(ខេត្តកំពត)៖ ជាការពិតណាស់ ភ្នំស ក្នុងស្រុកកំពង់ត្រាច ខេត្តកំពត កាលពីមុនធ្លាប់តែមានភាពស្ងប់ស្ងាត់ តែពេលនេះបែរជាមានមនុស្សកកកុញខុសពីធម្មតា គាប់ជួនរដូវបុណ្យអុំទូក បណ្តែតប្រទីប សំពះព្រះខែ និងអកអំបុក ឈានចូលមកដល់ គេសង្កេតឃើញក្រុមអ្នកទេសចរណ៍ ក្នុងស្រុកនិងក្រៅស្រុក នាំគ្នាទៅទស្សនាកម្សាន្តដូចទឹកបាក់ទំនប់។
ក្នុងឱកាសព្រះរាជពិធីបុណ្យអំុទូក នាថ្ងៃទី៣១ ខែតុលា ឆ្នាំ២០២០ ដែលជាថ្ងៃចុងក្រោយ មនុស្សជាច្រើនបាននាំគ្នាទៅទស្សនា កម្សាន្តយ៉ាងច្រើនកុះករ ព្រោះក្នុងពិធីនោះក្រៅពីមានការប្រណាំងទូក ក៏មានការប្រណាំសេះជាច្រើនគូរ នៅមុខវត្ត ពោធិរាជលំពូ ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត។
ជាមួយគ្នានេះ គេបានព្យាករណ៍ថា ភ្នំស ស្រុកកំពង់ត្រាច ក្នុងពេលអនាគតនឹងក្លាយជាតំបន់ទេសចរណ៍មួយយ៉ាងស្រស់ត្រកាល ដោយសារតំបន់ខាងលើមានភ្នំ និងបឹង រំលេចដោយទេសភាពស្រស់បំព្រង ហើយនៅរដូវប្រាំងទឹកក៏មិនដែលរីងហួតហែងនោះដែរ កត្តាបែបនេះជាគន្លឹះទាក់ទាញក្រុមអ្នកទេសចរណ៍ជិត ឆ្ងាយ សម្រុកមកលំហែ កម្សាន្ត នៅតំបន់ទេសចរណ៍ភ្នំស កំពង់ត្រាច កាន់តែច្រើនឡើងៗ ។
ទាក់ទិននឹងកំណើនមនុស្សដ៏ច្រើនលើសលប់ នៃតំបន់ទេសចរណ៍ ភ្នំកំពង់ត្រាច ជាប់បរិវេណ វត្តពោធិរាជលំពូ មហាជនសង្ឃឹមថា អាជ្ញាធរ និងអង្គភាពជំនាញ នឹងយកចិត្តទុកដាក់ក្នុងការជំរុញ ធ្វើការអភិវឌ្ឍន៍ តំបន់នេះឲ្យកាន់តែមានភាពស្រស់ត្រកាលបន្ថែមទៀត ដើម្បីជួយលើកកម្ពស់វិស័យទេសចរណ៍ ឲ្យកាន់តែមានការរីកចម្រើន៕ សេង ណារិទ្ធ
