(ខេត្តកំពត)៖ ទំនាស់វិវាទដីធ្លីរវាងក្រុមហ៊ុន លោកឧកញ៉ា សូ ងួន និងលោកឧកញ៉ា ប៉ែន នួន ត្រូវបានរកដំណោះស្រាយជាលើកទី២ ខណៈភាគីទាំងសងខាងទាមទាររកដំណោះស្រាយមួយប្រកបដោយភាពសុក្រឹត្យ ដែលតម្រូវឲ្យគណៈកម្មការដោះស្រាយទំនាស់ដីរដ្ឋជួយសម្របសម្រួល។
ក្នុងដំណោះស្រាយរួមគ្នាកាលពីព្រឹកថ្ងៃទី១៣ ខែតុលា ឆ្នាំ២០២០ ដែលមានការចូលរួមពីសំណាក់គណៈកម្មការដោះស្រាយទំនាស់ដីរដ្ឋខេត្តកំពត គេសង្កេតឃើញថា ភាគីលោកឧកញ៉ា សូ ងួន បានទាមទារឲ្យគណៈកម្មការវាស់វែងកំណត់ព្រំដោយភាពច្បាស់លាស់រវាងដីក្រុមហ៊ុនសូ ងួន និងដីរបស់លោកឧកញ៉ា បែន នួន ដែលមានលោកជំទាវ ច្រឹង ប៊ុនធឿន នៅគ្រប់គ្រង ស្ថិតក្នុងភូមិសាស្ត្រឃុំត្រពាំងភ្លាំង ស្រុកឈូក ខេត្តកំពត។
ចំពោះការដោះស្រាយរាល់បញ្ហាខាងលើនេះ លោកឧកញ៉ា សូ ងួន បានស្នើសុំឲ្យគណៈកម្មការត្រូវរៀបចំការកំណត់បោះបង្គោលព្រំដីឡើងវិញនៅចំណុចដីវិវាទ ធ្វើបែបនេះដើម្បីបញ្ចប់ជម្លោះ ព្រោះថាដីរបស់ក្រុមហ៊ុនលោកបានចុះបញ្ជីត្រឹមត្រូវ និងមានប្លង់រឹងដែលជួលពីមន្ទីរកសិកម្ម រុក្ខាប្រមាញ់និងនេសាទរួចហើយ។
ជាមួយគ្នានេះ លោកឧកញ៉ា សូ ងួន បានលើកឡើងដែរថា អ្វីដែលលោកចង់បានគឺការបោះបង្គោលកំណត់ព្រំឲ្យបានច្បាស់លាស់ ព្រោះដីធ្លីទាំងអស់ដែលក្រុមហ៊ុនគ្រប់គ្រងគឺជាដីសម្បទានសេដ្ឋកិច្ចជួលពីមន្ទីរកសិកម្ម រុក្ខាប្រមាញ់និងនេសាទក្នុងរយៈវែង ហើយទំហំដែលបាត់បង់នោះប្រមាណ៥០ហិកតា ស្ថិតត្រង់ព្រំប្រទល់តែម្តង។ហើយលោកឧកញ៉ា សូមទាមទារឲ្យគណៈកម្មការដោះស្រាយដីរដ្ឋវាស់វែងកំណត់ព្រំឲ្យបានជាក់លាក់ដើម្បីបញ្ចប់ទំនាស់។
សូមបញ្ជាក់ថា កាលពីសប្តាហ៍មុនមានការប៉ៈទង្គិចគ្នារវាងសន្តិសុខក្រុមហ៊ុន សូ ងួន និងប្រជាពលរដ្ឋដែលមកតាំងអាស្រមនៅចំណុចព្រំប្រទល់ខាងលើ។បន្ទាប់ពីមានការតតាំងគ្នានេះ អាជ្ញាធរខេត្តកំពត បាននិងកំពុងចាត់បញ្ជូនគណៈកម្មការនិងក្រុមការងារទៅដោះស្រាយដើម្បីបញ្ចប់វិវាទ៕ សេង ណារិទ្ធ
