(ខេត្តកំពត)៖ ការងារគ្រប់គ្រងប្រភពចំណូលចំណាយឲ្យបានល្អ គឺជាការងារចាំបាច់បំផុតមួយបម្រើដល់កិច្ចអភិវឌ្ឍន៍ រដ្ឋបាលក្រុង ស្រុក ព្រោះបើចំណូលក្រុងស្រុកបានច្រើន ខេត្តក៏បានច្រើន ហើយការចំណាយលើគម្រោងថវិកាក៏មានលទ្ធភាពកាន់តែច្រើនផងដែរ។
ថ្លែងកិច្ចប្រជុំ ដើម្បីពិនិត្យ និងបញ្ជាក់អនុលោមភាព លើកគម្រោងថវិការបស់រដ្ឋបាលក្រុង ស្រុកសម្រាប់ការគ្រប់គ្រងឆ្នាំ ២០២១ នៅព្រឹកថ្ងៃទី០៧ ខែតុលាឆ្នាំ ២០២០ ឯកឧត្តម ជាវ តាយ អភិបាលខេត្តកំពត បានមានប្រសាសន៍ថា៖ ការងារគ្រប់គ្រងប្រភពចំណូលចំណាយ គឺជាការងារសំខាន់ចាំបាច់ ក្នុងការបម្រើឲ្យកិច្ចអភិវឌ្ឍ រដ្ឋបាលក្រុង ស្រុក ។ ដូច្នេះរដ្ឋបាលក្រុង ស្រុកនីមួយៗ ត្រូវយកចិត្តទុកដាក់ បង្ហាញ និងការពារគម្រោងថវិកាចំណូលចំណាយសម្រាប់ការគ្រប់គ្រងប្រចាំឆ្នាំ២០២១ឲ្យបានល្អប្រសើរ ដើម្បីបម្រើដល់ដំណើរការអភិវឌ្ឍន៍មូលដ្ឋានរបស់ខ្លួន ឲ្យបានប្រសើរ និងមានប្រសិទ្ធភាព។
ឯកឧត្តមបានណែនាំដល់អាជ្ញាធរក្រុងស្រុក និងអ្នកពាក់ព័ន្ធ ត្រូវពង្រឹងការគ្រប់គ្រងចំណូល ចំណាយ ក្នុងរដ្ឋបាលនីមួយៗ ដោយអនុវត្តការចំណាយ ឲ្យចំគោលដៅពិតប្រាកដ ច្បាស់លាស់ និងមានតម្លាភាព ។ ជាងនេះទៀត ត្រូវខិតខំកៀរគរប្រមូលចំណូលចូលរដ្ឋ ដើម្បីទុកអភិវឌ្ឍមូលដ្ឋានរបស់ខ្លួន ឲ្យបានកាន់តែរីកចម្រើនផងដែរ។
លោកយិន ប៊ុនអាន ប្រធានមន្ទីរសេដ្ឋកិច្ច និងហិរញ្ញវត្ថុខេត្តកំពត បានបញ្ជាក់ថា កិច្ចការងារអនុវត្តច្បាប់ស្ដីពី អនុលោមភាពលើគម្រោងថវិការបស់រដ្ឋបាលក្រុង ស្រុក បានអនុវត្តជាយូរមកហើយ ប៉ុន្តែការងារនេះត្រូវបានអាក់ខានមួយរយៈ ហើយត្រូវបានធ្វើឡើងពេលនេះដើម្បីគ្រប់គ្រងចំណូល និងចំណាយថវិការដ្ឋ សម្រាប់គ្រប់គ្រងឆ្នាំ ២០២១ ឲ្យចំគោលដៅ និងមានប្រសិទ្ធភាព សម្រាប់រដ្ឋបាលក្រុងស្រុក។គម្រោងថវិការបស់រដ្ឋបាលក្រុង ស្រុក សម្រាប់ការគ្រប់គ្រងឆ្នាំ២០២១ ត្រូវបានពិនិត្យ និងបញ្ជាក់អនុលោមភាពទទួលស្គាល់ដោយអភិបាលខេត្ត ដើម្បីឱ្យការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ មានដំណើរការល្អ ប្រកបដោយប្រសិទ្ធភាព ស័ក្ដិសិទ្ធភាព និងសម្រេចបានតាមគោលដៅ ក្រសួងសេដ្ឋកិច្ច និងហិរញ្ញវត្ថុ ជាត្រីវិស័យ៕ សេង ណារិទ្ធ
ការងារគ្រប់គ្រងប្រភពចំណូលចំណាយចាំបាច់បំផុតសម្រាប់ការអភិវឌ្ឍន៍ក្រុង ស្រុក
