ខេត្តរតនគិរី ៖ ពិធីបុណ្យប្រណាំងទូក អកអំបុក សំពះព្រះខែ និងបណ្តែតប្រទីប តែងត្រូវបានរៀបចំធ្វើឡើងជារៀងរាល់ឆ្នាំនៅព្រះរាជាណាចក្រកម្ពុជា។ ការប្រណាំងទូក មានរយៈពេល ៣ថ្ងៃ គឺចាប់ពី ថ្ងៃ១៤ .១៥កើត ដល់ថ្ងៃ ១រោច ខែកក្តិក ហើយពេលយប់ ក៏មានការបណ្តែតប្រទីបផងដែរ។ ចំណែកឯពិធីបុណ្យអកអំបុក សំពះព្រះខែវិញ គេប្រារព្ធធ្វើឡើងនៅថ្ងៃទី២ នៃថ្ងៃបុណ្យអំទូក គឺនៅពាក់កណ្តាលរាត្រី នៃថ្ងៃ១៥កើត ខែកក្តិក។
ចំណែកខេត្តរតនគិរីឯណេះវីញ នៅល្ងាចថ្ងៃទី៣១ ខែតុលា ឆ្នាំ២០២០ វេលាម៉ោង៥.២០នាទី ត្រូវនឹងថ្ងៃ១៥កើត ខែកត្ដិក ឆ្នាំជូត ពស.២៥៦៤ ឯកឧត្ដម ប៊ូ ឡាំ តំណាងរាស្ត្រ មណ្ឌលរតនគិរី និងលោកជំទាវ លោក ទន់ ពៅ ចៅសង្កាត់កាចាញ ព្រមទាំងព្រះចៅអធិការ វត្តគិរីរុក្ខារាម ហៅ វត្តភ្នំបេង ស្ថិតក្នុងភូមិ២ សង្កាត់កាចាញ ក្រុងបានលុង ខេត្តរតនគិរី បានធ្វើពិធីបុណ្យអកអំបុក មានសម្រក់ទាន ដើមឆ្នាំ កណ្ដាលឆ្នាំ និងចុងឆ្នាំ ដើម្បីផ្សងមើលទឹកភ្លៀង ព្រមទាំងបង្ហោះគោមចំនួន ២០០គោមផងដែរ។
ក្នុងពិធីបុណ្យអកអំបុកនេះ មានការចូលរួមយ៉ាងកុះករ ពីសំណាក់ប្រជាពលរដ្ឋ ឧបាសក់ ឧបាសិកាចំណុះជើងវត្ត ព្រមទាំងមន្ត្រីរាជការនៅក្នុងខេត្តរតនគិរីផងដែរ។
គួរំលឹកថា ពិធីបុណ្យអុំទូកនេះ មានដើមកំណើតតាំងពីរជ្ជកាលព្រះបាទជ័យវរ្ម័នទី៧មកម្លេះ ក្នុងអំឡុងឆ្នាំ ១១៧៧ ពួកចាមបានលើកទ័ពមកធ្វើការលុកលុយ និងត្រួតត្រាប្រទេសកម្ពុជាអស់រយៈពេលប្រមាណជា៤ឆ្នាំ។ គ្រានោះព្រះបាទជ័យវរ្ម័នទី៧ បានបង្រួបបង្រួមជាតិ និងចំណាយពេលវេលារៀបចំយុទ្ធសាស្ត្រកងទ័ព ដើម្បីប្រយុទ្ធប្រឆាំងចំពោះពួកចាម រហូតទទួលបានជ័យជម្នះ ហើយព្រះអង្គបានឡើងគ្រងរាជសម្បត្តិ ដឹកនាំប្រទេសជាតិ នៅឆ្នាំ១១៨១ និងបានធ្វើឱ្យប្រទេសជាតិមានការរីកចម្រើន រុងរឿងដល់កម្រិតកំពូលថែមទៀតផង។ ប្រវត្តិសាស្ត្រត្រង់នេះហើយ ទើបនាំឲ្យប្រជាពលរដ្ឋកម្ពុជា ប្រារព្ធធ្វើពិធីបុណ្យនេះឡើង ដើម្បីរម្លឹកដល់គំរូវីរភាពដ៏អង់អាចក្លាហានរបស់កងទ័ពជើងទឹករបស់ខ្មែរ ដែលបានរំដោះទឹកដី ឲ្យរួចផុតពីការជិះជាន់របស់ពួកចាម ដែលជាខ្មាំងសត្រូវរបស់ខ្មែរនាសម័យនោះ។
ពិធីនេះបានទទួលការគាំទ្រពីសំណាក់ប្រជាពលរដ្ឋគ្រប់ទិសទី គ្រប់ស្រទាប់វណ្ណៈ ហើយតែងនាំគ្នាប្រារព្ធជារៀងរាល់ឆ្នាំ ដោយមានការប្រណាំងទូកអុំ និងទូកចែវបុរស-នារី។ ពិធីបុណ្យអុំទូក ក៏បានភ្ជាប់នឹងពិធីផ្សេងៗ ទៀតផងដែរ គឺការបណ្ដែតប្រទីប អកអំបុក និងសំពះព្រះខែ ដែលជាការឆ្លុះបញ្ចាំងពីជំនឿសាសនាយ៉ាងមុតមាំ។ ថ្ងៃទី២ នៃថ្ងៃបុណ្យអំទូក គឺថ្ងៃ១៥ ខែកត្តិក ជាពិធីអកអំបុក និងសំពះព្រះខែ ត្រូវបានប្រជាពលរដ្ឋខ្មែរធ្វើឡើង ដើម្បីរម្លឹកដល់ព្រះពោធិសត្វ ដែលយាងយកកំណើតជាទន្សាយ ដោយគ្រានោះ ព្រះអង្គបានលះបង់អាយុសង្ខារដល់ព្រះឥន្ទ្រាធិរាជ ដើម្បីបំពេញទានបារមី។ រឿងរ៉ាវនៃព្រះពោធិសត្វនេះហើយ ដែលនាំឲ្យអ្នកស្រុកតែងតែរៀបចំប្រារព្ធពិធីអកអំបុក សំពះព្រះខែនេះ ជារៀងរាល់ឆ្នាំ នៅតាមវត្តអារាម ភូមិស្រុក និងទីប្រជុំជននានា ដោយមានចេក អំបុក ទឹកដូង ផ្លែឈើ ជាដើម ដើម្បីរម្លឹកដល់ព្រះពោធិសត្វ ដោយសារតែមានជំនឿបែបនេះឯង៕
