ឯកឧត្តម ឃួង ស្រេង អភិបាលរាជធានីភ្នំពេញបានបញ្ជាក់នៅរសៀលថ្ងៃទី០៩ តុលា ឆ្នាំ២០២០នេះថា មកដល់ពេលនេះទាំង១៤ខណ្ឌនិងសង្កាត់ទាំង១០៥បាននិងកំពុងដុតដៃដុតជើងទាំងយប់ទាំងថ្ងៃដើម្បីធ្វើសកម្មភាពប្រមូលសំរាមនៅក្នុងរាជធានីភ្នំពេញ ដែលពេលនេះក្នុងមួយថ្ងៃយើងប្រមូលសំរាមបាន ប្រមាណ២០០០តោន ខណៈនៅរាជធានីភ្នំពេញ ក្នុងមួយថ្ងៃមានសម្រាមចំនួន២៨៦៥តោន។
ជាមួយគ្នានេះ លោកអភិបាលបានសម្តែងនូវការជឿជាក់ថា មិនយូរទេការប្រមូលសំរាមនឹងលែងជាបញ្ហា បើទោះបីកម្មករស៊ិនទ្រី ធ្វើកូដកម្មមិនប្រមូលសំរាមក៏ដោយ។
តាមការលើកឡើងរបស់ ឯកឧត្តម ឃួង ស្រេង ថា កិច្ចការងារប្រមូលសំរាមនេះ គឺរដ្ឋបាលរាជធានីភ្នំពេញបានគិតគូរតាំងពីឆ្នាំ២០១៩មក ដោយបានចែកម៉ូតូកង់បីសម្រាប់ដឹកសំរាមនៅតាមបណ្ដាខណ្ឌទាំង១៤ និងសង្កាត់ទាំង១០៥ ជាមួយនឹងការទិញគ្រឿងចក្រចំនួន៧០គ្រឿង ដើម្បីដឹកជញ្ជូនសំរាមទៅចាក់ទីលានផងដែរ ។
សម្រាប់ដំណាក់កាលនេះ បើតាមការលើកឡើងរបស់លោកអភិបាលរាជធានីថា ទាំងអគ្គស្នងការនគរបាលជាតិ ទាំងអគ្គមេបញ្ជាការកងរាជអាវុធហត្ថលើផ្ទៃប្រទេសក៏បានសន្យាបញ្ជូនកងកម្លាំងប្រដាប់អាវុធទាំងពីរភេទនេះប្រមាណ២ពាន់នាក់ មកជួយលើការងារដឹកជញ្ជូននិងប្រមូលសំរាមនៅរាជធានីភ្នំពេញផងដែរ។ តែទោះបីជាយ៉ាងណាក្តីកម្លាំងទាំងនេះ គឺមិនទាន់យកមកប្រើប្រាស់នៅឡើយទេ។
ជាមួយគ្នានេះដែរ ឯកឧត្តម ឃួង ស្រេង ក៏បានអំពាវនាវដល់បងប្អូនប្រជាពលរដ្ឋទាំងអស់មេត្តាទុកដាក់ វេចខ្ចប់សំរាមឱ្យបានល្អ កុំយកទៅបោះចោលនៅតាមទីសាធារណៈ អាចយកទៅដាក់នៅដេប៉ូ ចាក់សំរាមដែលរៀបចំឡើងដោយអាជ្ញាធរខណ្ឌនៅក្នុងរាជធានីភ្នំពេញ ដោយការធ្វើបែបនេះនិងជួយសម្រួលការងារច្រើនសម្រាប់ក្រុមការងារដឹក ជញ្ជូនសំរាមរបស់យើង៕
