(ខេត្តកំពត)÷ រដ្ឋមន្ត្រីក្រសួងផែនការបានបានរំឭកនឹងហាម ដល់អាជ្ញាធរគ្រប់លំដាប់ថ្នាក់ ដាច់ខាត់មិនត្រូវដាក់បញ្ចូលគ្រួសារដែលមានជីវភាពប្រសើរ ឬគ្រួសារជាសាច់ញាតិអាជ្ញាធរមូលដ្ឋាន ដែលមិនមែនជាគ្រួសារក្រីក្រពិតប្រាកដ ចូលទៅក្នុងអត្តសញ្ញាណកម្មគ្រួសារក្រីក្រ។
ថ្លែងនៅក្នុង ពិធីបើកកិច្ចប្រជុំផ្សព្វផ្សាយស្ដីពីការចាប់ផ្ដើមអនុវត្តកម្មវិធីអត្តសញ្ញាណកម្មគ្រួសារក្រីក្រជុំទី១៤ ឆ្នាំ២០២០ នៅព្រឹកថ្ងៃទី០៨ ខែតុលា ឆ្នាំ ២០២០នៅសាលាខេត្តកំពត ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានមានប្រសាសន៍ថា ភាពក្រីក្រជាមូលដ្ឋានស្មុគ្រស្មាញពហុមុខ បង្កឲ្យមានកំណើនប្រជាជនខ្ពស់ កង្វះអនាម័យ កង្វះការអប់រំ កង្វះកាលានុវត្តភាពការងារ កង្វះសន្តិសុខស្បៀង ការរើសអើងក្នុងសង្គម និងភាពងាយរងគ្រោះ ហើយរាជរដ្ឋាភិបាលកម្ពុជាបានយល់ច្បាស់ និងចាត់ភាពក្រីក្រជាមូលហេតុនៃការខាតបង់សេដ្ឋកិច្ចដ៏ធ្ងន់ធ្ងរ និងបានដាក់ចេញនិងអនុវត្តនយោបាយកំណែទម្រង់លើគ្រប់ផ្នែក គ្រប់វិស័យ ដើម្បីជំរុញកំណើន ការងារ សមធម៌ និងប្រសិទ្ធភាព នៅកម្ពុជា ដើម្បីសម្រេចបានគោលដៅអភិវឌ្ឍប្រកបដោយចីរភាព (២០១៦-២០៣០) និងការកាត់បន្ថយភាពក្រីក្រនៅកម្ពុជា ហើយកម្មវិធីអត្តសញ្ញាកម្មគ្រួសារក្រីក្រ ត្រូវបានរាជរដ្ឋាភិបាលចាត់ទុកជាឧបករណ៍ដ៏សំខាន់មួយ ក្នុងការជំរុញល្បឿនការកាត់បន្ថយភាពក្រីក្រឲ្យបានឆាប់រហ័ស។ ដូច្នេះទាំងមន្ត្រីមន្ទីរ អង្គភាពជំនាញ និងពាក់ព័ន្ធ អាជ្ញធរគ្រប់លំដាប់ថ្នាក់ ត្រូវសហការគ្នាធ្វើកិច្ចការងារនេះឲ្យបានល្អប្រសើរ និងមានប្រសិទ្ធភាព តម្លាភាព ទទួលបានសេចក្តីទុកចិត្ត។
ឯកឧត្តមកិត្តិសេដ្ឋាបណ្ឌិត ឆាយ ថន បានសង្កត់ធ្ងន់ថា អភិបាលខេត្តត្រូវជួយពិនិត្យតាមដាន និងធ្វើការណែនាំទៅតាមបណ្តាក្រុង ស្រុក និងឃុំសង្កាត់ យកចិត្តទុកខ្ពស់និងត្រូវជ្រើសរើសគ្រួសារសម្ភាសន៍ ជាគ្រួសារក្រីក្រពិតប្រាកដ ហើយជៀសវាងដាច់ខាត ការដាក់បញ្ចូលគ្រួសារដែលមានជីវភាពប្រសើរ ឬគ្រួសារជាសាច់ញាតិអាជ្ញាធរមូលដ្ឋានដែលមិនមែនជាគ្រួសារក្រីក្រពិតប្រាកដ។
សូមជម្រាបថា បើគិតត្រឹមថ្ងៃទី១០ ខែកញ្ញា ឆ្នាំ២០២០នេះ ក្រសួងផែនការមានទិន្នន័យគ្រួសារ ក្រីក្រសរុបចំនួន៦៨៩ ០៧៦គ្រួសារ គិតជាសមាជិកមានចំនួន២ ៧៦១ ៩៤១នាក់, ក្នុងនោះទិន្នន័យគ្រួសារក្រីក្រ តាមជុំមានចំនួន៥០៨ ៦០៣ គ្រួសារ និងទិន្នន័យគ្រួសារក្រីក្រអនុវត្តតាមនីតិវិធីអត្តសញ្ញាណកម្មគ្រួសារក្រីក្រតាមការស្នើសុំ គិតពីថ្ងៃទី២០ ខែឧសភា ឆ្នាំ២០២០ ដល់ ថ្ងៃទី១០ ខែកញ្ញា ឆ្នាំ២០២០ មានចំនួន១៨០ ៤៧៣គ្រួសារបន្ថែមទៀត។
ដោយឡែកខេត្តកំពត តាមរបាយការណ៍ឯកឧត្តម ជាវ តាយ បានឲ្យដឹងថា កន្លងមកខេត្តកំពតធ្លាប់បានអនុវត្តកម្មវិធីអត្តសញ្ញាណកម្មគ្រួសារក្រីក្រចំនួន៤លើករួចមកហើយ សរុបគ្រួសារក្រីក្រក្នុងខេត្តចំនួន ២៥.៦៤៥ គ្រួសារនៅឆ្នាំ២០២០ ក្នុងនោះកំឡុងពេលកូវីត១៩ រកឃើញគ្រួសារក្រីក្រចំនួន ៧,០៧៤គ្រួសារ៕ សេង ណារិទ្ធ
