រសៀលថ្ងៃសៅរ៍ ១កើត ខែកក្តិក ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី១៧ ខែតុលា ឆ្នាំ២០២០ ឯកឧត្តម គួច ចំរើន ប្រធានគណៈកម្មាធិការសាខាកាកបាទ ក្រហមកម្ពុជាខេត្តព្រះសីហនុ ទទួលអំណោយសប្បុរសធម៌ពី ព្រះសង្ឃវត្តឥន្ទញ្ញាណ ឯកឧត្តម លោក ជំទាវ លោកឧកញ៉ា លោកស្រី ដែលបានឧបត្ថម្ភដល់សាខាកាកបាទក្រហមកម្ពុជាខេត្តព្រះសីហនុ ។
ឯកឧត្តម គួច ចំរើន ប្រធានគណៈកម្មាធិការសាខាកាកបាទក្រហមកម្ពុជាខេត្ត បានថ្លែងអំណរគុណចំពោះព្រះសង្ឃវត្តឥន្ទញ្ញាណ និង ឯកឧត្តម លោកជំទាវ លោកឧកញ៉ា លោកស្រី ដែលបានចូលរួមក្នុងការងារសង្គម និងបានឧបត្ថម្ភជាគ្រឿងឧបភោគ គ្រឿងបរិភោគ មាន មី ទឹកត្រី ទឹកស៊ីអ៉ីវ ក្រម៉ា និងថវិកា ដល់សាខាកាកបាទក្រហមខេត្តព្រះសីហនុ ដើម្បីចូលរួមជួយដល់ប្រជាពលរដ្ឋរងគ្រោះ ប្រជាពលរដ្ឋក្រីក្រ ចាស់ជរាគ្មានទីពឹង កុមារកំព្រា និងគ្រោះធម្មជាតិផ្សេងៗ ។
ឯកឧត្តម គួច ចំរើន សង្ឃឹមជឿជាក់ថា សប្បុរសជននឹងបន្តសកម្មភាពមនុស្សធម៌ឧបត្ថម្ភដល់សាខាកាកបាទក្រហមកម្ពុជាខេត្តព្រះសីហនុ ក៏ដូចជាអាជ្ញាធរខេត្ត ក្នុងការជួយសង្គ្រោះជនរងគ្រោះក្នុងខេត្តព្រះសីហនុ បន្តទៀត ៕\
