់, ពង្រឹងការទប់ស្កាត់រាល់បទល្មើសឆ្លងដែន ចេញ-ចូល ប្រទេស គ្រប់ប្រភេទ ជាពិសេសមុខសញ្ញាបញ្ជីខ្មៅ, ពង្រឹងការល្បាតនៅតាម ស្លាបឆ្វេង-ស្លាបស្តាំ ក្នុងរង្វង់ភូមិសាស្ត្រប្រតិបត្តិការរបស់ប៉ុស្តិ៍, ក្រុមប្រឹក្សាវិន័យប៉ុស្តិ៍ត្រូវយកចិត្តទុកដាក់ធ្វើការសង្កេត និងតាមដានជាប្រចាំចំពោះសកម្មភាពបំពេញការងាររបស់មន្ត្រី សំដៅពិនិត្យអំពីភាពអសកម្ម រឺទង្វើភាពមិនប្រក្រតីណាមួយ ក្នុងការអនុវត្តតួនាទីភារកិច្ច ជាពិសេសធ្វើការផ្សព្វផ្សាយណែនាំ ដល់កម្លាំងប៉ុស្តិ៍ ឲ្យគោរពវិន័យរបស់កងកម្លាំងនគរបាលជាតិលេខ ០០៦ បបជ, ត្រូវគោរពម៉ោងពេលវេលាបំពេញការងារ, ការស្លៀកពាក់ឯកសណ្ឋានឲ្យបានត្រឹមត្រូវក្នុងពេលបំពេញការងារ, ការគោរពគំនាប់ និងកាត់សក់ឲ្យបានខ្លីសមរម្យ, ធ្វើការសម្អាតកន្លែងបំពេញការងារឲ្យមានអនាម័យ សណ្តាប់ធ្នាប់ របៀបរៀបរយ ថែរក្សាឧបករណ៍ សម្ភារៈប្រើប្រាស់ដែលបម្រើឲ្យការបំពេញការងារជំនាញ ជាពិសេសឧបករណ៍ប្រព័ន្ធគ្រប់គ្រងព្រំដែនកម្ពុជា CBMS, មិនត្រូវប្រព្រឹត្ត រឺ មានការពាក់ព័ន្ធនឹងល្បែងស៊ីសងគ្រប់ប្រភេទ និងមិនត្រូវពិសារគ្រឿងស្រវឹង នៅតាមបណ្ដាគោលដៅ ក្នុងម៉ោងពេលបំពេញការងារ, ត្រូវរួសរាយរាក់ទាក់ ទន់ភ្លន់ តែម៉ឺងម៉ាត់ក្នុងពេលបំពេញការងារ និងបំរើសេវាជូនអ្នកដំណើរភ្ញៀវជាតិ-អន្តរជាតិ ឲ្យបានល្អដោយការនិយាយស្តីត្រូវមានក្រមសីលធម៌ ព្រមទាំងរៀបចំថែរក្សាសន្តិសុខសណ្តាប់ធ្នាប់ ក្នុងរង្វង់ភូមិសាស្ត្រប្រតិបត្តិការរបស់ប៉ុស្តិ៍ ឲ្យបានល្អប្រសើរ, ត្រូវមានសាមគ្គីភាពផ្ទៃក្នុងល្អ ជាពិសេសការដឹងសុខទុក្ខ និងចេះជួយយកអាសារគ្នាទៅវិញទៅមក ក្នុងគ្រាមានជួបទុក្ខលំបាកណាមួយ៕
