ខេត្តកែប ៖ ព្រឹកថ្ងៃទី០៩ ខែវិច្ឆិកា ឆ្នាំ២០២០ ឯកឧត្តម សោម ពិសិដ្ឋ អភិបាលខេត្ត ឯកឧត្តម សំ សារីន ប្រធានក្រុមប្រឹក្សាខេត្ត ឯកឧត្តម សាត សាមី រដ្ឋលេខាធិការក្រសួងឩស្សាហ៍កម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឯកឧត្តម ទេព យុទ្ធី សមាជិកព្រឹទ្ធសភា និងឯកឧត្តម ងួន ប៊ៀន តំណាងរាស្ត្រមណ្ឌលខេត្តកែប បានចូលរួមជាគណៈអធិបតីក្នុងពិធីអបអរសាទរខួបអនុស្សាវរីយ៍លើកទី៦៧ នៃទិវាបុណ្យឯករាជ្យជាតិ ដែលកម្ពុជាទទួលបានឯករាជ្យពីអាណានិគមនិយមបារាំង ស្របជាមួយនឹងខួប៦៧ឆ្នាំ នៃការបង្កើតកងយោធពលខេមរភូមិន្ទនៅបរិវេណវិមានឯករាជ្យខេត្ត ។
ទិវាបុណ្យឯករាជ្យជាតិ ៩ វិច្ឆិកាបានរំលឹកឲ្យ យើងចងចាំជានិច្ច នូវព្រះរាជបូជនីយកិច្ចដ៏ឧត្តុង្គឧត្តម ព្រះរាជបេសកកម្ម ដើម្បីជាតិមាតុភូមិនិងប្រជារាស្ត្រខ្មែរ របស់ព្រះករុណាព្រះបាទ សម្តេចព្រះ នរោត្តម សីហនុ ព្រះបិតាឯករាជ្យជាតិព្រះបរមរតនកោដ្ឋ ដែលព្រះអង្គបានលះបង់ព្រះកាយពលនិងព្រះបញ្ញាញាណយ៉ាងក្លៀវក្លាបំផុតធ្វើការតស៊ូក្នុងក្របខ័ណ្ឌនៃព្រះរាជបូជនីកិច្ចដើម្បីទាមទារឯករាជ្យដ៏ពិតប្រាកដនៅកម្ពុជា។
ថ្នាក់ដឹកនាំខេត្តមន្ត្រីរាជការ និងប្រជាពលរដ្ឋទូទាំងខេត្តកែប មានការជឿជាក់ថាការរួបរួមគ្នារបស់យើងជាធ្លុងមួយនេះ នឹងជួយស្រោចស្រង់ប្រទេសយើងនិងឯករាជ្យយើងឲ្យឆ្លងសមុទ្រគ្រោះថ្នាក់ដែលមាននៅមុខយើងនេះបានផុតស្រឡះដោយជ័យមង្គល។
ក្រោមព្រះរាជបូណីយកិច្ចដ៏ឧត្តុង្គឧត្តមនៃព្រះវររាជបិតាឯករាជ្យជាតិប្រទេសកម្ពុជាទទួលបានឯករាជ្យដ៏ពេញលេញបរិបូរណ៍ពីសាធារណរដ្ឋបារាំងនាថ្ងៃទី០៩ខែវិច្ឆិកាឆ្នាំ១៩៥៣។ប្រទេសកម្ពុជាក្រោយពីទទួលបានឯករាជ្យដោយមានព្រះករុណាព្រះបរមរតនកោដ្ឋជាទីគោរពសក្ការៈដ៏ខ្ពង់ខ្ពស់បំផុតជាព្រះអគ្គមគ្គុទ្ទេសដ៏ឆ្នើមបានដឹកនាំកម្ពុជាប្រកបដោយសុខសន្តិភាពនិងភាពរីកចម្រើនលើគ្រប់វិស័យក្រោមព្រះរាជតម្រិៈដឹកនាំដ៏ខ្ពង់ខ្ពស់និងឧត្តុង្គឧត្តមនៃព្រះវររាជបិតាឯករាជ្យជាតិព្រះបិតាស្ថាបនិកសម័យសង្គមរាស្ត្រនិយមរហូតធ្វើឲ្យពិភពលោកទទួលស្គាល់និងប្រសិទ្ធិនាមព្រះរាជាណាចក្រកម្ពុជាថាកោះសន្តិភាពនាអាស៊ីអាគ្នេយ៍។
ឯកឧត្តម សោម ពិសិដ្ឋ អភិបាលខេត្តបានមានប្រសាសន៍ថាក្នុងជីវភាពប្រទេសជាតិនីមួយៗគ្មានអ្វីឲ្យមានតម្លៃជាងឯករាជ្យទេព្រោះឯករាជ្យជាមូលដ្ឋាននៃសេចក្តីថ្លៃថ្នូរនិងសុភមង្គលទាំងទ្បាយដ៏ទៃទៀត។
ឯកឧត្តម បានបន្ថែមទៀតថា ក្រោយពីការដាក់ចេញនូវយុទ្ធសាស្ត្រឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែន ប្រទេសកម្ពុជាយើងមានឯករាជ្យពេញបរិបូរណ៍ ដែលជាឱកាសសម្រាប់យើងរួមគ្នាកសាងអភិវឌ្ឍន៍ប្រទេសជាតិ អោយមានការីកចម្រើនកាន់តែខ្លាំងឡើងៗ ។
ជាក់ស្តែងខេត្តកែប មានការអភិវឌ្ឍន៍ខ្លាំងលើគ្រប់វិស័យ ជាពិសេសទេសចរណ៍ បានកាត់បន្ថយអាត្រាភាពក្រីក្ររបស់ប្រជាពលរដ្ឋមកត្រឹម៣,១៨% គិតត្រឹមដើមឆ្នាំ២០២០ នេះ ។
ចុងបញ្ចប់ ឯកឧត្តម បានបញ្ជាក់ទៀតថា ដើម្បីធានាបាននូវសុខសន្តិភាពអោយបានគង់វង្សជានិរន្តន៍ យើងទាំងអស់ត្រូវតែការពារសុខសន្តិភាពដែលមានស្រាប់ ហើយខិតខំអភិវឌ្ឍន៍មូលដ្ឋានឲ្យកាន់តែមានការរីកចម្រើន និងចូលរួមឲ្យបានម៉ឺងម៉ាត់ក្នុងការអនុវត្តនូវគោលនយោបាយភូមិឃុំមានសុវត្ថិភាព ដោយលុបបំបាត់រាល់បទល្មើសនានាក្នុងមូលដ្ឋាន ក៍ដូចជារួមគ្នាថែរក្សាអនាម័យអោយបានជាប់ជានិច្ច ដើម្បីរួមគ្នាទប់ស្កាត់ការឆ្លងរីករាលដាលជំងឺកូវីដ១៩ នៅកម្ពុជាផងដែរ ។
យើងចងចាំជានិច្ចឧបការគុណយុទ្ធជន និងបុព្វបុរសដែលបានពលីជីវិតដើម្បីជាតិ និងប្រជាជន៕
