(មណ្ឌលគិរី) ÷ប្រពភពីប្រជាពលរដ្ធដែលរស់នៅស្រុកកែវសីមាបានឲ្យដឹងថា បច្ចុប្បន្នលោក សា ផល្លា នាយប៉ុស្តិ៍នគរបាលច្រកឡាប៉ាខេ កំពុងជាមួយក្រុមឈ្មួញដឹកជញ្ជូនឈើចេញទៅប្រទេសវោតណាមយ៉ាងរលូន។ ប្រភពដែលស្និទ្ធនឹងលោក សា ផល្លា នាយប៉ុស្តិ៍នគរបាលច្រកឡាប៉ាខេ បានបង្ហើបឲ្យដឹងថា ការដែលលោក សា ផល្លា ហ៊ានធ្វើអ្វីៗតាមអំពើចិត្តគឺដោយសារអាងមានលោក ឡោ សុខា ស្នងការនគរបាលខេត្តមណ្ឌលគិរី ជាមិត្តជិតស្និទ្ធរបស់ខ្លួន។ ជាក់ស្តែងលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បណ្តោយឲ្យលោក សា ផល្លា នាយប៉ុស្តិ៍នគរបាលច្រកឡាប៉ាខេ ធ្វើអ្វីៗតាមអំពើចិត្តមិនខ្វល់ពីការរិះគន់អ្វីទាំងអស់។
សកម្មជនព្រៃឈើនិងមន្ត្រីអង្គការក្រៅរដ្ឋាភិបាលក្នុងខេត្តមណ្ឌលគិរី បានឲ្យដឹងថា ករណីឈ្មួញដឹកជញ្ជូនឈើចេញទៅស្រុកយួនតាមច្រកឡាប៉ាខេ យ៉ាងពេញបន្ទុកគឺមានការឃុបឃិតពីសំណាក់លោក ប៉ៃ លិន មេបញ្ជាការកងរាជអាវុធហត្ថស្រុកកែវសីមា ផងដែរ។ រីឯលោក ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី កំពុងបណ្តោយឲ្យលោក ប៉ៃ លិន មេបញ្ជាការកងរាជអាវុធហត្ថស្រុកកែវសីមា ធ្វើអ្វីៗតាមអំពើចិត្ត។ ដូច្នេះហើយទើបមានសេចក្តីអំពាវនាវឲ្យថ្នាក់ដឹកនាំគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិចាត់វិធានការបង្ក្រាបបទល្មើសដឹកជញ្ជូនឈើខុសច្បាប់ចេញទៅប្រទេសវៀតណាមតាមច្រកព្រំដែនទ្វេភាគីឡាប៉ាខេ ជាបន្ទាន់។
ប្រភពពីមន្ត្រីនគរបាលនៅក្នុងស្នងការដ្ឋាននគរបាលខេត្តមណ្ឌលគិរី មួយចំនួនបានបង្ហើបឲ្យដឹងថា បើគ្មានការបើកដៃពីសំណាក់លោក ឡោ សុខា ស្នងការនគរបាលខេត្តមណ្ឌលគិរី ទេនោះគឺលោក សា ផល្លា នាយប៉ុស្តិ៍នគរបាលច្រកឡាប៉ាខេ មិនហ៊ានបើកបារ៉ាស់ឲ្យឈ្មួញដឹកជញ្ជូនឈើចេញទៅស្រុកយួនតាមអំពើចិត្តឡើយ។ ហេតុនេះថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន មិនគួរបណ្តែតបណ្តោយតទៅទៀតទេព្រោះបច្ចុប្បន្នលោក ឡោ សុខា ស្នងការនគរបាលខេត្តមណ្ឌលគិរី បណ្តោយឲ្យលោក សា ផល្លា នាយប៉ុស្តិ៍នគរបាលច្រកឡាប៉ាខេ ធ្វើអ្វីៗតាមអំពើចិត្តរបស់ខ្លួន។ ប្រការនេះកំពុងធ្វើឲ្យព្រៃឈើដែលនៅសេសសល់ក្នុងស្រុកកែវសីមា ត្រូវប្រឈមនឹងសេចក្តីវិនាសព្រោះសមត្ថកិច្ចប្រចាំច្រកឡាប៉ាខេ បើកដៃឲ្យឈ្មួញដឹកជញ្ជូនឈើចេញទៅប្រទេសវៀតណាមយ៉ាងរលូន៕
