(ខេត្តកែប) ៖ កាលពីថ្ងៃទី១៧ ខែវិច្ឆិកា ឆ្នាំ២០២០ លោក អ៊ុក ថា អភិបាលរងខេត្ត និងជាអនុប្រធានគណៈកម្មការរៀបចំគម្រោងខេត្ត តំណាងឯកឧត្តម សោម ពិសិដ្ឋ អភិបាលនៃគណៈអភិបាលខេត្ត បានដឹកនាំមន្ត្រីជំនាញ ចុះកំណត់អក្ស័រផ្លូវ កំណត់ទំហំផ្លូវ និងសម្របសម្រួលដោះស្រាយផលប៉ះពាល់តាមបណ្ដោយផ្លូវ ដែលត្រូវអនុវត្តគម្រោងជួសជុលផ្លូវលំមួយខ្សែរ ស្ថិតនៅសង្កាត់ព្រៃធំ ក្រុងកែប ខេត្តកែប ។
លោកអភិបាលរងខេត្តមានប្រសាសន៍ថា ផ្លូវលំនេះមានប្រវែង សរុប ៣៦០០ ម៉ែត្រ ភ្ជាប់ពីផ្លូវជាតិលេខ ៣៣ ទៅភ្ជាប់ផ្លូវជាតិលេខ៣៣ អា ស្ថិតក្នុងភូមិសាស្តសង្កាត់ព្រៃធំ ក្រុងកែប ខេត្តកែប ត្រូវជួសជួល នឹងប្រែក្លាយ ជាផ្លូវ ប្រភេទ DBST ទទឹង ១០ ម៉ែត្រ ។
លោកបានបញ្ជាក់បន្ថែមទៀតថា ដោយគម្រោងជួសជួលផ្លូវនេះប្រើប្រាស់ថវិកាគុណប្រយោជន៍ខេត្ត ក្នុងឆ្នាំ២០២០ យើងមានលទ្ធភាពតែជួលជួល និងចាក់ជា DBST តែប្រវែង ២៦០០ម៉ែត្រ និងទទឹង១០ ម៉ែត្រ តែប៉ុណ្ណោះ ដោយឡែកប្រវែង ដែលនៅសល់ នឹងដាក់បញ្ជូលទៅក្នុងគម្រោងអទិភាពឆ្នាំក្រោយទៀត ។
លោកបន្ថែមទៀតថា ប្រទេសយើងមានសន្តិភាពសព្វថ្ងៃ ដោយសារនយោបាយឈ្នះឈ្នះ របស់លោកនាយករដ្ឋមន្ត្រី ហ៊ុន សែន ស្ថាបនិកសន្តិភាពនៅកម្ពុជា បាននាំមកនូវសុខសន្តិភាព ស្ថិរភាពសង្គម ការឯកភាពជាតិពេញលេញក្នុងរយៈពេលជាង២ទសវត្សចុងក្រោយនេះ ទើបយើងមានឱកាសអភិវឌ្ឍន៍ខេត្ត តាមរយៈសាងសង់ផ្លូវ គមនាគមន៍ សាលារៀន មន្ទីរពេទ្យ ដើម្បីបម្រើអោយផលប្រយោជន៍ប្រជាជនជារួម ។ ទាំងនេះជាយុទ្ធសាស្ត្រមួយ ក្នុងចំណោមយុទ្ធសាស្ត្រជាច្រើន ដើម្បីប្រែក្លាយខេត្តកែប ជាខេត្តទេសចរណ៍ មានផ្លូវគមនាគមន៍ខ្វាត់ខ្វែង ក្នុងន័យសម្រួលការធ្វើដំណើររបស់បងប្អូនប្រជាពលរដ្ឋ នៅក្នុងខេត្តឲ្យបានកាន់តែប្រសើរ៕
សេង ណារិទ្ធ
