(កំពង់ចាម) ÷នៅមន្ទីរកសិកម្មម រុក្ខាប្រមាញ់ និងនេសាទខេត្ត នាព្រឹកថ្ងៃសុក្រ ទី០៩ ខែតុលា ឆ្នាំ២០២០ លោក កែវ នាឬទ្ធិ អភិបាលរង ខេត្ត តំណាងឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានអញ្ជើញជាអធិបតីក្នុងពិធីប្រកាសតែងតាំងមន្ត្រីរាជការ ក្នុងរចនាសម្ព័ន្ធនៃមន្ទីរកសិកម្ម រុក្ខាប្រមាញ់ និងនេសាទខេត្ត ដោយមានការចូលរួមពីមន្ទីរមុខងារសាធារណៈខេត្តស្តីទី និងថ្នាក់ដឹកនាំ មន្ត្រីរាជការនៃមន្ទីរកសិកម្មរុក្ខាប្រមាញ់ និងនេសាទខេត្ត ជាច្រើនរូបផងដែរ។
ថ្លែងក្នុងឱកាសនោះ លោក កែវ នាឬទ្ធិ អភិបាលរងខេត្ត បានជំរុញដល់មន្ត្រីពាក់ព័ន្ធឲ្យកសាងសមត្ថភាពរបស់ខ្លួនបន្ថែមទៀត តាមរយះនៃការរៀនសូត្រ ព្រោះការសិក្សាមិនគិតពីអាយុ និងតួនាទីឡើយ ហើយអ្វីដែលសំខាន់នោះ គឺយើងជាមន្ត្រីជំនាញ ត្រូវធ្វើជាមន្ត្រីចុះមូលដ្ឋានឲ្យបានញឹកញាប់ ដើម្បីដឹងពី បញ្ហាប្រឈមជាមួយប្រជាពលរដ្ឋ និងដោះស្រាយជូនគាត់វិញទៅតាមជំនាញរបស់ខ្លួន ដោយកុំធ្វើឲ្យក្លាយជាមន្ត្រីជើង១០នោះឡើយ។
លោកអភិបាលរងខេត្ត ក៏បានសម្តែងនូវការកោតសរសើរ ចំពោះមន្ទីរកសិកម្ម រុក្ខាប្រមាញ់ ននិងនេសាទខេត្ត ដែលបានខិតខំប្រឹងប្រែងបំពេញការងារ ជំរុញឲ្យវិស័យកសិកម្មក្នុងខេត្តកំពង់ចាម ឲ្យមានកំណើនកើនឡើងពីមួយ ឆ្នាំទៅមួយឆ្នាំទាំងគុណភាព និងបរិមាណ គួរជាទីមោទនៈ ជាក់ស្តែងនៅក្នុងឆ្នាំ២០១៩-២០២០នេះ ខេត្តកំពង់ចាមយើងផលិតបាននៅលើផ្ទៃដីសរុបចំនួន ១៣៦ ១១៧ហ.ត បើគិតជា បរិមាណផលស្រូវសរុបរហូតដល់ទៅ៤៩៦ ៣០០តោន ហើយក្រោយពីការប្រើប្រាស់សម្រាប់ជាតម្រូវការនៅ ក្នុងខេត្តនោះ យើងក៏មាននៅសល់ស្រវសរុបចំនួន១៧០ ៥៧៣តោន សម្រាប់ធ្វើការនាំចេញក្រៅខេត្តផងដែរ។
ជាមួយគ្នានោះ លោក បានផ្តាំផ្ញើដល់មន្ត្រីដែលទើបនឹងតែងតាំង និងថ្មាក់ដឹកនាំ មន្ត្រីរាជការមន្ទីរកសិកម្ម ត្រូវអនុវត្តឲ្យបានខ្ជាប់ខ្ជួននូវគោលនយោបាយរបស់ រាជរដ្ឋាភិបាល ដោយមានទឹកចិត្តអំណត់អត់ធននឹងការងារ និងមានឆន្ទៈទទួលខុសត្រូវខ្ពស់ប្រកបដោយភាពបត់បែន ព្រមទាំងប្រកាន់យកនូវសាមគ្គីភាពល្អ នៅក្នុងអង្គភាព ជាពិសេសត្រូវបំពេញភារកិច្ច និងអនុវត្តតួនាទីរបស់ខ្លួនឲ្យបានល្អប្រសើរ និងមានក្រមសីលធម៌វិជ្ជាជីវ ផងដែរ។
គួរបញ្ជាក់ថា៖ មន្ត្រីរាជការដែលត្រូវប្រកាសតែងតាំងរួមមាន៖
១-លោក រឿង សូផាត ជានាយរង ខណ្ឌរដ្ឋបាលព្រៃឈើកំពង់ចាម នៃមន្ទីរកសិកម្ម រុក្ខាប្រមាញ់ និងនេសាទខេត្ត។
២-លោក កែវ មុនី ជានាយរង ផ្នែករដ្ឋបាលព្រៃឈើកំពង់ចាមត្រើយស្តាំ នៃមន្ទីរកសិកម្ម រុក្ខាប្រមាញ់ និងនេសាទ ខេត្ត។
៣-លោកស្រី ហួ សុភី ជាអនុប្រធានការិយាល័យផ្សព្វផ្សាយកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្ត៕
