(ខេត្តកំពត)៖ បន្ទាប់ពីមានភ្លៀងធ្លាក់ជាច្រើនថ្ងៃកន្លងមក និងឈានដល់ការប្រកាសជូនដំណឹងរបស់គណៈកម្មាធិការគ្រប់គ្រងគ្រោះមហន្តរាយខេត្តកំពត ស្ដីពី ស្ថានភាពទឹកក្នុងអាងទំនប់វារីអគ្គិសនីកំចាយ ដែលត្រូវធ្វើការបង្ហៀរទឹកចេញពីទំនប់ទៅតាមលក្ខណៈបច្ចេកទេស កាលពីព្រឹកថ្ងៃទី១៧ ខែតុលា ឆ្នាំ២០២០រួចមក នៅរសៀលថ្ងៃដដែលនេះដែរ លោក ជាវ តាយអភិបាលខេត្តកំពត បានដឹកនាំក្រុមការងារ ដែលមានថ្នាក់ដឹកនាំខេត្ត អាជ្ញាធរមូលដ្ឋាន មន្ទីរជំនាញពាក់ព័ន្ធ កងកម្លាំងនគរបាលខេត្ត កងកម្លាំងវរៈសេនាតូចនគរបាលការពារព្រំដែនទឹកលេខ២៤១ បានចុះទៅសួរសុខទុក្ខប្រជាពលរដ្ឋ និងពិនិត្យវាយតម្លៃពីស្ថានភាពទឹកនៅក្នុងភូមិសាស្ត្រ តាមដងព្រែកកំពង់បាយ រហូតដល់ព្រែកកំចាយ ក្នុងភូមិអណ្ដូងជីម៉ឺន ឃុំកំពង់គ្រែង ស្រុកទឹកឈូ ខេត្តកំពត។
លោក ជាវតាយ អភិបាលខេត្ត បានជួបសំណេះសំណាលសួរសុខទុក្ខជាមួយប្រជាពលរដ្ឋនាឱកាសនោះ ដោយបានបញ្ជាក់ថា សុខទុក្ខរបស់ប្រជាពលរដ្ឋ គឺជាសុខទុក្ខរបស់ថ្នាក់ដឹកនាំ ពិសេសសម្ដេចតេជោហ៊ុន សែននិងសម្ដេចកិត្តិព្រឹទ្ធបណ្ឌិត ដែលសម្ដេចតែងតែបានយកចិត្តទុកដាក់គិតគូរនិងផ្សាភ្ជាប់រូមសុខរួមទុក្ខជាមួយប្រជាពលរដ្ឋ គ្រប់កាលៈទេសៈគឺមិនបានទុកឲ្យប្រជាពលរដ្ឋណាម្នាក់រងគ្រោះដោយគ្មានការយកចិត្តទុកដាក់ពីថ្នាក់ដឹកនាំនិងអាជ្ញាធរមានសមត្ថកិច្ចឡើយ។
ទន្ទឹមនឹងនោះសម្ដេចតេជោ តែងតែបានក្រើនរំលឹកផ្ដាំផ្ញើដល់ថ្នាក់ដឹកនាំនិងអាជ្ញាធរមូលដ្ឋាន ត្រូវតែចុះផ្សារភ្ជាប់រួមសុខរួមទុក្ខលំបាកនិងដោះស្រាយជាមួយប្រជាពលរដ្ឋ ក្នុងហេតុការណ៍គ្រោះធម្មជាតិផ្សេងៗ ពិសេសក្នុងស្ថានភាពទឹកជំនន់នៅពេលនេះ ដើម្បីរួមសហការគ្នា ដោះស្រាយ និងបង្ការទប់ស្កាត់មិនឱ្យប្រជាពលរដ្ឋណាម្នាក់ស្លាប់ដោយគ្រោះទឹកជំនន់នហើយមិនបានយកចិត្តទុកដាក់គិតគូរដោះស្រាយបានឡើយ។
លោក ជាវ តាយ អភិបាលខេត្ត ក៏បានបញ្ជាក់ជូនដល់ប្រជាពលរដ្ឋផងដែរថា តាមការពិនិត្យវាយតម្លៃអំពីស្ថានភាពទឹក ដែលបានបង្ហូរចេញពីអាងទំនប់វារីអគ្គិសនីកំចាយ និងទឹកដែលបានហូរធ្លាក់ពីស្ទឹងកែវ មកចូលតាមដងព្រែកកំពុងបាយនេះ តាមការពិនិត្យជាក់ស្ដែង គឺមិនបានធ្វើឱ្យមានការព្រួយបារម្ភ ដែលនាំឱ្យរងផលប៉ះពាល់ លិចលង់ស្រែចម្ការ លំនៅដ្ឋានរបស់ប្រជាពលរដ្ឋដូចបណ្ដាឆ្នាំ កន្លងទៅនោះទេ។
លោកអភិបាលខេត្តបានបញ្ជាក់ពីមូលហេតុនេះថា គឺទី ១ នៅពេលបើកបង្ហៀរទឹកចេញពីទំនប់វ៉ារីអគ្គិសនីកំចាយ រដ្ឋបាលខេត្តតែងតែមានការគិតគូរសហការជាមួយនឹងក្រុមហ៊ុនវារីអគ្គិសនីកំចាយ ជាប្រចាំដោយជូនដំណឹងមកដល់អាជ្ញាធរខេត្ត ជាមុនហើយមានការបើកទឹកដោយលក្ខណៈបច្ចេកទេសជាសន្សឹមៗ និងទី២ នៅរយៈពេលកន្លងទៅ រដ្ឋបាលខេត្តមានការគិតគូរខ្ពស់ ពីបញ្ហាផ្លូវទឹកតាមដងព្រែកកំពង់បាយ គឺមានការស្ដារ ផ្លូវទឹកតាមដងព្រែក ធ្វើអោយទឹកហូរបានលឿន។ ប៉ុន្តែទោះបីយ៉ាងណាឯកឧត្តមអភិបាលខេត្ត ក៏នៅតែមានការអំពាវនាវ និងផ្ដាំផ្ញើដល់ប្រជាពលរដ្ឋដែលរស់នៅក្នុងភូមិសាស្ត្រតាមដងព្រែកកំពង់បាយនេះ និងអាជ្ញាធរមូលដ្ឋានគ្រប់លំដាប់ថ្នាក់ ត្រូវតែមានការយកចិត្តទុកដាក់តាមដានចំពោះស្ថានភាពទឹកនិងប្រុងប្រយ័ត្នខ្ពស់ចំពោះបញ្ហាដែលកើតឡើងដោយ យថាហេតុនូវជំនន់ទឹកភ្លៀងនេះ ព្រោះយើងមិនអាចកំណត់បានជាក់លាក់មុនបានឡើយ អំពីបញ្ហាគ្រោះធម្មជាតិ។
ក្នុងឱកាសនោះដែរ លោក ជាវ តាយអភិបាលខេត្តក៏បាន ជូន មីបញ្ចប់ដល់ប្រជាពលរដ្ឋនិងជូនថវិកាមួយចំនួនដល់កងកម្លាំងនវរៈសេនាតូចនគរបាលការពារព្រំដែនទឹកលេខ២៤១ផងដែរ៕ សេង ណារិទ្ធ
