(ខេត្តកំពត)៖ ដើម្បីធ្វើឲ្យប្រសើរឡើងក្នុងការអនុវត្ត បំពេញតួនាទី ភារកិច្ច និងមុខងារ នៃរដ្ឋបាលឯកភាពក្រុង ស្រុក ខណ្ឌ ឲ្យបានកាន់តែមានលក្ខណៈប្រសើរថែមទៀត កាលពីថ្ងៃទី០៤ ខែវិច្ឆិកា ឆ្នាំ ២០២០ លោក ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ និងប្រតិភូជាសហការី លោក ជាវ តាយ អភិបាលនៃគណៈអភិបាលខេត្ត បានជួបជាមួយ ថ្នាក់ដឹកនាំ មន្ត្រីរាជការនៃរដ្ឋបាលស្រុកឈូកនិងក្រុងកំពត ដើម្បីសិក្សាស្រាវជ្រាវ ទាក់ទងការអនុវត្តតួនាទីភារកិច្ចនិងមុខងាររបស់រដ្ឋបាលក្រុង ស្រុក ខណ្ឌ។
លោក ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ បានលើកឡើងថា នៅក្នុងឆ្នាំ២០២០ នេះ គឺជាការចាប់ផ្ដើមអនុវត្តគោលការណ៍របស់រាជរដ្ឋាភិបាលដែលបានដាក់ចេញនូវការកែទម្រង់ប្រពន្ធ័គ្រប់គ្រងរដ្ឋបាលសាធារណៈនៅថ្នាក់ក្រោមជាតិ តាមគោលនយោបាយវិមជ្ឈការនិងសហវិមជ្ឈការ ស្ដីពីការធ្វើសមាហរណកម្មបុគ្គលិកនិងការរៀបចំតួនាទីភារកិច្ចមុខតំណែងគ្រប់គ្រងនៅក្នុងរចនាសម្ព័ន្ធថ្មីរដ្ឋបាល ក្រុងស្រុក ខណ្ឌ សំដៅការធានាដល់ការផ្ទេរសិទ្ធិ ផ្ទេរអំណាច ផ្ទេរមុខងារ និងធនធានទៅឱ្យរដ្ឋបាលថ្នាក់ក្រោមជាតិ ដែលនៅកៀកជិតប្រជាពលរដ្ឋ ក្នុងការទទួលខុសត្រូវលើការគ្រប់គ្រង ការចាត់ចែង និងការប្រើប្រាស់សិទ្ធិអំណាចនិងធនធានទាំងនោះ សម្រាប់ការផ្តល់សេវា និងការអភិវឌ្ឍន៍នៅមូលដ្ឋានឆ្លើយតបទៅនឹងតម្រូវការរបស់ប្រជាពលរដ្ឋឲ្យបានកាន់តែប្រសើរនិងប្រកបដោយប្រសិទ្ធភាព។
ប៉ុន្តែបើទោះបីរចនាសម្ព័ន្ធថ្មីរបស់រដ្ឋបាលក្រុងស្រុកខណ្ឌ ដែលបានដាក់ឲ្យដំណើរការអស់រយៈពេលជិត មួយឆ្នាំនេះទទួលបានលទ្ធផលល្អប្រសើរយ៉ាងណាក្ដី។ ប៉ុន្តែក៏នៅមានបញ្ហាប្រឈម កើតឡើងសម្រាប់រដ្ឋបាលក្រុង ស្រុក ខណ្ឌ នីមួយៗជៀសមិនផុត។ ដូច្នេះការជួបជាមួយរដ្ឋបាលក្រុងស្រុកនាពេលនេះ គឺក្នុងគោលបំណង សិក្សាពីបញ្ហាប្រឈមនិងបទពិសោធន៍ កន្លងមកទាក់ទងការអនុវត្តរចនាសម្ព័ន្ធថ្មី នៃការគ្រប់គ្រងរបស់រដ្ឋបាលក្រុងស្រុក សំដៅធ្វើយ៉ាងណាជំរុញ ឱ្យមានចីរភាព និរន្តរភាព ក្នុងការអភិវឌ្ឍន៍មូលដ្ឋានតាមបែបប្រជាធិបតេយ្យនៅថ្នាក់ក្រោមជាតិ ក្នុងការបម្រើសេវាជូនប្រជាពលរដ្ឋស្របតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ។ ពិសេសការបំពេញតួនាទីភារកិច្ចនិងមុខងាររបស់រដ្ឋបាលក្រុង ស្រុក ឲ្យបានកាន់តែល្អប្រសើរឡើងថែមទៀត។
លោក ជាវ តាយ អភិបាលខេត្តកំពត បានចាត់ទុកបេសកកម្មការងាររបស់ថ្នាក់ដឹកនាំ និងមន្ត្រីអគ្គនាយកដ្ឋានរដ្ឋបាលក្រសួងមហាផ្ទៃដែលបានជួបជាមួយរដ្ឋបាលក្រុង ស្រុកនាពេលនេះ គឺពិតជាបានឆ្លើយតបជា មូលដ្ឋាននៃការលើកកម្ពស់ប្រសិទ្ធិភាពការងារ ការគោរពច្បាប់និង គោលការណ៍នានារបស់រដ្ឋ និងពង្រឹងរបៀបរបបការងារ ទទួលខុសត្រូវ ភាពជាម្ចាស់របស់មន្ត្រី នៅក្នុងការបំពេញតួនាទី ភារកិច្ច មុខងារ នោះក្នុងដំណើរការអភិវឌ្ឍន៍មូលដ្ឋាន ឆ្លើយតបបានចំពោះតម្រូវការ របស់ប្រជាពលរដ្ឋ ក្នុងដែនសមត្ថកិច្ចរបស់ខ្លួនបានកាន់តែល្អប្រសើរនិងមានប្រសិទ្ធភាពថែមទៀត៕ សេង ណារិទ្ធ
