ខេត្តកែប ៖ មន្ត្រីនៃមន្ទីរព័ត៌មានខេត្តកែបម្នាក់ ត្រូវសមត្ថកិច្ចឃាត់ខ្លួន បន្ទាប់ពីស្រាវជ្រាវដឹងថា ជនសង្ស័យរូបនោះគំរាមកំហែងកេរ្ត៍ និងកំហែងទារប្រាក់ តាមបណ្តាញសង្គមក្នុងអំឡុងពេលថ្មីៗនេះ ហើយការឃាត់ខ្លួនជនសង្ស័យធ្វើឡើងកាលពីរសៀលថ្ងៃទី០៤ ខែវិច្ឆិកា ឆ្នាំ២០២០ ត្រង់ចំណុចភូមិសាស្ត្រទឹកដីក្រុងកែប។
សមត្ថកិច្ចខេត្តកែបបានបញ្ជាក់ថា អនុវត្តតាមការដឹកនាំចង្អុលបង្ហាញពីលោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប កម្លាំងផែនការងារនគរបាលព្រហ្មទណ្ឌ ផែនការងារសន្តិសុខ និងកម្លាំងអធិការដ្ឋាននគរបាលក្រុង កែប បានចុះស៊ើបអង្កេត ស្រាវជ្រាវ បង្ក្រាបករណីគំរាមហែកកេរ្ត៍ និងកំហែងទាប្រាក់ តាម facebook (តាមបណ្តឹងជនរងគ្រោះ) ដោយចាប់ឃាត់ខ្លួនជនសង្ស័យម្នាក់ឈ្មោះ អ៊ុង ចន្ថា ភេទប្រុស អាយុ៣៨ឆ្នាំ មុខរបរមន្ត្រីមន្ទីរព័ត៌មានខេត្តកែប រស់នៅភូមិអូរក្រសារ សង្កាត់អូរក្រសារ ក្រុងកែប ខេត្តកែប ដើម្បីចាត់ការតាមនីតិវិធី។
ក្រោយធ្វើការសាកសួរជនសង្ស័យបានសារភាពថាខ្លួនពិតជាបានប្រព្រឹត្តលើករណីនេះជាច្រើនលើកមកហើយ ។ ក្រោយពីស្រង់ចម្លើយជនសង្ស័យត្រូវបានសមត្ថកិច្ចបំពេញសំណុំរឿងបញ្ជូនទៅសាលាដំបូងចាត់ការតាមផ្លូវច្បាប់។
ចំពោះករណីដូចខាងលើ សមត្ថកិច្ច សូមសំណូមដល់បងប្អូនអ្នកលេងបណ្តាញសង្គមហ្វេសបុកទាំងអស់ សូមមេត្តាប្រុងប្រយ័ត្នឲ្យបានខ្ពស់ ចំពោះល្បិចកលផ្សេងៗរបស់ជនបោកប្រាស់តាមបណ្តាញសង្គមហ្វេសបុក បើមានការសង្ស័យសូមសហការរាយការណ៍ជូនកម្លាំងមានសមត្ថកិច្ចដែលនៅជិតលោកអ្នកបំផុត៕ សេង ណារិទ្ធ
