សៀមរាប ៖ នៅថ្ងៃទី១៨ខែតុលា ឆ្នាំ២០២០ ឯកឧត្តម សែម សុវណ្ណនី ប្រធានក្រុមការងាររាជរដ្ឋាភិបាល ចុះជួយឃុំខ្នារសណ្តាយ លោកជំទាវ និងក្រុមការងារ បាននាំយកអំណោយ របស់ សម្តេចតេជោ ហ៊ុន សែន នាយករដ្ឋមន្ត្រី ចែកជូនប្រជាពលរដ្ឋ៤៧៥គ្រួសារ នៅឃុំខ្នារសណ្តាយ ស្រុកបន្ទាយស្រី ខេត្តសៀមរាប ទទួលរងប៉ះពាល់ ដោយជំនន់ទឹកភ្លៀង។
ឯកឧត្តម សែម សុវណ្ណនី បានមានប្រសាសន៍ថា អរគុណសន្តិភាព អរគុណ នយោបាយ ឈ្នះ ឈ្នះ ដឹងគុណ ស្ថាបនិក មគ្គុទេសឯក និងប្រតិបត្តិករនយោបាយឈ្នះ ឈ្នះ ដែល នាំមកនូវសន្តិភាព និងឯកភាពជាតិពេញ លេញ។
ក្នុងការចុះពិនិត្យស្ថានភាពទឹកនេះផងដែរ ឯកឧត្តម សែម សុវណ្ណនី និងលោកជំទាវ បានជួបសួរសុខទុក្ខ និងចែកអំណោយដូចជា អង្ករ មី ទឹកសុទ្ធ ទឹកក្រូច មុង និងថវិកា សរុបថវិកាចំណាយទាំងអស់ជិតពីរមុឺនដុល្លារអាមេរិក ចែកជូនដល់គ្រួសារដែលរងគ្រោះដោយសារជំនន់ទឹកភ្លៀង។
ក្នុងពេលនោះដែរ ឯកឧត្តម ក៏បានបញ្ជូនក្រុមការងារជំនាញ និងទូកអូប័រចំនួន៣ គ្រឿងទៅកាន់ ឃុំខ្នារសណ្តាយ ដើម្បីត្រៀមជួយសង្គ្រោះបងប្អូនប្រជាពលរដ្ឋយើងនៅតំបន់នោះផងដែរ ។
ឯកឧត្តម សែម សុវណ្ណនី ក៏បានអំពាវនាវដល់បងប្អូនប្រជាពលរដ្ឋ និងសាធារណជន មេត្តាបង្កើនការយកចិត្តទុកដាក់និងប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ជាពិសេសសត្វសាហាវ ដែលអាចកើតឡើងជាយថាហេតុ ព្រមទាំងចូលរួមសហការ និងផ្តល់ព័ត៌មានជូនដល់អាជ្ញាធរមានសមត្ថកិច្ចដែលនៅជិតបំផុត ដើម្បីជួយអន្តរាគមន៍បានទាន់ពេលវេលា៕
