(ខេត្តកំពត)៖ ក្នុងឱកាសនៃរដូវកាលពិធីបុណ្យកឋិនទាន ដែលពុទ្ធបរិស័ទខ្មែរយើងតែងប្រតិបត្តិធ្វើឡើងតាមទីវត្តអារាមនានាក្នុងទូទាំងប្រទេស នៅថ្ងៃសុក្រ ១៤កើត ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី ៣០ ខែតុលា ឆ្នាំ២០២០ លោកស្រី លាង ហៃ ជាវតាយ អនុប្រធានអចិន្ត្រៃយ៍គណៈកម្មាធិការសាខា ព្រមទាំង លោក លោកស្រី សមាជិកគណៈកម្មាធិការសាខា ក្រុមប្រតិបត្តិសាខា និងយុវជនកាកបាទក្រហម បាននាំយកទេយ្យទាន និងបច្ច័យប្រកបដោយសទ្ធាជ្រះថ្លាក្នុងផ្លូវព្រះពុទ្ធសាសនារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពជា ទៅវេរ ប្រគេនដល់ព្រះសង្ឃក្នុងពិធីបុណ្យកឋិនទានសាមគ្គី វត្តស្នំប្រាំពីរ ស្ថិតក្នុងឃុំម៉ាក់ប្រាង្គ ស្រុកទឹកឈូ ខេត្តកំពត។
នាឱកាសនោះលោកស្រី លាង ហៃ ជាវ តាយអនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជាខេត្តកំពតក៏បាន ជូនកុសលផលបុណ្យ ដល់សម្ដេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន ប្រធានកាកបាទក្រហមកម្ពុជាព្រមទាំង លោក លោកស្រី និងសហការី ដែលបានចូលរួមចាប់មគ្គផល និងអនុមោទនា ទទួលយកនូវផល្លានិសង្ឃផលបុណ្យតាមសទ្ធាជ្រះថ្លារៀងៗខ្លួនពីបុណ្យអង្គកឋិនទានសាមគ្គីនេះ ដើម្បីរួមគ្នាបន្តលើក ជ្រោងខ្ពស់ព្រះពុទ្ធសាសនាដែលជាសាសនារបស់រដ្ឋនៅកម្ពុជាយើងឲ្យបានកាន់តែរុងរឿងថ្កុំថ្កើងបន្ថែមទៀត។
សម្ភារៈនិងបច្ច័យដែលបានវេរប្រគេនព្រះសង្ឃនៅក្នុងបុណ្យអង្គកឋិនទានសាមគ្គីនេះរួមមាន ៖ អង្ករ៥០គីឡូក្រាម អំបិល៥០គីឡូក្រាម ទឹកបរិសុទ្ធ៥កេស ទឹកក្រូច៥កេស ទឹកដោះគោខាប់១កេស ស្ករស៥០គីឡូក្រាម និងបច្ច័យរបស់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំនួន១០លានរៀលផងដែរ៕ សេង ណារិទ្ធ
