(ខេត្តកំពត)÷ បុរសម្នាក់ត្រូវសមត្ថកិច្ចមូលដ្ឋានឃាត់ខ្លួនមកសាកសួរនៅប៉ុស្តិ៍នគរបាលឃុំថ្មី បន្ទាប់ពីមានបណ្តឹងពីអាណាព្យាបាលប្តឹងថាបុរសកំហូចរូបនោះបានរំលោភសេពសន្ថវ:កូនស្រីរបស់គាត់ដែលជានារីមិនគ្រប់លក្ខណ:បានសម្រេចបំណងពេញមួយរាត្រី។
ការឃាត់ខ្លួនជនសង្ស័យបានលើឡើងក្រោយពីអាណាព្យាបាលតាមទាន់ជាក់ស្តែងនៅលើផ្ទះបុរសកំហូចកាលពីព្រឹកថ្ងៃទី០៨ ខែតុលា ឆ្នាំ២០២០ត្រង់ចំណុចផ្ទះរបស់ខ្លួន ស្ថិតក្នុងភូមិត្រពាំងច្រាប ឃុំថ្មី ស្រុកទឹកឈូ ខេត្តកំពត។
ជនសង្ស័យត្រូវបាននគរបាលប្រាប់ថា គាត់មានឈ្មោះ សួស ដេវ ភេទប្រុស អាយុ៤៦ឆ្នាំ មុខរបរធ្វើស្រែ មានទីលំនៅភូមិត្រពាំងច្រាប ឃុំថ្មី ស្រុកទឹកឈូ ខេត្តកំពត។ដោយឡែកនារីរងគ្រោះឈ្មោះ ន ច អាយុ២០ឆ្នាំ ជានារីមិនគ្រប់លក្ខណ: រស់នៅក្នុងបន្ទុកឪពុក ម្តាយ ស្ថិតក្នុងភូមិថ្មី ឃុំថ្មី ស្រុកទឹកឈូ ខេត្តកំពត។
ទាក់ទិននឹងករណីរំលោភនេះ បើតាមការបំភ្លឺពីអាណាព្យាបាលរបស់នារីរងគ្រោះបានឲ្យដឹងថា កូនស្រីរបស់គាត់ជាមនុស្សមិនគ្រប់លក្ខណ: ហើយនាងតែងតែដើរបាត់ៗពីផ្ទះរហូត លុះដល់ពេលល្ងាចទើបវិលចូលផ្ទះវិញជាធម្មតា តែគាត់ឆ្ងល់កាលពីល្ងាចម្សិលមិញ(០៧/១០/២០២០)គាត់មិនឃើញកូនចូលផ្ទះវិញសោះ ទើបនាំគ្នាដើររក នៅតែមិនឃើញ ប៉ុន្តែអ្នកជិតខាងប្រាប់ថា កូនស្រីរបស់គាត់ជិះម៉ូតូដើរលេងជាមួយបុរសឈ្មោះសួស ដេវ ទើបព្រឹកឡើងគាត់ក៏ទៅរកនៅផ្ទះ សួស ដេវ តាមពាក្យគេប្រាប់ ស្រាប់តែឃើញកំពុងរំលោភកូនស្រីគាត់នៅលើផ្ទះ គាត់ក៏ប្តឹងប៉ូលិសឲ្យឃាត់ខ្លួនតែម្តង។
បច្ចុប្បន្នជនសង្ស័យត្រូវសមត្ថកិច្ចមូលដ្ឋានកសាងសំណុំរឿងបញ្ជូនទៅអធិការដ្ឋាននគរបាលស្រុកទឹកឈូ ចាត់ការតាមនីតិវិធី៕ សេង ណារិទ្ធ
